Игорь Янковкöд ме тöдмаси Виктор Савин нима драматическöй театрлöн гастроль дырйи. И мыйлакö зэв окота лои босьтны сылысь интервью. Гашкö, аслас мыгöрнас да олöм вылö видзöдласнас мукöдсьыс ёна торъяліс да, сійöн. И со сюрис помкаыс! Игорьлы, вöлöмкö, 50 арöс тырöма!
Игорь Юрьевич чужöма 1962 вося декабрь 2 лунö Сыктывкарын. Ичöтсяньыс вильыш зонка радейтöма котравны юркарса пионеръяслöн дворечö. Быдсикас кружокысь пö позис аддзывны менö: и боксируйтö, и баянöн ворсö, и футбол мач чужъялö, но век жö драмкружок "вермис" ставсö.
—Ме сэки, позьö шуны, эг и петавлы пионеръяслöн керкаысь, — висьталö Игорь. — Миян драмкружокын ворсісны Олег Нагорничных — "Гамлет" постановкаса режиссёр да Лидия Цивилёва — öні нималана артистка. И меысь сідзжö артмис артист, 27-öд во нин ворса республикаса драма театрын.
А заводитчöма ставыс 1981 воын, кор Комиысь 15 ныв-зонмöс мöдöдöмаöсь велöдчыны Уфаса искусствояс институтö киноса да театрса актёрö велöдчыны.
—Талун драма театрын уджалöны сöмын витöн: Ольга Носкова, Елена Янкова, Мария Чукарева, Надежда Пешкина да ме, — водзö нуöдіс сёрнисö Игорь Юрьевич. — Ставным ми —Коми Республикаса заслуженнöй уджалысьяс.
—А кутшöм нö эськö роль лои медся матысса, — водзö юася енбиа артистлысь.
—А ставыс пö зэв матысса, став роляс сьöлöмсянь пырöдчи, кодкö дзик менам этш серти, а кутшöмöкö и пырöдчыны ковмис. Сё сайö роль нин öд чукöрмис. Но-а торйöн нин сьöлöм серти лоины Авдей дед "Свадьба приданнöйöнысь", Дороша "Панночкаысь", Иван Кузьмич "Бесприданницаысь", Емельян Чернозёмов "Квадратура кругаысь", Эрнандо "Хитроумная влюблённаяысь". Кольöм во кык выль спектакльын петкöдчи, мыйлакö "Гамлет" драмаысь "могильщикыс" видзöдысьлы лои серам петкöдланаöн, а "Малыш и Карлсон" мойдын ворсі Фрекенбок домоуправительницаöс, медводдзаысь на — аньöс. Зэв аслыспöлöс роль. Меным отсаліс сыö пырöдчыны гöтырöй, öд сійö сідзжö ворсö миян театрын.
Дерт, ов сертиыс ме гöгöрвои нин, мый Елена Янкова и лоö Игорьлöн кепысь пöвйöн, но век жö юалі, сьöкыд-ö уджавны öти котырын. Вöлöмкö, кык коми морт аддзысьöмаöсь Уфаса институтын. Колö пö вöлі мунны сюрс верст сайö, мед аддзыны сэтысь радейтана мортöс.
—Институтö мунігöн öта-мöд йылысь войт эг тöдöй, а локтім гозйöн да нöшта и кагукöс виччысим. Недыр мысти чужис Трофим, а ичöт пиным Антон, кыдз шуöны — "поздний ребёнок". Сійö школаын на велöдчö.
—А кöсйöны-ö челядьныд мунны тіян туйöд, — юася.
—Трофим оз, а Антон ворсіс нин "Всего ничего" пьесалöн кык юкöнын. И чайта, эз лёка. А гозйöн миян театрын уджалöны Светлана Малькова да Денис Рассыхаев, Анна да Евгений Сафроновъяс, Ольга Носкова да Александр Трибельгорн. Ог вермы нинöм шуны на йылысь, но миянлы тай гозйöн зэв бура уджавсьö-а. Дерт, и гортын тшöтш репетируйтчам. Та боксянь ёна кокньыд. Лена менам Выльгортысь. Сійö нималана рöдысь. Мамыслöн дедыс — Домна Каликовалöн воча вок.
—А кутшöм тэнад хобби, — юася.
