Сентябрын Эжва йылын котыртлісны православнöй эскöмлы сиöм кык лыддьысьöм: Кулöмдінын — Владимирскöй да Помöсдінын — Дмитровскöй.
Кулöмдінын кö кызвын сёрнитысьыс вöліны верстьö йöз — Коми наука шöринын да Национальнöй музейын уджалысьяс, вузъясын да мукöдлаын велöдысьяс, Помöсдінын чукöртчöмаяс пиын унджыкыс вöліны челядь — Кулöмдін районса школаясын, Коми Республикаса Юралысь бердын искусствояс гимназияын, Сыктыв районысь Межадорса школаын, пединститутын велöдчысьяс.
Дмитровскöй лыддьысьöмъяссö таво витöдысь нин котыртлісны, и сы кежлö дасьтöмаöсь да йöзöдöмаöсь "Бог Вас не оставит..." небöг, кытчö чукöртöмаöсь медбур туясян уджъяссö. Авторъяс пöвстын искусствояс гимназияын да Шöръягса шöр школаын велöдчысьяс, Зоя Напалкова — Кулöмдін районса челядьлöн творчество керкаысь педагог, Анатолий Смилингис — Кöрткерöс районса шöринысь содтöд тöдöмлун сетан юкöнöн веськöдлысь, Алла да Сергей Таскаевъяс — Юрий Спиридонов нима искусствояс гимназияса велöдысьяс. Водзкывсö небöгас гижöма Феликс Карманов — Дмитрий Спасскийлöн внукыс.
Дмитровскöй лыддьысьöмъяс дырйи ёнджыкасö туялöны Коми муын православиелысь да кольöм нэмын репрессияяслысь историясö, и, дерт, небöгас кызвын гижöдыс та йылысь жö — вежа Дмитрий Спасскийлöн олöм да эскöм вöсна кулöм, Немдінса, Красноборса, Йöртымдінса, Ёвкöджса вичкояслы, Уллянаса манастырлы сиöм туясян уджъяс.
Маргарита Лебедевалöн гижöдыс баб йывсьыс — Койгорт районса Кузьёль посёлокысь Эрна Георгиевна Криг (верöс сертиыс — Лебедева) йылысь.
Юлия Чувьюрова гижö Кулöмдін районса Тымсерын олысь Арнольд Данилович Кирст йылысь.
"Ставсьыс мыжаöсь Гитлер да Сталин..."
"Ставсьыс мыжаöсь Гитлер да Сталин...", — донъя-лö Эрна Георгиевна сылöн пай вылö усьöм сьöкыдлунъяссö. Криг овыс немеч кыв вылысь вуджöдсьö кыдзи "война", и войнаыс талялöма Кригъяслысь олöмсö. Кыкысь найöс ыстылöмаöсь ылі муö, первой фашистъяс нуöмаöсь семьясö Германияö, а сэсся коммунистъяс вайöмаöсь войвылö.
Эрна Георгиевналöн кывъяс серти, став сьöкыдлунсö вуджны да мортöн кольны налы отсалöма Енлы эскöм, бур вылö лача кутöм да матыссаöс, рöдвужöс радейтöм.
Эрна чужлöма войнаöдзыс на Одесса карбердса Клидендорфын, кöні овлöмаöсь немечьяс. Сэки Клидендорфыс вöлöма Польша улын, сöмын 1939 воын Молотовöн да Риббентропöн кырымалöм пакт серти пырöма СССР-ö. Кригъяслысь овмöссö кулакалöмаöсь, и налы ковмöма овмöдчыны Одессаö. 1941 вося арын Одессаö воöмаöсь фашистъяс, и налысь семьясö нуöмаöсь Германияö. Сэки семьяыс и торъялöма кык пельö. Эрналысь батьсö, Георгий Яковлевич Кригöс, пыр жö босьтöмаöсь вермахтö, ыстöмаöсь фронт вылö тышкасьны Гöрд Армиялы паныд. И тайö уна лёк вайис сылöн гöтырлы да челядьлы, кодъяс война чöжыс батракалöмаöсь бауэрлöн фермаын.
