Код тöдас, кыдзи эськö артмис олöмыс Михаил Бурдинлöн, кольччис кö Ленинградö, кöні сійö окотапырысь зілис филармонияын. Но Коммунистическöй партиялöн индöд серти сійöс ыстісны уджавны Сыктывкарö, кыпöдны искусство коми йöз пöвстын.
Ыджыд кöсйöм мунны Ленинградысь том мортлöн эз вöв. Сійö тöдіс ассьыс донсö да мöвпаліс нимавны тайö карас. Но сійö кадö партия кö шуис...
Сыктывкарын Михаил босьтчис лöсьöдны "Асъя кыа" ансамбль бердын оркестр. Öні сэтчöс музыкантъястöг "Асъя кыалöн" ни öти концерт оз овлы. Филармонияын уджалігкості Михаил Бурдин помаліс аспирантура. А Питер йылысь думыс вуніс. И öні сійö оз нин жалит, мый ставыс буретш тадзи артмис.
Тайö енбиа мортсö тöдöны оз сöмын республикаын, но и суйöр сайын. Сійö гижö сьыланкывъяс, ворсö уна музыкальнöй инструментöн, веськöдлö ансамбльöн, кöні сьылö-ворсö и сылöн Любовь гöтырыс. Эм удж, ас вынöн лэптöм керка, семья да радейтана морт. Мый сэсся, мед шудаöн лоны, колö?
Овны гозъяöн, дерт, сьöкыд удж. Кык пöв сьöкыд ладмöдчыны творческöй йöзлы. Но Бурдин гозъя öтсöгласöн олöны матö 34 во.
И кор налысь юасьöны, эн на пö öмöй öта-мöдныдлы дышöдöй — и гортад, и удж вылад пыр öтлаынöсь, вочавидзöны, радейтам пö сэтшöма öта-мöдöс да янсöдчыны здук кежлö ог вермöй.
—И век жö, сьöкыд али кокньыд уджавны öтлаын гозъялы?
—Öтарсянь, кокниджык, менам мöвпъясöй гöтырлы öдйöджык инöны да. Мöдарсянь, сьöкыдджык, сы вöсна мый матысса морт вылад он вермы личкыны, сійö вермас на и вочавидзны. Дерт, зыксьывлам, оз пыр ви-дзöдласным лöсяв да. Веськыда кö, ыджыд терпенньö колö, торйöн нин аньлы. Творческöй мортыдкöд сьöкыд. Сійö пыр кöсйö лоны медводзын. Сійö радейтö асьсö. Та боксянь гöтырöй менö гöгöрвоö.
—Тöдса, мый тіян пиныд творческöй морт жö. Кöні öні сійö, мый вöчö?
—Сійö помаліс Сыктывкарса музыкальнöй училищеын дирижёр да хор юкöн, водзö муніс велöдчыны Санкт-Петербургса консерваторияö, кодöс помалöм бöрын пырысь-пыр жö босьтісны Михайловскöй театрö тенорöн сьылысьöн. Öні сылöн вылыс категория.
—Оз кöсйы бергöдчыны Сыктывкарö?
—Оз. Веськыда кö шуны, Комиын искусствосö оз колана ног донъявны, культураын зільысь войтырöс пыдди оз пуктыны. Да, миян эм "Сыктывкарса тулыс". А сыысь кындзи мыйöн вермам ошйысьны? Гуынöсь быттьö. Гашкö, карыс ичöт да, енбиа творческöй йöзыс этша, а гашкö, веськöдлысьяслы тайö оз ков.
—Том йöзлы мый сианныд?
—Туйтö колö бöрйыны вын да сям сертиыд. А вöчан кö нин воськов, мун помöдзыс сувтлытöг, бöрö видзöдтöг, бокö кежтöг, кöть кутшöм сьöкыд оз ло. Кöсйöм, терпенньö да удача. Сэки лоö ставыс.
