Кольöм Ыджыд войналöн биын сотчисны уна миллион морт. Кымын во нин колис вир кисьтана тыш-коссяньыд, но помнитам на сійö лёксö, кодöс вайис став мирлы Гитлер.
Ми пыр мöдам казьтывны ассьыным Айму дорйысьясöс, тылын уджалысьясöс, кодъяс дорисны да матыстöдісны Победасö.
Комын квайт во и олöма Сыктывдін районса Паль сиктса олысь Василий Георгиевич Ермаков. 1942 вося июнь 24 лунö доброволечöн мунöма фронт вылö. Усьöма вöрöглы паныд тышын 1944 вося февраль 26 лунö. Пöгибнитöм бöрас гортас часьтсяньыс ыстöмаöсь "сьöд" юöр, верöснытö да батьнытö пö дзебим Псков обласьтса Байкино грезддорса братскöй гуö...
Сотчöма войналöн биын Пальысь петлöм воин. Но кольöма сы йылысь бур паметь. Кольöмаöсь и письмöясыс, кодъясöс сійö ыстывлöма гортас муса гöтырыслы, Надежда Андриановна Ермаковалы.
Неважöн миян редакцияö пыраліс Василий Георгиевичлöн нылыс – Эмилия Васильевна. Тöдмöдіс батьыслöн фронтöвöй письмöясöн. Сэтысь тыдовтчö, кутшöм ыджыд сьöлöма йöз дорйöмаöсь миянлысь Аймунымöс, кутшöм падмöг-мытшöд налы ковмöма венны, кутшöм ёна найö радейтлöмаöсь гортсаяссö да матыссаяссö. Тöдöмысь, ок и сьöкыд комын квайт арöснад сетны ловтö, но Василий Георгиевич Ермаков повтöг воськовтöма свинеч шерыдлы паныд...
Мортыс важöн нин абу ловъя, но фронт вывсянь письмöяссö лыддигöн гö- гöрвоан, мыйла Гитлерлы сідз и эз мойви вермыны Сöвет странаын олысьяссö, мыйла Ыджыд вой- наас вермим ми, а эз фашистъяс.
Медводдза письмö...
"Видза олан, Надя!
Ыста фронтöвöй ыджыд привет ставлы: Володялы, Валерийлы, Эммочкалы, Алялы да Люсялы! Сэтшöм жö ыджыд привет ай-мамлы, став рöдвужлы да соседъяслы: Иван Александровичлы да Андрей Фёдоровичлы, Андрей Александровичлы, Егор Михайловичлы, Прокопий Васильевичлы, Николай Александровичлы, Танялы да мукöдъяслы!
Ме, кыдзи аддзанныд, öнöдз ловъя да здоров. Сулалам оборонаын. Немеч öні ёна рам. Но зырам найöс сэк, кор тшöктасны командиръяс. Тані, армияын, тшöктытöг нинöм оз вöчны. Ставыс бур, но сöмын öтитор лёкджык —– сетісны ыджыд удж. Менö индісны батальонын парторганизацияса секретарöн. Строевöй занятиеясысь эськö мездісны, но пыр кок йылын, ёна лоö ветлöдлыны ротаясті, взводъясті. Дерт, и важöн партийнöй уджтö нуöдлі, но мыйсюрö вунöді нин. Да сэсся гражданскöйыд век жö торъялö военнöйсьыд.
Миян батальон – танково-истребительнöй. Миян мог—кутны да бырöдны немецкöй танкъяс. Та вылö эмöсь аслыснога зэв эбöса ружьеяс.
Асьным олам землянкаясын. Сёйöм-юöм серти ола бура. Сöмын тöвся кынмалöмъясыд ёна тöдчöны. Кок пыдöсöй емалö, тшöкыда висьö юр да мучитö насмука. Дерт, тайö кага висьöм. Но, сідзсö, здоров, ошйысьны да элясьны ог кöсйы. Фронтвывса олöмыд абу кокньыд, вичмылö быдторйыс—– и кынмалöм, и тшыгъялöм. Глав-нöйыс, медым юрыд уджаліс и синмыд сюся дзоргис.
А кыдзи ті оланныд? Кутшöм здоровьеныд? Ме кывлі, мый таво урожайыс абу лёк. Тані эмöсь Комиысь кыкöн: Веслянаысь Катаев да Ручысь Холопов. Пальсаöс уна тöлысь нин эг аддзыв. Тöндзи госпитальын вöлöма Сотчöмвывса Кузь Вань, но эг су, ыстöмаöсь мöдлаö.
Володя да Валик, кöнкö, ыджыдöсь нин да отсасьöны-уджалöны колхозын. Колö, колö отсасьны. Гожöмын кö ньылöдлан, тöлын лоан пöт. Сэсся бур уджнад фронтлы отсаласны, медым батьясыс öдйöджык бергöдчасны гортаныс.
Надя! Войнаыд вермас регыд помасьны, но сöмын сэк, восьтасны кö союзникъяс мöд фронт. Тайö кö лоö, сідз и тöдöй, Гитлерöс нырасны тöлысь-мöдöн.