Сöветскöй Армия мездöма найöс 1944 во помын. Вермахтса салдатлысь семьясö пыр жö мыждöмаöсь. Эрналы сэки вöлöма дас öти арöс.
—Миянöс Германияысь нуисны 1945 вося Рöштво водзын, — казьтылö Эрна Геор-гиевна. — Дыр новлöдлісны карысь карö, медводз Болгарияö, сэсся Румынияö, Польшаö... Сы бöрын нин вайисны Россияö, Комиö. Зöвсьöртын куліс квайт тöлысся Эдгар вокöй, Поёлын — Лента чойöй. Поёлсянь миянöс нуисны Койдінö, а сэсянь Кузьёль спецпосёлокö. Ми кодь ыстöмаыс унаöн вöлім, и олім öти ыджыд семьяöн, пыр отсавлім ёрта-ёртлы.
Эрналöн мамыс, Маргарита Филипповна, вöлöма эскысь мортöн, и семьяныс сёйны пуксигöн лыддьывлöма кевмысьöм, и вичко праздникъясö пыр öтлаö чукöртчывлöмаöсь. Маргарита Филипповна вöлöма стрöг, кывкутысь мортöн. Сылöн нылыс казьтылö, тшыг воясö пö посёлокын йöзыс быд лун кувласисны, а öтчыд налы — немечьяслы — вайöмаöсь нянь. Ставöн горша кутöмаöсь сёйны сійöс. Ми пö, челядь, тшöтш эськö уськöдчим сёйнысö, но мам стрöга öлöдіс, энö пö.
—Ми кутім бöрдны, но мам эз лэдз, — водзö казьтылö Эрна Георгиевна. — Кор лöним, пуксим пызан сайö, Енлы кевмысим, и мам пуктіс пызан вылö кувшин. Сэні йöв вöлі, шоммыштöма нин. Ми зэв ёна кутім радлыны, кöть и эг гöгöрвоöй, мыйла татшöма чöсмöдлö миянöс мамöй. Ыджыдджык чойöй, Хильда, сэки шуис, талун пö батьлöн чужан лун. Мам содтіс, батьыд пö талун кöть и абу миянкöд, но сійö век кутас овны миян сьöлöмын. А мöд асывнас ме медводз садьми, матыстчи öшинь дорö. Ывлаын сулаліс мамöй, а туй кузя вöла-телега мунö, додь тырыс шой. Ме повзьöмöн матыстчи мам дорö, и сійö медводдзаысь ме дырйи бöрддзис. Телегаас нуисны немечьясöс, кодъяс тшыг вывсьыс сёйисны няньтö да кулісны. Мам кö эз öлöд миянöс, и ми эськö вермим кувны.
Эрна Георгиевна Германияö репатриация (казьтылö, Гитлер на пö шулöма, мый немечьяслы быть колö Германияын овны) да Комиö депортация вöсна абу и велöдчылöма. Шуö, кор пö став челядьыс велöдчисны, ме уджалі. Став öдзöсыс пö миянлы пöдса вöлі. Тöдмасьöма да кутöма ёртасьны ас кодьыс жö ныв-зонпосникöд, и найö кутшöмакö велöдыштöмаöсь грамотаас, заводи-тöма и комиöн сёрнитны. Но мамыс стрöга видзöдöма, мед и чужан немеч кывсö челядьыс эз вунöдны.
"Разöдісны миянöс..."
Россияын чужлöм немечьяслöн пай вылö усьöм сьöкыдлунсö лои венны и Арнольд Данилович Кирстлы. Тымсерын сійöс шуöны Бульдозерöн, кор посёлокас самолётъяс на лэбавлöмаöсь, сійö уджалöма аэродром вылас трактористöн. И пенсия вылас петöм бöрас дзоньталöма важ трактор да весавлöма туй.
