Кызь кык во сайын, а стöчджыка кö, Коми АССР-са Верховнöй Сöвет Президиумлöн 1990 вося октябрь 16 лунся шуöмын висьтавсьö Коми кып лöсьöдны коланлун йылысь.
Ог тöд, унаöн-ö босьтчылісны сійöс гижны, но ме ньöти нюжмасьтöг шыаси тайö шуöм вылас. Дерт, сэки эг вöзйы некутшöм кып, но пырысь-пыр гижи дивитана кывбур сы йылысь, кыдзи ми олам-вылам да кутшöм кып миянлы колö. "Коми му" газет эз öтдорт сійöс, эз повзьы да регыд мысти и йöзöдіс. Вайöда выльысь.
Коми гимн йылысь
Кутшöм гимн миян Комилы колö,
Кодыр сійö ош гуын моз олö,
Кодыр сылысь оз юавны нинöм,
Кодыр нимтöны "комъякъяс" нимöн?!
Кутшöм гимн миян Комилы колö,
Кодыр коминас сёрнитны полам,
Кодыр комиыс ланьтöма сиктын,
Кодыр ГУЛАГ-ыс Комиын дзик тыр.
Кутшöм гимн миян Комилы колö,
Кодыр абу нин варыш кодь лолыс,
Кодыр асьнымöс ог пуктöй пыдди –
Асьсö быд локтысь
ыджыдöн лыддьö.
Кутшöм гимн миян Комилы колö,
"Коми котыр" кö копырöн олö,
Кодыр комиыс лунысь-лун бырö,
И Россиялöн бöж улö пырö...
Кутшöм гимн миян Комилы колö?!
Чайта да, сэк унаöн мекöд воисны öти кывйö. Öд лои сэтшöм кад, мый ми быттьö джöмдім и эг нин тöдöй, кыдзи мунны водзö. Буретш сэки вöлі "Коми котырлöн" чукöртчылöм. Менö, дерт, сэтчö эз корлыны. Ог тöд, мый йылысь сёрни-тісны йöзыс, но кывлі: öти збой делегат лыддьöма менсьым кывбурöс. Ог жö тöд, кажитчöма-ö сійö. Гашкö на, и дивитісны да пинялісны. Но век жö, чайта, мый эз. Олöмыс вöлі буретш сэтшöм, кыдзи гижи аслам кывбурын. А мый нö вежсис бурланьыс сійö кадсяньыс? Дерт, унатор. Ог кут лыддьöдлыны. Йöзыс асьныс тöдöны, кутшöм вежсьöмъяс лоины миян олöмын.
Сэсся "Коми му" газетын вöлі йöзöдöма конкурс, медым лöсьöдны Коми Республикалы кып. Коми войтырлöн чрезвычайнöй съезд вылын юргис öти. Кывъясыс вöліны Геннадий Юшковлöн, а шыладыс Виктор Савинлöн. Но мыйлакö сійöс эз ошкыны.
Гимн вылö ассьым кывбур вöзйылі и ме. Шыладсö лöсьöдліс композитор Александр Рочев. Со сійö кывъясыс:
Шувгы, Парма, кыпыд шыöн,
Бурдöд нэмöвöйся дой.
Кыптö тэ весьтын выль кыа,
Вешйö му вылысь сьöд вой.
Коми мулы овны-вывны,
Уджöн нимöдны выль нэм.
Коми йöзлы ылöдз кывны –
Вын и вежöр сылöн эм.
Важ да выльсö нуны сьöрын,
Кыпыд лолöн овны пыр.
Выльысь, зэв дыр узьöм бöрын
Садьмö Пера-багатыр.
Конкурс йылысь юöрыс сэсся юöрöн и колис, некутшöм сёрни водзö эз мун. Но мен лои любö, мый кывбурöй некытчö эз вош. Эжваысь "Эжваса йöлöга" котырöн веськöдлысь композитор Александр Горчаков шыöдчис ме дорö да корис тайö кывбурыслы гижны содтöд сьылтас. Ме, дерт, окотапырысь вöчи тайöс. Со сійö кывъясыс:
Миян дона Парма,
Миян муса Парма,
Эн жö вошты мич.
