Коми войвылын туйяслöн тöдчанлуныс век вöлі ыджыд: паськыд Коми муын колiс уналаö ветлыны, йöзыс овмöдчöмаöсь вöлi зэв паськыда, ылö ветлывлöмаöсь вöравны. Тöвнас мунлöмаöсь уджавны Уралö да Из сайö, Сибырö, Питерö да Кардорö. Эз öд весьшöрö коми йöз векджык лым сылöм бöрын ветлыны ва кузя, му туйöд, лым усьöм бöрын пуксьывлыны доддьö.
Му туйыс вöлöма зэв уна, важ олысьясыс век зiльлöмаöсь паськöдны да нюжöдны туйвезсö. Вöлöкъяс нюжавлöмаöсь абу сöмын ю пöлöн, найö пыравлöмаöсь пыдi вöрö, йитлöмаöсь ю ковтысъяс, вуджлöмаöсь мусюръяс. Со кыдзи Луздор Вась "Алöй лента" романас серпасалö вöралысьяслысь туйсö: "Кузьдав туй кажитчис зэв кузь да уна вожа пу кодьöн, кодi быттьö коркö важöн нин сулавлöма Важгорт сикт местаын, сэсся пöрлöма паськыд парма шöрö, вочасöн топалöма му бердö, вылiсяньыс тупкысьöма вöрöн. Куш вöлi сöмын дiныс. Босьтчис тайö дiныс самöй сикт шöрсяньыс, нюжалiс ыбъяс вывтi, прöйдитiс пöскöтинаяс кузя, пес керасъяс пыр. Вожъясыс — рытыв-войвылö, асыв-войвылö — заводитiсны торъявны вöрöд мунiгöн нин. Сэнi найö асьныс вожавлiсны посниджык вöр туйясö да, медбöрын, потласисны трöпаясö. И ветлiсны сэтi йöз, кыдзи ветлöны кодзувкотъяс турун пöвстö вöчöм асланыс туйясöд, — некодлы тыдавтöмöсь, ылö нимавтöмöсь. Кодзувкотъяс моз жö тэрмасисны, на моз кыскисны асланыс кумторъясö ставсö, мый сетiс налы вöр-матушкаыс. Зверь-пöтка, тшак-вотöс, пуа кöлуй, тыла нянь, весас видзьясвывса турун — уна, унатор воис Важгорт сиктö буретш тайö туйöдыс".
Быд туйлöн, туй вожлöн вöлöма аслас коми ним. Найö йитлöмаöсь сикт-грезд, ю-ты, вöр угоддьö, петлöмаöсь Комиысь Рочö, Из сайö, Коммуö, Кардорö, Йиа саридз дорö — быдлаö. Коми кывбуралысь Васютов Юрий со кыдзи гижлöма вез сяма туйяс йылысь:
"Юдор сиктъяс, тыдор грездъяс —
Коми йöзлöн оланiн.
Ветлан туйяс, быттьö везъяс,
Öшлöмаöсь ставлы ним".
Шензьы кöть эн, весиг талун, XXI нэмö, Коми Республика оз вермы ошйысьны лючки-бур му туйясöн. Каръяс костын весиг татшöм йитöдыс абу, мый нин сикткодь йылысь сёрнитны. Дерт, сардырся кадö сикткостса туйяссö лöсьöдлöмаöсь асьныс кресьтяна, земствояс та кузя ёна зiльлöмаöсь. Сöвет кадö туй паськöдан уджыс мунö вöлi тöдчымöн ёнджыка нин, кöть эз став позянасö ло вöчöма. Дай сэки матö быд ылі сиктö позьö вöлi кывтны-катны теплоходöн да лэбны еропланöн. Билет доныс эз повзьöдчы, сиктса йöзлöн зептас сьöмыс век зёлякылiс. Дерт, лючки уджалысьлöн да пенсия босьтысьлöн.
