Война водзвылын да и сы бöрын кутшöм коми сикт эз тöдлы гудöкасьысь зонъясöс?! Вöрзьöдлісны сьöлöм нывъяслысь, петкöдлісны веж зонпоснилысь, нормöдлісны олöма йöзöс. Кыдзи восьтасны гудöксö да мöдöдчасны сиктса шöр туйöд, ок и гажа!

Татшöм жö завидьтана зонмöн вöлі Кулöмдін районса Выльгорт сиктын чужлöм Степан Алексеевич Курочкин. Мыйта асьсö помнитліс, сы мында и гудöкасис, ёна дзолясянь босьталіс мича шыяссö. И кор воис кад мунны Ыджыд война вылö, гудöкыскöд эз янсöдчы. Тышъяс костын шойччигöн юргис сылöн "ёртыс", гажöдіс мудзöм салдатъясöс, казьтыліс ылі чужанін, гортсаяс йылысь.

Степан Алексеевич воис Германияöдз. Енбиа мортлы, кыдз öні шуöны, виртуозлы, сетісны трофейнöй немеч гудöк. Зэв мича шыа. Гортас воис сьöкыда ранитчöмöн, пытшкас осколокъясöн. И гудöкыс вöлі ыджыд мыджöдöн, отсаліс личöдны дойсö.

Выльгорт сиктын свадьба, праздник ни чужан лун эз кольлы сытöг. Мыла гöлöса нывъяс сьылісны сылöн вор-сöм улö. Торйöн мичаа ливкйöдліс Нина Степановна. Ачыс сійö Великопольеысь. Сплав дырйи тöдмасисны том йöз. Овмöдчисны Выльгортö. Гозъя вöліны зільöсь, удж вылö азымöсь.

Öти бöрся мöд чужисны челядь: кык пи да куим ныв. И найöс ичöтсяньыс велöдісны уджавны да сьывны. Медводдза шыясыс, мый найö кылісны, вöліны батьыслöн гудöк шыяс. Радейтліс Степан Алексеевич гажöдны челядьсö мичаа юргысь гудöкöн. А найö быдмисны зільöсь, тöлкаöсь, шаньöсь. Бать-мам юкасны удж, а найö ставсö вöчасны колана ногöн.

И быд пöрйö юргис тайö семьяас сьыланкыв. Турун пуктöны – сьылöны, картупель босьтöны, мöс видзöны, мукöдтор вöчöны – пыр сьылöны. Сöмын войнаса ветеран эз дыр гажöд матыссасö выль гудöкöн, кодöс сылы ньöблісны. Осколок-дойясыс чорыда мучитісны да, эз ло Степан Алексеевич. Но колисны водзö олысьяс: челядь, внукъяс, правнукъяс.

И став челядьыслöн олöмö öткодя йиджöма мамыслöн да батьыслöн сьылöм да гудöкасьöм дорö муслуныс. но кыдзкö торъялöджык на пиысь Мария Степановна, öні Гаевская.

Маша Выльгортса школаö велöдчыны пырöмсяньыс нин петіс сцена вылö. Альбина Ивановна Попова ворсіс мандолинаöн, Ида Александровна Игнатова – гудöкöн, а Маша сьыліс. Хорын и öтнас. Витöд классас велöдчис нин Помöсдінын, и бара ни öти концерт, школаын праздник эз кольлы сытöг. Ичöтик кодзулöн вöлі школаса да районса смотръяс вылын. Жюри вылö донъяліс колипкайöс. Но мыйлакö некор нывкалы эз волы мöвп лоны артисткаöн. Сьыланкывйыс вöлі олöмöн, кодöс нинöмöн он нетшышт. И он вермы сійöс аддзыны профессияöн. Машалы вöлі кажитчö бурдöдысьлöн удж. Но сылы эз мойви водзö велöдчыны.

Олöмыс муніс Выльгорт сиктын. Танöсь жö Альбина да Валентина чойясыс. Кыкнанныс ас кадö помалісны педучилище. Зэв жö водзмöстчысьöсь да мича гöлöсаöсь. И со куим чой босьтчисны ветлöдлыны сиктса клубö. Сьылісны и торйöн, и "Мича аньяс" ансамбльын. Сэсся и челядьсö таö кыскисны. Чукöрмыліс семьялöн 11 морта ансамбль.