Ов да выв, эн нярмы,
Озыр ло тэ арнас,
Кыдз нö тэнö,
Лышкыдöс, он видз?!
Мед кöть тайö кывъясыс эз лоны Коми мулы кыпöн, меным зэв нимкодь, мый "Эжва йöлöга" ассьыс быд концерт восьтö тайö сьыланкывнас. Абу öмöй тайö пыдди пуктöм?!
Но öд олöмыс мунö водзö. Оз ков вунöдны, мый миян эм дона да радейтана Коми му – Коми Республика. Öнöдз öд абу сылöн збыльысь аслас кыпыс. И со аддзи "Коми му" газетысь Гений Горчаковлысь "А, гашкö, йöзыс донъяласны?" гижöд, кöні сійö пасйö: "Энциклопедияын, Дальлöн, Ожеговлöн да Ушаковлöн кывкудъясын гижöма, мый "гимн – торжественная песнь, хвала и прославление в стихах или музыке, песнопение!" А эм-ö татшöмыс "Ылын-ылын Войвылын, джу-джыд парма сулалö. Парма шöрын варыш поз кыпыд горöн шыалö" кывъясын?
Ме сöглас Гений Дмитриевичкöд, мый пармаыс öд миян гöгöрын: лунвылын и войвылын, рытыввылын и асыввылын. "Ылын-ылыныд" – лöсявтöмтор. Кутшöм варышъяслы колö Коми мусö веськыд туйöд нуöдны да нöшта югдöдны? Веськыда шуа, туйтöм öткодялöм. Вайöда сылöн кыплысь кывъяссö, коді эз лыддьыв, мед тшöтш донъялас.
Помтöм паськыд Республика Коми,
Мича сылöн и вöр-ва, и му.
Парма гажöдö быдöнлысь ловсö,
И став войтырлöн тан кыпыд ру.
Уна сёрниа войтыр тан олам,
Öтвыв зілямö, кыдзи чой-вок.
Дзордзав, сöвмы, Республика Коми,
Вынсяв, нимав тэ уна сё во!
Дзордзав да вынсяв!
Дзордзав да вынсяв!
Дзордзав да вынсяв
Уна сё во!
Ошка Гений Дмитриевичöс кöть нин сійöн, мый мортыслы абу веськодь öнöдз важ кыпöн олöмным. Дерт, сійö некыдз нин оз лöсяв öнія кадыслы. Кутшöм нö ми кутшъяс? Кöть эськö, гашкö, öнія кадö и колö быттьö лоны кутшъяс кодьöн. А ме веськыда шуа – ми ланьтöмöн олам. Ставыс быттьö миянлы веськодь, мый гöгöр вöчсьö. "Дзордзав да вынсяв" кывъясыс оз жö нин лöсявны. Миян каръясын кöть мыйкö да вöчсьö, шуам, кыптöны выль керкаяс, найö мичаммöны. Но а кы-дзи олöны йöзыс коми сиктын? Чöв-лöнь быдлаын пуксьöма. Некутшöм удж йöзыслы абу, эндöмаöсь муяс и видзьяс. Совхоздырся паськыд ыбъяс вылын нинöм оз быдмы, гöгöр тырöма борщевикöн, кодöс некыдз оз вермыны бырöдны. Вот сійö и дзоридзалö миян помтöм паськыд республикалöн быд пельöсын.
Гений Горчаковлысь кып вылö вöзйöм кывъяссö лыддьöм бöрын меным мыйлакö окота лои öткодявны найöс "Широка страна моя родная" сьыланкывкöд. Быд гимнын, чайта, мед вöлі кутшöмкö кыпыдлун. А сэтысь ме тайöс эг казяв. Но мед, бур кöть нин сійö, мый зэв важöн кыпöдлöм сёрнисö мортыс выльысь паніс. Гашкö, донъялас гижöдсö выль синмöн да оз эновтчы сійöс водзö шыльöдöмысь. Эска, и мукöд коми гижысь босьтчас лöсьöдны выль коми гимнсö. А "Коми му" газет мед водзö нуöдö татшöм конкурссö.
Гений Горчаковлы сиа быд бурсö, мед оз дöзмы менам шуалöмъяс вылö да водзö бурмöдас ассьыс вöзйöм кыпсö.