Тымсерö Кирстъяс веськалöмаöсь 1940 воö. А 1931-öдын на налысь семьясö, Арнольдлысь бать-мамсö, ыджыдджык чойсö да ичöтджык воксö, Житомир обласьтса Андреевка грездын кулакавлöмаöсь, 1938-öдын нуöмаöсь Беломорканал вылö, во мысти — Карелияö. А кор СССР вылö уськöд-чöма Гитлер, ыстöмаöсь Комиö, фронтсянь ылöджык — немечьяс öд. Котласöдз вайöмаöсь кöрт туйöд, сэсся Эжва кузя ю йылöдзыс, Тымсерöдз, пароходöн.
—Ёна тшыгъялім. Коми кывйö öдйö велалім. Сёйны кö кöсъян — велалан, мед кужин вöлöгатортö корны, — висьталö Арнольд Данилович. — Паёкыд ичöт, да и сійöс на нажöвитны колö. А уджалім лёка, нинöм вöчны öд ог вöлі кужöй да нöшта и кöм-пасьтöмöсь. Öні ме, дерт, шензя, кыдзи вöр шöрын овны да тшыгъявны позис, сьöла-тарыд, кöчыд öд тырыс лэбалö-котралö. Но лыйны-кыйны öд эг жö кужöй. Öні ставсö тайöс велалі вöчны, ачымöс и му-кöдöс верма пöттöдз вердны. Но та могысь коліс либö пармаын чужны, либö нэмтö тані овны.
Арнольд Данилович тöдчöдö, олöм джынйöс пö "комендант улын" ковмис овны, кор весиг посёлоксьыд мунны оз позь, пышйöмöн шуасны да лыйласны. Вöр пöрöдöма и кер кылöдöма. 1949 воын бульдозер вылö пуксьöдöмаöсь. А ог пö кöсйы вöлі, пöрöдчигад öд унджык нажöвитан. Но тшöктöмаöсь.
—Разöдісны миянöс, — висьталö Арнольд Данилович аслас семья йылысь.
1942 воын арестуйтöмаöсь батьсö да ичöтджык воксö, Викторöс. Кывсьыліс пö, быттьö Вылыс Човйö нуöмаöсь да лыйлöмаöсь сэні. Во мысти висьмöма мамыс. Чойыс видзöдöма мам бöрсяыс да куим лун удж вылас абу петалöма. И таысь чойсö мыждöмаöсь, Сибырö ыстöмаöсь.
—Мам куліс, да меным кык час сетісны дзебны сійöс, — казьтылö Арнольд Данилович. — Тöв вöлі. Нывбабаяс отсалісны гöрбыльысь горт тувъявны, и ми кыским сійöс делянка сайö. Гуалім мамöс. Выльысь ветлыны сэтчö верми сöмын некымын тöлысь мысти, а гусö эг и аддзы!
1990-öд вояс заводитчигöн уна немеч муніс Россияысь Германияö. Челядьыс да внукъясыс корисны сэтчö и Арнольд Даниловичöс. Оз вöлі кöсйы, сэтчöс лавка-супермаркетыд пö меным оз ков. Тайö муас пö мамöй куйлö, тані гöтырöй менам. Но челядь вöснаыс век жö мöдöдчöма ылі муад. Во олöма да бöр бергöдчöма.
—Ветлöдлан Германияад паркті, кöні ордымъяссö галька изйöн вевттьöма. Да сэтшöм сöстöм изйöн, быттьö сöмын на мыськалöмаöсь найöс. И турун вылö кежны оз позь, — висьталö Арнольд Данилович. — А миян Тымсерын ветлы кыті кöсъян. Кутшöм нин олöм сэні миян кодь пöрысь йöзыдлы, кодъяс велалöмаöсь ставсö ас киöн вöчны. Жаль, сы мындаöн мунісны, öд Россияын кужысь йöзыд мыйта бур на эськö вöчисны.
Сы мында сьöкыдлун вуджис Арнольд Данилович, но некод вылö оз скöрав, оз лöгав. Кöть чужан муыс эз вöв сы дорö меліöн да шаньöн, Арнольд Данилович радейтö сійöс и татшöмöн.