Сöвет кадсянь туйяс серти унатор вежсис лёклань: ероплан унджыклаас оз нин лэбав, теплоход-паракод ю вылысь он аддзыв, кöрт туй водзö эз нюжав. Колис му туй, но и найöс выль кадö эз нин паськöдны. Шуам, Удораöдз эм бур кöрт туй, сöмын матö став вузöссö да сёян-юансö сэтчö нуöны машинаöн, Кардор обласьтса кытшола туйöд. Гожöмнас сэнi веськыд мат, кыдзи и мукöдлаын. Майбыр, кöть нин тöвнас Кöдзыд пöль туй вöчö. Эз öд весьшöрö важöн коми йöз тöвсö ёна виччысьлыны, öд сэки вöлöн быдлаö вöлi письтан. Сёрниысь сэки кывлöмаöсь татшöмтор: "Туйыс пö вöлисти пуксьöма!" Тулыснас лым сылiгöн шогпырысь шулывлöмаöсь: "Туйыс усьöма нин!" Важся кадыс öнi бара бергöдчöма: уна сиктö да весиг гырысь карö кокниа век на веськалан сöмын кынмöм муöд-юöд.
2011 вося август тöлысьын Коми Республикалы тырис котыртöмсяньыс 90 во. Пасйим кыпыда да вель дыр. Уна гажöдантор пиысь синмö шыбитчис öтитор: некымын УАЗ-öн писькöс том йöз воöдчöмаöсь республикаса медвойвыв Вöркута карсянь лунвывса юркар Сыктывкарöдз. "Ура-а!" горзöм кылiс, нимкодь ошкöм-серам. Том йöз тундра, нюр да вöр пыр некымын лун лебёдка отсöгöн да öта-мöдöс кыскалöмöн сибöдчöмаöсь медводз Усинскöдз, сэсся сьöкыда зэв Печораöдз да вöлисти Ухта пыр юркарöдз.
Кöть видзöдлыны кö сюсьджыка, нинöм гажаыс танi абу: XXI нэмö вуджмысьт Россияса войвыв кольö лючки туйтöм. Енколаö (космосö) XX-öд нэмса 50-öд вояс пом-сянь лэбалам, да брöдниöн муöд ветлам. Татшöм "вер-мöмсö" серам выв вермасны лэптыны Суомиын да Норвегияын олысьяс, тöдмаласны кö, мый кодкö вермöма воöдчыны сiдз шусяна внедорожникöн Тромсёсянь Ослоöдз да Рованиемисянь Хельсинкиöдз. Сэнъясын важöн нин пасьтала эмöсь бур туйяс. Шуам, Финляндия вöлöм ворссьöма Мусярса мöд тышын да мынтöма уна репарация (сьöм, вузöс) Сöвет öтувлунлы, но сэсся вермöма ловзьыны да сöвмыны сiйöс вермысьысь ёна на öдйöджык. Ыджыд кыртаяс вомöн, сё ты вуджöмöн-кытшовтöмöн нюжöдöмаöсь чорыд веркöса туйвез. 1992 вося декабрын ачым ветлi Рованиемиö Мурмансксянь зэв бур шыльыд туйöд. Öти мытшöд сöмын вöлі — туйсö öт-торъя вуджалöны вöлi ас кежысь ветлысь-йирсьысь войвывса кöръяс.
Вячеслав Гайзер, öнiя Юралысь, тайöс ставсö эськö бура гöгöрвоö да веськöдлан котырным лöсьöдö Чилимдiн пыр Нарьян-Марöдз, Косланö, Усинскöдз да Вöркутаöдз чорыд веркöса туй нюжöдöм кузя уджтасъяс. Дерт, колiс тайöс вежöртны ёна водзджык. Сöмын талунъя "сöвман" тшупöдыс кыпыд кöсйöмъяснымöс öдйö пальöдö: юркарсянь лючкиджыка мунны позяс сöмын Сосногорскöдз, Помöсдiнöдз да Айкатылаöдз. Аттьö Сöвет кадлы: республикаöн сэкся коми веськöдлысьяс писькöдiсны бур туй Кировöдз да йитiсны миянöс Волга-Урал дiнмукöд. Тайö туйыс öнi пыкö да вердö уна йöзöс, тшöтш и тайö гижöд дасьтысьсö. Артмö тешкодьтор: бöръя 20 воöн эз артмы ни "Белкомур", ни бур му туй.