Август 18 лунo Ыбса финн-йoгра этнопаркын шыаліс-гораліс республикаса национально-культурнoй отыръяслoн XI "Шондібан" гаж. Быдoнлoн лов вылас вoлі кыпыд да долыд: и сьылысь-йoктысьлoн, и видзoдысьлoн. Да и поводдяыс вoлі кивыв, шондіа да мелі тoвруа.
Йoзыс эз и уна вoв. Колян вося "Ыбица" серти ёна этшаoн локтісны. Гoсьтъяс тэрмасьтoг да лабутнoя гуляйтісны, видзoдісны сьылoм-йoктoм, номсасисны чoскыдторъясoн, ньoбалісны ас киoн вoчoмтор.
Медводз ыджыд гoсьтъясoс вочаалісны гаж нуoдысьяс Му, Ва да Шонді паськoма мича нывъяс. Найo корисны вундыны нёль гижoда кузь вoнь. Быд гижoд вoлі сиoма гажлoн юкoнлы: "Мастеръяслoн кар", "Шондібан", "Варенньo лун" да "Чужан керка". Сэсся вочаалысь ныв-зон номсoдлісны локтысьясoс нянь-солoн, юктoдісны ырoшoн. Медводдзаяс лыдын вoліны Коми Республикаса Юралысьoс вежысь Александр Буров, культураса министр Артур Рудольф, национальнoй политикаса министр Галина Габушева, Госсoветса депутат Алексей Цыпанов да Сыктывкарса администрацияoн веськoдлысьoс вежысь Валерий Козлов. Найo и восьтісны гажсo, кытшовтісны войтырсикаслысь "йoръяс" да чолoмалісны ставнысo Коми Республикалoн чужан лунoн.
Заводитісны гажсo коми йoзкостса йoктoмoн. Республикаса медся бур самодеятельнoй котыръяс сизьдісны "Коми кадриль": Визинысь "Катшасинъяс", Одыбысь "Сипертас", Паджгаысь "Зарава", Емдінысь "Сударушка", Микуньысь "То, что надо!", Зoвсьoртысь "Колорит" да Лесобаза посёлокысь "Серпантин". Сё сайo морт йoктісны oти кытшын, кыисны ёртасьoмлы да oта-мoдлы эскoмлы топыд кытш.
А тайo кадo "Мастеръяслoн карын" кыпыда вузасисны. Кодкo вoзйис пелькиник наберушка, мoд — кос турунысь чача, коймoд — сюмoдысь дозмук. Кодкo пачысь на сoмын перйoм пoжасoн вузасьo, кодкo таг вылын сулoдoм ырoшoн, кодкo маoн да кыoм-вурoм кoлуйoн, кос турунoн да тшакoн, вотoсoн да баситчан-мич-мoдчанторйoн, небoгoн... Мед сoмын сьoмыд тырмис да вoлі кытчo ставсo пуктыны.
Миян "Коми йoзoдчан керкасянь" "Ордым" лавка вузасис жo коми небoгoн. Весиг аслыспoлoс акция думыштім. Сыктывкарса коми представительствоo пырысь войтыр вайис быдсикас коми вoлoга, а ми сійoн гoститoдім сoмын коми небoг ньoбысьясoс. Гашкo, кодкo и дoзмыштіскoдь, но вывті кo нин окота номсасьны дарoвoй сола чериoн либo шыдoса шаньгаoн, колo вoлі лышкыдасьыштны "ордымсалы". Дерт, эз вывті ёна ньoбасьны, но налы, коді нуис гортас коми небoг либo диск, ыджыд аттьo.
А сынoдас кыліс ныр дэльoдана чoскыд дук: Поёлысь Любовь Чарина пуис ёртъясыскoд коми ног капуста, Абъячойысь Овик Саркисян пражитіс яй, финн-йoгра этнопаркса пусьысьяс Юрий Мозальлoн веськoдлoм улын дасьтісны плов да варенньo. Юмов номсoдланас пуктісны нёль сикас вотoс: сьoд сэтoр, турипув, сьoд пелысь да пув. Ставныслы варенньoыс адoй ёна воис сьoлoм вылас. Унаoн юасисны Любовь Чариналысь коми капуста дасьтанногсo, мый вылo востер ань быдoнлы сетіс кабалатор.
"Чужан керка" юкoнын уджалісны национальнoй автономияяс: украинеч да белорус, немеч да армяна, чуваш да чиган, татара да азербайджана. Коми керка дорын асланыс кужoмлунoн ошйысисны Сыктывкарса коми представительствоo пырысь войтыр. Орччoн сулалісны "Русь Печорская" да "Изьватас" котыръяс. Тані юргис уна сикас войтырлoн сёрни, шылад, сьылoм да ворсoм. Унаoн вайoмаoсь быдсикас сера кыoм носки-кепысь, национальнoй паськoма акань, серпас да ас киoн вoчoмтор. Национальнoй автономияясса войтыр тшoкыда аддзысьлывлoны гажъяс вылад, бура тoдoны да пыдди пуктoны oта-мoднысo. Сідзжo и тайo "Шондібаныс" oтувтіс ас борд улас бур ёртъясoс, кодъяслы эм мый йылысь сёрнитны, юксьыны oта-мoд-кoд вермoмъясoн да тoжд-могъясoн.
Этнопарклoн юркеркаын тшoтш пуис удж: тані нуoдісны мастер-классъяс. Oти пельoсын велoдісны идзасысь да сюмoдысь кысьыны, мoдлаын йoзкостса инструментoн ворсны. Коми Республикаса заслуженнoй уджалысь Александр Ветошкин тoдмoдіс сигудoкoн, пoлянoн да чипсанoн, а нoшта на и висьталіс, кыдзи найoс дасьтoны.
Волісны кыпыд гаж вылo и Удмуртияысь "Арганчи" аньяслoн гудoкoн ворсан котыр да Вoлoгдаысь "Мастер-класс" шоу-дуэт. Воддзаясыс сьoлoм бурмытoдз йoктoдісны. А кутшoм мичаа сьылoны! Вoлoгдаса зонъяслы сувтoмoн клопайтісны. Кыкнан котырыс ассьыныс сямсo петкoдліс филармониялoн концертасян залын, кoні петкoдчисны и Виктория Пыстина да "Зарни ёль" котыр.
Шуoны тай, кутшoм сьoлoмoн пo локтан гажoдчынытo, сідзи и коллялан кадсo. Дерт, коді виччысис да корсис "Шондібансьыс" сoмын нелючки, сійoс и аддзис. А кыпыд лола мортыд весиг гажтoмтo югзьoдас. Быдoн донъяліс тайo чукoртчылoмсo ас ногыс. Меным тай долыд-а. Сoмын мoдысь Ыбса этнопаркo ог уджавны мун, а семьяoн шойччыны. Oд тані збыльысь лoсьыд!