Велöдöм йылысь федеральнöй оланпас серти сиктса педагогъяслы, детсадса кагульничаяслы, тшöтш и пенсионеръяслы, кодъяс 10 воысь дырджык уджалісны сиктын челядькöд, вештöны оланінысь, биысь да шоныдысь-пескысь рöскодсö. Сійö водö регионъяслöн пельпом вылö. Сідзжö регионъяслы сетісны позянлун вичмöдны сиктса школаын да детсадйын уджалысьяслы содтöд отсöг. Торйöн кö, бергöдны сьöм мукöд коммунальнöй услугаысь, тшöтш и ваысь да биаруысь, оланін дöзьöритöмысь да дзоньталöмысь.
Комиын сиктса велöдысьяслы став тайö отсöгыс вичмöдсьö жö 2011 вося январь 1 лунсянь. И сэксянь жö кокньöдöн татшöм вöдитчысьыс содіс 13 пöв. Республика аслас казнаысь вештіс велöдысьяслысь рöскодсö 251 миллион шайт (2010 воын – 22 миллион). Сэтысь 227 миллионысь унджыксö (90 прö-чентсö) – сиктсалы. Республика корсьö позянлун отсавны налы. Сідз, Комиын олысьяслы социальнöй отсöг сетöм йылысь оланпасö пыртöма вежсьöмъяс, и на серти тавосянь кокньöдсö вичмöдöны и велöдысьяслы, кодъяс воштісны уджсö да пасйысьöмаöсь уджöн могмöдан шöринын. А сійö жö пескысь либö из шомысь сьöмсö велöдысьяслы бергöдöны урчитöмасьыс матö 4 пöв унджык.
Но социальнöй юкöнын зільысьяс лыддьöны, мый кокньöдöн вöдитчысьяс пиысь унаöн вывтіасьöны. Биöн вöдитчöм кузя некутшöм норма абу, и вештысьöны ставсьыс, мыйта видзöма. А кодсюрö видзö бисö тöлысьнас оз öти сюрс шайт дон. Та йылысь пасйöма мынтысян квитанцияясын. Сідз, Чилимдін районын ас керкаын олысь велöдысьлöн нёль морта семья таво апрельын бисö видзöма 55 сюрс сайö шайт дон. Сэтысь жö куим морта мöд семья бисö каттьöма 3.231 шайт дон, а пескысь налы бергöдöмаöсь 19.200 шайт. Сідзкö, бисö видзöны некутшöм мератöг, и, тыдалö, югзьöдöны оз сöмын олан жыръяс, но и пывсян, гараж, теплица, сарай, скöт видзанін... И, вермас лоны, шонтысьöны. А сідзкö, и кык пöвстаöн вöдитчöны öти и сійö жö кокньöднас. Социальнöй юкöнын зільысьяслöн кывъяс серти, овлö, и документъясöн ылöдчöны да вайтöм пескысь корöны сьöм. И сиктса велöдысьяслöн татшöм вывтіасьöмыс паныдасьлö пыр тшöкыдджыка.
Менам эм жö тöдса велöдысь. Гортас быд жырйын ломзьö би, весиг асмогасянінас да кильчö помас лампочка öзйö лун и вой, сулалöны электрообогревательяс, телевизорсö, компьютерсö да магнитофонсö пöшти оз и кусöдлыны. Электричество отсöгöн качайтöны ва и пусьыны, и пывсьыны, и песласьны, и скöтсö юктöдны. Кöть эськö шорыс орччöн визувтö. А гожöмнас град выв пуктас киськалöны. Жар поводдяö лунтыр бергалö электролейканыс. Майбыр, оз пö ков аслад зептысь вештысьны, сідзи и шуöны.
А орччöн накöд олö пöч, кодлöн некутшöм кокньöд абу. Пенсиянас и бергöдчö. Чукöртö зэра ва, ветлöдлö юкмöс дорö вала чай пузьöдны да шор дорö кöзасö юктöдны. Паськöмсö ки помсьыс песлалö, машинаад пö ваыс уна колö, да и бисö каттьö. Оз убöлит унджык видзны бисö да, кор дзикöдз нин пемдас, сэк öзтысьö. Тöвнас ломтысян пач югыднас олö. Кысьö-печкö луннас öшинь дорас. Телевизорсö пемыдінын видзöдö.
А мыйта сиктын семьяыс, кодлöн нажöткаыс ичöт (велöдысьясыд абу на медгöль йöзыс сиктад), а кокньöдыс абу? Мынтысьöны асьныс и биысь, и биаруысь, и пескысь да оз лысьтны лишнöй сотны ни би, ни газ, ни пес.
Государствоным, дерт, озыр, позьö сійöс и пайкыштны. А мый туй дзоньтавны, детсад-школа да бурдöдчанін стрöитны, кусöдчан машина да "скорöй" ньöбны сьöмыс оз лишав, веськодь...