Со öні босьтісны Харьков. Миян пыр мунöны водзö. Немечыд абу нин важыс. Ёна нин пыркöдісны сылысь буссö.
Ме, Надя, тöда, кутшöм сьöкыд тэныд овны вит лов челядьöн. Коркö кö вола гортö, олöмтö кокньöда.
Но мый сэсся? Бурдіс эз бать? Кыдзи олö мам? Надя, кыдз мый верманныд, чукöртöй ягöд, тшак, идралöй град выв пуктас. Ставыс сёян вылö мунас. Верманныд кö, — мöстö видзöй...
Надя, кöть кутшöм абу сьöкыд, Володяöс да Валикöс велöдчöмысь эн дугöд.
Со менам и ставыс. Кутла ставнытö.
Егор Вась Ермаков
1943 вося ноябрь 7 лун."
Мöд письмö...
"Оланныд-выланныд, Надя!
Медводз привет став челядьлы, ай-мамлы, мöдкеркасалы, рöдвужлы.
Талун декабрь 25 лун. Став тайö кадсö вöлі передöвöйын, гоз-мöдысь вöлі наступлениеын. Кокöй ранитчыліс осколокöн, öні на чота да висьö. Талун петім шойччыны. Гашкö, лун дас, а то и тöлысь шойччöдасны. Тайö кадас вель сьöкыд вöлі. Кымынкö сюрс мина да сняряд и потласис жö! Бойясын бура участ- вуйтöмысь командование представитіс к "Ордену Красного Знамени" наградаö. Гашкö, тайö лунъясас сетасны.
Медаль эз на жö вичмы. Гижа ывла вылын, кöдзыд, ки-кокöй кынмöны. Кодъям землянка — гижа выльысь.
Ті сэсся асьныд гижöй татшöм адрес кузя:
Полевöй почта 92814 Д.
Кута виччысьны. Гижöй выльторъяс. Кыдзи оланныд? Велöдчöны-ö Володя да Валик?
Ставнытö кутла да окала.
Егор Вась Ермаков
25.12.1943 во."
И коймöд, медбöръя...
"Оланныд-выланныд.
Важöн нин кöсйи гижыштны, но пыр эг слöймы, пыр туйын. Сöмын öні коймöд лун олам öти местаын да гижышта гугöдöм пöрт вылын. Öні ми бара нин фрицъяссянь неылын, передöвöйын. Кокöй бурдіс, сöмын неуна висьыштö на. Ветла бура нин, кык лунöн мунім 50 километр.
Но ставлы ыджыд привет да поклонъяс—тіянлы ставлы, ай-мамлы, мöдкеркасаяслы.
Ме вöсна эн майшасьöй. Немечöс вöтлам,—локтам гортö. Дивö! Быд вой вöтö усьлö Паль. Весиг öтчыд гортö пыралі да сёрниті Надякöд, челядькöд.
Но кыдз-мый оланныд Пальын? Мый выльыс? Ловъяöсь-ö ставöн? Кöсъя унатор гижны, но нинöм юрö эз кут пырны. Велöдчöны-ö Володя да Валик? На вöсна медъёна майшася. Видзанныд-ö мöснытö? Бурджык новлöй лёк паськöм, но мöстö кыдзкö тöвйöдöй!
Войнаыд регыд нин помасяс, помыс тыдалö нин. Терпитыштöй нöшта неуна, и ставыс лоас бур. Олöй лючки, быд сöрысьяслы эн эскöй. Миянлы öд тані сьöкыд жö. Коркö быдса дас лун бур васö эг ад-дзылöй, сывдылім лымсö да тадзи веськöдім горшнымöс. Олам му пиын, уна кöдзыд вой узим лым вылын. А öд ог няргöй, терпитам.
Талун 1944 вося февраль 23 лун. Матö кызь тöлысь гортысь бокын.
Ме öні ротаса старшина. Верда, кöмöда, пасьтöда рота. Дерт, сьöкыд, но мый вöчан.
Гижöй асьныд. А ми кутам бурджыка тышкасьны.
Кута да окала ставнытö.
Менам адресöй татшöм: полевая почта 14021 П.
Егор Вась Ермаков
23. 02. 1944 во."
* * *
Тайö воинлöн бöръя письмöыс. Куим лун мысти нин Василий Георгиевич Ермаков усьöма Айму вöсна тышын.
Редакцияö пыралігас нылыс, Эмилия Васильевна Ермакова, висьталіс, мый батьыс войнаöдз вöлöма партийнöй удж вылын. 1937 воын ВКП(б) Изьваса райкомын на зілигöн веськавлöма репрессиялöн изки костö, но сяммöма бергöдны ассьыс бур нимсö. Война заводитчöм бöрын Василий Георгиевич Ермаков мыйкö дыра вöлöма "Вöрлэдзысь" газетса корреспондентöн. Фронт вылö мунтöдзыс недыр уджалöма Пальын "Ударница" колхозса председательöн...
Со татшöмöн вöлöма тайö мортыслöн олан туйыс. Мед жö некор оз вушйы йöз паметьысь сöветскöй воин, Паль сиктысь петлöм морт Василий Георгиевич Ермаков.
