Вит во сайын Льöмъюын воссис пляж. Медым сэні купайтчыны-гожйöдчыны, колö вештыны сьöм. Юркарса олысьяс окотапырысь ветлöны шойччыны. Мукöдлаын дорысь сэні юыс да лыаыс сöстöмджык. Но Льöмъюса турбазаын олысьяс дöзмöмаöсь нин. Майшасьöны, лыа вылын шойч-чысьяс пö тыртöны лöп-ёгöн миянлысь йöръяс.

Потшисны гортö мунан туй

—Льöмъюö пыран туйсö потшöмаöсь, колö вештыны 50 шайт, водзö ю дорö мунöмысь 100 шайт нин колö сетны. Пыжöн ветлöмысь да мукöд услугаысь колö жö мынтысьны. Весиг асмогасянінö сьöмтöг оз лэдзны. Со и шойччыны волысьяс куст улö котралöны. Став вöрсö нин пежалісны. Гöгöр лöп-ёг, пластик сулея да трусик-лип туплясьö. Купайтчан сезон помасьöм бöрын тані некод нинöм оз идрав-пелькöд, — скöрысла пузьöма Льöмъюса турбазаын олысь ань (газетö снимайтчыны эз кöсйы, полö, пляжса кöзяиныс пö пуж петкöдлас).

Льöмъюса олысьяс дöзмöмаöсь и сыысь, мый асланыс гортö оз вермыны веськавны. Туйвежсö потшöмаöсь да, быд пöрйö колö паспорт петкöдлыны, медым гортад лэдзасны.

—Рöдвужöй оз жö вермыны миян дорö пырны, вештысьны тшöктöны, — водзö висьталö ань.

Скöрмöмаöсь Льöмъюса олысьяс тшöтш и сыысь, мый шойччанінöн веськöдлысьыс абу лöсьöдöма машина-автобуслы торъя сувтланін. Гож-йöдчыны-купайтчыны волысьяс ассьыныс "кöрт вöвъяссö" сувтöдöны кытчö веськалö. Олысьяслöн висьталöм серти, найö весиг асланыс керка дорö оз вермыны сибöдчыны.

—Ми öд ог корöй шойччанінсö тупкыны, — шуö ань. — Но восьтін кö, бура дöзьöрит. Лöсьöд машинаяслы торъя сувтланін, а эн керка йöрöдз лэдз, сувтöдав лöп-ёг чукöртан контейнер. Да эн потш миянлысь, Льöмъюын олысьяслысь, ветлан туйсö.

Зыксьыны ог кöсйöй

Ми шыöдчылім Льöмъю шойчча-нінöн веськöдлысьяс дорö, збыль-ö ставыс сідз, кыдзи висьталöны турбазаын олысьяс. Кыдзи пасйис пляжса ад-министратор Артём Пронин, найö оз кöсйыны зыксьыны сэтчöс олысьяскöд.

—Гортас локтысьяслысь сьöм ог босьтöй, — эскöдö Артём Пронин. — Дерт, машинасö сувтöдам да юалам, мый могысь воисны. Паспортсö прописканас видзöдлам да лэдзам дон босьттöг.

—А на дорö воысь рöдвужлысь, гöсьтъяслысь коранныд?

—Ог жö. Медым сöмын водзвыв висьталасны, мый на ордö воласны гöсьтъяс. Ми пыр дасьöсь сёрнитчыны. Сэсся и Льöмъюö эм мöд пыран туй, сэні шлагбаум оз сулав.

Артём Пронинлöн кывъяс серти, Льöмъюын олысьяс вермасны пырны купайтчыны-гожйöдчыны дон вештытöг. Дерт, бара жö колö паспортöн локны, кöні пасйöма пропискасö.

Пасйис тшöтш, мый шойччанінсö найö идралöны-весалöны быд лун. Öтчыд вежоннас пелькöдчöны машинаяс сувтöданінын. Дерт, быд куст ув оз весавны.

—Чайта, йöзыслы аслыныс колö сöстöмджыка овны, быдöн бöрся видзöдны ми ог вермöй, — шуис Артём Пронин.