Кöрткерöс районса Ыджыдвиддзын олысьяс оз вермыны инавны челядьсö детсадйö. Пöшти куим во сайын ёрдлöн шуöм серти сиктса детсадсö тупкöмаöсь. Йöзсö эскöдöмаöсь, 2013 воын кыпöдасны выльöс. Но, тыдалö, пöръялöмаöсь...Бара пöръялісны...

Кöрткерöс районса Ыджыдвиддзын олысьяс оз вермыны инавны челядьсö детсадйö. Пöшти куим во сайын ёрдлöн шуöм серти сиктса детсадсö тупкöмаöсь. Йöзсö эскöдöмаöсь, 2013 воын кыпöдасны выльöс. Но, тыдалö, пöръялöмаöсь...

Некодлы кольны

—Миянлы кывсис нин, мый таво нинöм оз стрöитны, — майшасьö Мария Мишарина. — И кыпöдасны-ö коркö, некод стöча оз висьтав.

Мария Дмитриевналöн кык пи, апрельын виччысьö коймöдöс. Удж вылö медасьны оз вермы, челядьсö некодлы кольны да.

—Пыр öд дед-баб дорö он нуöд. Детсадтöгыд зэв сьöкыд. Гортад öд сöмын дуригмоз чеччалöны, а садйын эськö унаторйö велöдчисны, тöдöмлун босьтісны.

Гортас жö челядьыскöд пукалö Любовь Александровна Косолапова. Аньлöн висьталöм серти, куим арöса Димаыс быд асыв садйö нуöдчö, а местаыс абу да, кытчö иналан. Сизим арöса Ксюшасö школаö пыртöдзыс тай вермöма жö кыдзкö-мыйкö инавлыны Выльыбса садйö. Гашкö и, Димаыслы школаöдзыс мойвиас?

Выльыбса — гортаныс жö

"Коми му" газет 2010 вося августын гижліс нин Ыджыдвиддзын детсад тупкöм йылысь ("Кытчö инавны кагаöс?"). Сэки сиктса да районса чинаяс аддзисны петан туй — восьтісны содтöд группа орчча Выльыб грездын. Но и сэтчö веськалісны эз ставныс. Да и öні Выльыбса детсадйö оз вермыны быдöнöс инавны. Весиг асьныс грездас олысь дзолюкъяс пукалöны гортаныс.

—Важöн нин öчередьын сулалам, но некыдз ог веськалöй, — висьталö Анна Васильевна Макарова. — Удж вылö мунігöн кольла Янаöс бабыслы либö ыджыд мамыслы. Но найö оз жö быд лун вермыны кагаöс видзны, асланыс нокыс юр выв тырыс да. Ыджыдвиддзын кö вöлі детсадйыс, эськö выльыбсалы ставныслы грездсаас местаыс тырмис.

А важ садйын...

Выльыбын детсадсö кыпöдлöмаöсь 1971 воын да сан-пин-лöн öнія корöмъяслы оз лöсяв. Позьö сэні видзны сöмын öти котырöс, мед кызь кагаысь унджык эз вöв. Но восьтöмаöсь комын квайта кык группа. Ичöт челядьлöн жырйыс дзоля, а гырысьджыкъяслöн узьланіныс абу, вольсасьöны раскладушкаяс вылö. Абу и музыка велöдан жырйыс ни физзал, асмогасяніныс кöдзыд. Песласяніныс да пусяніныс мöд стрöйбаын, кöть эськö öнія корöм серти колö, мед öти вевт улын вöліны.

Кöсйис, да несйис

—Нинöм оз кывсьы Ыджыдвиддзын детсад кыпöдöм кузя, — майшасьö жö Выльыбса детсадйöн веськöдлысь Роза Ивановна Игушева. — Кольöм вося ноябрын бюджетысь сьöм юклігöн миян йылысь весиг абу казьтыштöмаöсь. Пыр "вердöны" сöмын кöсйöмöн.

Кор Ыджыдвиддзын пöдласьöма детсадйыс, районса чинаяс эскöдöмаöсь, мый выльсö кыпöдасны 2013 воын. Кольöм во арнас овмöдчанінöн веськöдлысьöс бöрйигöн ыджыд-видзсаясöс ышöдöмаöсь сетны гöлöснысö "Единая Россия" ютырö пырысь дор. Бöръянныд кö пö Николай Симпелевöс, сиктын быть кыптас выль детсад. Бöрйисны, но стрöитчöм йылысь весиг сёрни абу. Ыджыдвидзсаяс таысь ёна нин дöзмöмаöсь, öтарö пö пöрйöдлöны да.

Доддьыс оз вöрзьы

Водзынсö Ыджыдвиддзын вöлöма куим детсад. Весиг пузчужöм кагаясöс видзöмаöсь яслиын. Вочасöн челядьлöн лыдыс чинöма. И сиктын кольöма öти детсад. Кольöм нэмся кöкъямысдасöд воясö сёрнитлöмаöсь выльысь стрöитчöм йылысь, но олöмыс гудыртчöма, да Ыджыдвиддзын выль садйыд абу и кыптöма.

Роза Ивановна унаысь шыöдчылöма сиктса администрацияöн веськöдлысь дорö да районса велöдан юкöнö, республикаса чинаяс дорö. Но сиктын выль сад кыпöдöм могысь доддьыс оз вöрзьы.

—Мöвпалім вöвлöм совхоз контораö восьтыны садсö, — висьталö Роза Ивановна. — Но медым лöсьöдны та могысь стрöйбасö, сэки коліс 34 миллион шайт. Та мында сьöмсö районса бюджетысь вичмöдны эз вермыны. Кöсйылім вуджöдны зонпосниöс школаö. Сёрнитчылім, мый вичмöдасны миянлы начальнöй классъяс. Бара жö нинöм эз артмы.

Местасö индöма, но...

Ыджыдвидз сиктса администрацияöн веськöдлысь Николай Симпелев, код вылö йöзлöн вöлöма ыджыд лача, пасйис, мый вöчö ставсö, мед сиктын кыптіс выль детсад.

—Стрöитчан местасö нин вöлі урчитöма. И проектсö нин аддзылі, но, тыдалö, мукöдлаын ёна сьöкыдджык да Ыджыдвиддзын стрöитчöмысь шуисны эновтчыны, — висьталö Николай Иванович. —Дерт, миянлы детсадйыс быть колö. Матö ветымын кага пукалö гортас.

Гашкö, оз ков?

Районса велöдан управлениеын чуймисны, кор тöдмалісны, мый 2013 воын кöсйысьлö-маöсь кыпöдны Ыджыдвиддзын детсад. Но та дырйи висьталісны, проектыс пö дась.

—Öні уджтассö видлалöны торъя надзор тэчасъяс. Дерт, öти воöн выль стрöйбаыс оз кыпты. Ог вермöй стрöитны детсадсö сöмын район тшöт весьтö, быть колö республикалöн отсöг, — висьталіс районса велöдан юкöнöн веськöдлысь Вера Киселёва.

Сылöн кывъяс серти, Ыджыдвиддзын детсадсö быть кыпöдны коланлуныс талун абу. Районса велöдан юкöнö шыöдчöмаöсь сöмын кызь нёльöн, кодъяс кöсйöны инавны каганысö садйö.

—Та вöсна ми ог вермöй корны республикалысь стрöитчöм вылö сьöм. И кор кыптас Ыджыдвиддзын выль детсадйыс, висьтавны ог куж.