Дедыс кöртысь вöчасьö, тьöт-каыс вурсьö, мамыс кысьö, батьыс пуысь вöчасьö да серпасасьö... Кысь нö сэсся татшöм семьяын оз чуж енбиа ныв? А висьтала ме Диана Петракова йылысь. Помöсдінса тайö аньыс пуö кöза йöлысь ... майтöг.
Диана ичöтсяньыс кысьöма. Дерт, мамыс велöдöма нывсö. Вöчавлöма быдсикас сідз шусяна аппликациясö. А мед лякавны, клейсö ачыс жö гудравлöма. Некымын во сайын босьтчылöма вышивайтчыны лентаясöн. Зэв мича серпасъяс вöчавлöма. Весиг районын олысьясöс уджöн могмöдан шöринсянь вöзйöмаöсь дасьтыны сідз шусяна бизнес-план, медым инавны том аньлысь вöчöмторъяссö.
–Гижлі эськö, но эг удит нуны вынсьöдны кабалаяссö. Мöд кага чужис, да ставыс дудіс быдтысигад, – висьталö ань.
Öні Диана Степановна выль дум-кöсйöмöн "öзйöма" – кöза йöлысь майтöг пуö. Кыдзи сійö висьталіс, во кымын мöвпалöма, босьтчыны-ö тайö уджас. Öтуввезйысь корсьöма майтöг пуан рецептъяс, лыддьöма сы йылысь быдсикас литература. Судзöдöма чöскыд дука да мича рöм вöчан сорасъяс. Во джын сайын сэсся босьтчöма пуны.
–Час кымын колö пуны, – висьталö Диана Степановна. – Первойсö некутшöм дозмук эз вöв да челядьлöн лыаöн ворсан чачаясö кисьтавлі. Öні öтуввез пыр судзöді торъя формаяс. Но челядьлöн ворсан дозмукас пуктавла на.
А кутшöм нимкодь нылукъясыслы лоöма, кор мамыс кутöма мыссьöдны найöс чери, сьöлöм либö дзоридз мыгöра майтöгöн. Лавкаысь öні оз ньöблыны, ас майтöгöн мыссьöны. Могмöдö Диана и матысса рöдвужсö.
Быд во Помöсдінын овлö Успенньö ярманга. Сиктса войтыр вöзйöны ассьыныс вöлöга, ас киöн вöчöмторъяс. Таво тшöтш и Диана Степановна петалöма аслас майтöгöн вузасьны.
–Майшаси эськö, кодкö босьтас оз, – висьталö ань. – Сьöрысь нулі 34 майтöг, коли сöмын кöкъямыс. Найöс сэсся вöзйи сиктса "Рукодельница" лавкаö. Куим лунöн и ньöбöмаöсь ставсö. Вузавлі 20 шайтöн, но вöліны и сё шайтаяс.
Кулöмдінын "Том кад" котырлöн эм жö сувенирöн вузасян лавка. Сэтчö Диана Петракова вöзйöма жö ассьыс майтöгъяссö. Коді ньöбöма Помöсдінса майтöгсö, бара пö нин корö вöчны.
Пуö Диана Степановна майтöгсö кухняас, некутшöм на торъя жыр абу лöсьöдöма. Тшöкыдджыка войнас. Челядьсö водтöдас да пусьö. Аньлöн майтöгыс артмö мича рöма, чöскыд дука да дзик крем кодь небыд. Мыссян да, кучикыд небзьö. А лавкаса майтöгыд косьтö. Сиктсаяс шуöны, мый Помöсдінса майтöгöн позьö и чужöмсьыд мавтассö мыськыны.
А мыйла сійö сэтшöм бур? Диана Степановна майтöг пуигöн содтö сорасас кöза йöв. Кыдзи висьталіс ань, öтуввезйын гижöма, мый майтöгтö позьö пуны йöв да ма сорöн. Диана Степановналöн овмöсас кöзаясöс видзöны. Став йöвсö оз юны, лишалö да и видлöма сыысь майтöг пуны. Öні Белка да Милка (тадзи шуöны кöзаяссö) лысьтöны и та вылö тшöтш.
–Öні тэнад кык кöза. Водзö кö паськöдчан, и пемöсъястö ковмас унджык лöсьöдны...
–Йöлыс и сідз тырмас. Литраысь позьö куим кило майтöг пуны, –нюмъялö ань. – Уна кö пуктан йöвсö, майтöгыс ва лоö.
Öні Диана Степановна ассьыс нин рецепт лöсьöдöма. Некодкöд сійöн оз юксьы. Да и зільö на сы вылын, мед майтöгыс нöшта бур лоö. Висьталіс сöмын, позьö пö и аптекаысь босьтны уна сикас вый да сорлавны. Весиг кöнтусь вый позьö войтöдны. Шуам, майтöг-скрабö содтö шырöм кофе тусь. Сэтшöм чöскыд кöра артмö. Пуктывлö и ванилин. Судзöдöма ароматизаторъяс: персик, мускус да мукöд сикасöс.
–Медводдза воськовъяссö вöчöма нин. Гашкö, дасьтан нин бизнес-план? Шуам, во вит мысти кутшöмöн тэ аддзан ассьыд, позьö нин шуны, производствотö? – водзö юася сылысь.
–Ёна нин мöвпалі. Колö сöмын пуксьыны да гижны. Районын позьö босьтны грант либö карö петны уджтаснас. Чайта, во вит мысти лоö нин оз сöмын майтöг. Кута тшöтш вöчны шампунь, крем...