Медводз "Чолӧм, дзолюк" уджтасын, а сэсся "Василёчек" районъяскостса конкурсын юргисны Галина Михайловна Кармановалӧн кывбуръяс вылӧ лӧсьӧдӧм сьыланкывъяс.
"Ичӧтдырсянь тӧдмӧдам, мый сэтшӧмыс асму, чужанiн кӧть дзоля кӧть ыджыд некор оз вун. Ас чужанiн – тайӧ мамлӧн сьӧлӧмыс, небыд да мелi сывъясыс. Танi юргӧны коми сьыланкывъяс, сёрнитӧны комиӧн нывъяс да зонъяс, ачым коми, рӧдвуж коми. Коми йӧзыс тыр, коми чужан кывйӧй ов да выв". Тадзи кольӧм вося декабрын Кулӧмдiнса медводдза номера садйысь челядь онлайнын 100 во тырӧмӧн нимӧдiсны да ыдждӧдлiсны "Чолӧм, дзолюк!" петасын озыр да мича республиканымӧс да олысьясӧс. Юргисны кывбуръяс да "Чойкӧд прӧст кад коллялӧм" сьыланкыв. Тайӧ передачаӧ пырӧдчисны республикаса садъясысь нывкаяс да зонкаяс, танi олысьяслӧн вӧл= позянлун видзӧдны да донъявны налысь сямсӧ.
- Садйын воспитательяслӧн чукӧртчылiгӧн содтӧд тӧдӧмлун сетысь Елена Дмитриевна Гичева висьталiс телевизор пыр мунысь "Чолӧм, дзолюк!" уджтас да "Василёчек" конкурс йылысь. Колӧ пӧ челядьлы выль коми сьыланкыв. Кытысь сiйӧс босьтны? Гашкӧ пӧ тэнад эм кывбур? Школаын велӧдчигӧн на гижлi некымынӧс. Петкӧдлi, "Чойкӧд прӧст кад коллялӧм" кывбурӧй зэв пӧ лӧсялӧ, корис содтыны припев. Минутӧн и лӧсьӧдi. Елена Дмитриевна ачыс шыӧдчис районса культура керкаысь специалист Никита Сергеевич Рассыхаев дорӧ, кодi гижис шыладсӧ. Зэв ӧдйӧ и артмис. Велӧдiм садйын, бать-мамкӧд пель саяс сюркнялiсны гортаныс. Тайӧ сьыланкывнас петкӧдчим "Чолӧм, дзолюк!" петасын да "Василёчек" конкурсын. Нимкодь, мый район тшупӧдын тайӧ сьыланкывсӧ донъялiсны медся вылӧ, а районъяс костын босьтiс коймӧд места, - кыпыд ловкылӧмъяссӧ эз дзеб Галина Михайловна.
Ань дорӧ кывбурла шыӧдчис тайӧ да нӧшта "Голубок" садйын шылад велӧдысь Лариса Владимировна Костылева. "Гажа гожӧм" дорӧ шыладсӧ гижис ачыс. "Василёчек" конкурсын тайӧ сьыланкывйыс босьтiс мӧд места.
Вайӧ тӧдмасям Галина Михайловнакӧд. Сiйӧ кольӧм вося сентябрсянь на и уджалӧ юрсиктса садйын. Ачыс орчча районысь, Ыджыдвидзса. Сьывны радейтӧ дзолядырсянь. Сиктсаяс пыр шулiсны мамыслы, нылыд пӧ лоас артисткаӧн. Садйӧ мунiгӧн вит арӧсалӧн даддьын пукалiгӧн вомыс эз и тупкысьлы, сьылiс век. Школаын велӧдчигӧн петкӧдчылiс быд гажын. Пыр кӧсйис лоны шылад велӧдысьӧн. Мӧвпыштӧмсӧ збыльмӧдӧм могысь школа бӧрын пырис Сыктывкарса мӧдӧд номера педучилищелӧн шылад юкӧнӧ, велӧдчис ворсны баянӧн да фортепианоӧн. Карын тӧдмасис Сыктывкарса университетлӧн информатика да математика факультетын велӧдчысь Югыдъягысь Иван Кармановкӧд. Мусмисны ӧта-мӧдныслы да гартiсны ӧти гӧрӧдӧ олӧмнысӧ. Чужис Алина, да во пукалiс гортас. Ӧти воын и гозъя помалiсны велӧдчӧм. Студенталiгӧн университетӧ волiс Пӧдтыбокса школаысь директор да корис том специалистӧс. Кытчӧ верӧс, сэтчӧ и гӧтыр. Могмӧдiсны оланiнӧн. Садйын уджалан места эз ло, да и кагаыс дзоля на вӧлi. Быдтысис, во мысти корисны шылад велӧдысьӧн да воспитательӧн. Ӧтилаын вӧлiны став арлыда челядьыс, группаас 10-12 ка-га и эм. Галина Михайловна ловсӧ кыпӧдiс посёлокса клубын, сьылiс котырын. Кармановъяслӧн чужис Савелий.