Но Мария Степановналы этша сöмын Выльгорт клубын сьывны, сійö и Помöсдінса культура керкаö котраліс. Ворсліс йöзкостса театрын "Джуджыд потшöс сайын", "Изьва йывса крепость", "Войпук" да мукöд спек- такльын дасысь унджык роль. Öні ветлö ветеранъяслöн "Сьöлöм сьылöм" хорö.

А öд сиктса нывбаба оз вермы овны скöт видзтöг, турун пуктытöг, град вöдиттöг. Став уджсö тільö-керö тайö аньыс. Асывсянь удж вылын, пажын кадö – Помöсдінын репетиция, рытнас – Выльгортын, а гортас челядь да гортса пемöс. И ставсö вöлі удитö, и гöгöр дзим-дзурк. Аттьö, ёна отсасисны верöсыс да челядьыс – нёльнансö ичöтсянь сибöдісны уджö.

Оз öтдортны коми сьылан и Настя да Алёна нывъясыс. И Никита пиыс школаын велöдчигас тшöтш петкöдчис концертъясын. Ачыс Мария Степановна Выльгортса котыркöд воліс мукöд кар-районö: Сыктывкарö, Ухтаö, Визинö, Куратовö, а Эжваса бумажникъяслöн дворечö весиг кыкысь-куимысь вонас. Таво мойвиис ветлыны Финляндияö. "Ыбицаын" ассьыныс сямсö петкöдлісны, Уллянаса манастырын и. А Мария Степановналы татшöм ветлöмъясыс ёна воöны сьöлöм вылас. Кымын ёртöс аддзис, кымын выль коми сьылан тöдмаліс! А кутшöм бура быдлаын вочаалöны да пыдди пуктöны!

Выльгортса "Мича аньяс" котырын сійö, позьö шуны, прима. Сылöн вöліны бур велöдысьяс. Помöсдінса культура керкаöн веськöдлысь Валентина Владимировна Соколюк кужöмöн восьтіс гöлöссö. Велöдісны и баянöн ворсысьяс Аифал Александрович Игнатов, Игорь Иванович Карманов. Жаль, абу нин ловъяöсь. Бöръя кадас баянöн ворсіс Василий Гаврилович Игнатов. Найö некор эз лыддьысьны сьöмöн ни кадöн.

Öні Мария Степановна ачыс нин велöдö сьывны томджыкъясöс. На лыдын и Виктория Климчук внучкаыс. Нывка велöдчис Юралысь бердса искусствояс гимназияын. Помöсдінын концертъяс дырйи век юргö сылöн гöлöсыс. Ордйысигöн бабыс моз жö босьтö медводдза местаяс. А Валентина чойыслöн Ваня пиыс дедыс моз дзолясянь няжöдчö гудöкöн, да и Карина внучкаыс сетö нин надея.

А Вика и спортын водзмöстчö: лызьöн котралö, теннисöн, волейболöн ворсö. Сьылан сямыс кö бабсяньыс вуджöма, то спорт дорö муслунсö босьтöма Сергей Анатольевич Гаевский дедсяньыс. Öд Мария Степановна томдырйиыс петіс верöс сайö спортсмен сайö. Сергей школасяньыс жö нималіс, эм сылöн 9 медаль да мукöд награда. Öнöдз котралö Эжваын марафон. Быд лун песö вир-яйсö: тöвнас лызьöн, гожöмнас сідз котралö, во гöгöр чöж киськасьö кöдзыд ваöн. Томнас тшöтш жö сьыліс клубын.

Таын и шудыс налöн. Сьылöмыс отсалö гортса уджын, челядьöс быдтöмын, сетö радлун и юкö шог. И мöд ног олöмсö найö оз гöгöрвоны. Ветымын во нин лоö, кыдзи Мария Степановна сцена вылын, лыддьыны кö школасянь. Лоö бурторйöн Помöсдінса либö Выльгортса сцена вылын кö нимöдасны-чолöмаласны.

"Унаысь ме сьывлывлі,

Йöзсянь аттьö кывлывлі".

Виктор Савинлöн кывъясыс стöч лöсялöны Степан Алексеевичлöн рöдлы.