Вöлöмкö, Игорь радейтö чери кыйны, тшак вотны, сьöлöм сертиыс и лавкаясö ветлыны. Мужичöйяс пиысь унаöн оз радейтны гöтыръясыскöд магазинъясті кытшлавны, а Игорь вöчö тайö любöпырысь. Сэсся нималана морттö быдлаын тöдöны, öд театрын ворсöмысь кындзи сійö и рекламаын петкöдчö.
Кольöм гожöм "Северная звезда" котыркöд Игорь ветлöма Старая Русса кар бердö усьöм салдатъясöс корсьны. Уна гу пö аддзим, но ни öти ним эг и тöдмалöй. Антонöс пö тшöтш босьтлі.
А мыйла, мися, ветлін сэтчö, абу öд ёна кокньыд лукйысьны му пытшкын.
—Ыджыд тышын усьöмаяслы пыдди пуктöмöс тадзи петкöдлі, — шуис Игорь. —И пиöс тшöтш туйді-велöді. Уна сёрнитім война йылысь, казьтывлім ассьыным дедъяснымöс.
Быд артистлöн эм аслас сідз шусяна поклонник. Дерт, эмöсь татшöмъясыс и Игорь Янковлöн. Коркö пö матыстчис ме дорö шöр арлыда морт да шуö, ми пö тіян мойдъяс вылын быдмим, а öні ассьыным челядьöс нин тіян спектакльяс вылö вайöдлам. Кадыс пö быттьö тіянлы, артистъяслы, абу. Ставныс пöрысьмöны, сöмын ті колянныд томöн да пыр на ворсанныд-чеччаланныд сцена вылын.
—А казьтышт кутшöмкö интереснöй вöвлöмтор, — ог сетчы ме.
И со мый Игорь казьтыштіс. во кызь сайын локтöмаöсь Комиö снимайтны кино. "Американский шпион", буракö, шусьöма. Сюрöсыс воссьö тюрьмаын, а снимайтöмаöсь Княжпогост районын. Ворсöмаöсь Москваса артистъяс, а миянлысь Ольга Сосновскаяöс, Михаил Красильниковöс, Михаил Костроминöс да Игорь Янковöс босьтöмаöсь сідз шусяна эпизодическöй рольясö. И друг кывсьöма, мый пукалысьяс кöсйöны босьтны артистъясöс заложникъясö, но "тюрьмаса паханыс" пö абу лэдзöма.
—Збыль тайö вöлі либö сöрöм, ог нин вермы висьтавны, но татшöмыс менам олöмын вöлі, — висьталіс артист. — Киносö öтчыдысь, буракö, петкöдлöмаöсь телевизор пыр, но гонорарсö ми сэки босьтім бурöс.
А кыдзи овсьö талунъя артистлы? Ыджыд-ö удждоныс? Тайö юалöм вылö Игорьлöн нюмыс петіс, ми пö асланым уджысь öтдор, мукöдлаын зілям. Кодкö велöдö окотитысьяскöд "техника речи", мöд — "сценический показ", коймöд нуöдö корпоративнöй рыт да кöлысь. Кодкö снимайтчö телевидениеын, кодкö нуöдö радиопередача.
—Ме ас кадö, — казьтылö Игорь, — радио пыр мойд лыдди, сэсся гöтыркöд уджалан жыръяс пелькöдім, лавкаын стöрöжавлі, öтчыд весиг фасовщикалі. Сэсся пöшти став артистыс уджыштліс монтировщикöн да Кöдзыд пöльöн. Ме тай Ленакöд быд Выль во дырйи челядьлы козинъяс разöдам-а. Ме — Кöдзыд пöль, а Лена — Лымныв. Чайтім, мöд каганым нывка лоö, томиник Лымныв, а чужис пи — выль воöн позьö сійöс нимтыны.
—Игорь, а кутшöм роль эськö тэ ачыд кöсъян ворсны, — водзö юася.
—Ок эськö, пöльöн кö лоны, но абу сцена вылын, а олöмас. Трофимлы кад нин гöтрасьны да миянöс дед-бабöн вöчны. Зэв ёна радейта посниясöс.
Лыддьысьысьяс нимсянь чолöмала Игорь Юрьевичöс тшупöда пасöн да сиа кузь нэм, бур шуд да гырысь вермöмъяс.
А Игорьлысь поклонникъяссö виччысьö ыджыд да кыпыд гаж — декабрь 9 лунö 17 чассянь Виктор Савин нима театрын лоö енбиа артистлöн бенефис.
Волöй, он жалитöй!