Но кыдзи и уналаын, томъяс бур олӧм корсьӧм могысь мунӧны овны мӧдлаӧ. Нинӧм шуны, посёлокын лавка вӧлi тырмымӧн. Но садйыслӧн керка важ, челядь этша, ывлаын абу весиг ворсанiн. Кутшӧмӧн лоас аскиа луныс? Иван Николаевич шыӧдчис миян районса велӧдан управлениеӧ, ыстiс ас йывсьыс юӧр. Пасйис, мый абу ӧтнас, семьяа да челядя. Февральын чуймӧдiс гӧтырсӧ, менӧ пӧ уджавны корӧны Кулӧмдiн районӧ. Кольӧм вося мартын волiсны да видзӧдлiсны оланiн. Петкӧдлiсны районса администрацияӧн специалистъяслы ньӧбӧм куим жыръя патера, воӧ ва, шоныд, эм канализация. Велӧдчан во кежлӧ вуджисны нин. Велӧдан управлениеын висьталiсны колӧ пӧ воспитатель. Медводдза номера садйӧн веськӧдлысь ачыс звӧнитлiс да корис. Майбыр, оланiнкӧд орччӧн. Да и школаыс, ёнмӧдчанiн матынӧсь.
- Ме Пӧдтыбокын уджалi 12, верӧсӧй – 13 во. Дерт, ёна торъялӧ посёлокын да Кулӧмдiнын серпасыс. Сэнi медводдза классӧ пырис сӧмын кык кага, классъясас 6-9 мортаӧн, 11 класс помалiсны кыкӧн. А танi уна велӧдчыся ыджыд школа, физкультура да шылад ыджыд залъяса да кыпыд жыръяса ӧнiя кадся сад. Менӧ вочаалiсны зэв пӧся, ӧта-мӧдлы отсасьысь, уна сикас конкурсъясӧ пырӧдчысь, ыджыд удж бергӧдысь челядьӧс велӧдысь-сӧвмӧдысьяслӧн котыр. Танi уджыс пуӧмӧн пуӧ, - сёрнитiс Галина Михайловна.
Алина нылыс велӧдчӧ Сыктывкарын физика да математика лицейын 8-ӧд классын. Гортас волӧ сӧмын каникулъяс вылӧ. Но коронавирус паськалӧмла некымынысь нин велӧдiсны дистанционнӧя. Савелий 4-ӧд классын. Велалiс нин, аддзис выль ёртъясӧс. Школаӧ мунӧ окотапырысь. Рытын гортын лӧнь. Иван Николаевич дасьтысьӧ аскиа урокъяс кежлӧ, а тӧдӧмлун сетӧ 6 классын. Аскиа лун кежлӧ лӧсьӧдчӧ и Галина Михайловна. Бать-мам локтiгкежлӧ вӧчӧма нин гортса уджъяс Савелий.
Ас районӧ бергӧдчӧмысь нимкодь Иван Николаевичлӧн бать-мамлы, ӧнi матынджык нин пилӧн семья. Абу ылын и Ыджыдвидз, позьӧ тӧвзьывлыны видлыны Галина Михайловналысь бать-мамсӧ.
Гортаныс эм синтезатор, ань тшӧкыда пуксьывлӧ да ворсӧ сьыланкывъяс. Регыд на Елена Дмитриевна вӧзйис гижны сад йылысь кывбур. Зэв ӧдйӧ сюрисны лӧсялана да мича кывъяс. Галина Михайловналӧн выльлаын, тыдалӧ, ловзис "музаыс". Юрӧ пӧ воас мӧвп, да пыр и пасйышта, сэсся содтышта либӧ вежышта. Шыладыс пӧ юрын бергалӧ жӧ. Ачыс сёрнитӧ сӧстӧм коми кывйӧн. Гашкӧ и ачыс босьтчас да ас сьыланкывйӧн нин петкӧдчас локтан "Василёчек" конкурсын, чужасны выль сьыланкывъяс.
