Коми Республикаса Юралысь бердын искусствояс гимназияса велöдысь Жанна Сизева — водзмöстчысь да зіль морт. А нöшта на и енбиа. 2007 воын Москваын нуöдöмаöсь "Чужан кыв медбура велöдысь" став Россияса медводдза на конкурс."Велöдысь-туялысь, велöдысь-выляс нырччысь" юкöнын Жанна Генриховнаöс донъялöмаöсь медвылö.
Комиын "2009 вося медбур велöдысь" конкурслöн "Инновации в национальном образовании" нимпасын сійö бара босьтöма первой места. 2008 воын Россияса велöдöм кузя министр А.А.Фурсенко сетöма сылы аттьöалана письмö. А почёт грамотаыс лыдтöм...
Велöдысь рöдысь
—Енмыс, буракö, водзвыв индöма меным олöмас тайö туйсö. Миян рöдын уна велöдысь. Елена Николаевна пöчöй нэм чöжыс школаын зілис. Батьлöн вокыс, Юрий Дмитриевич Уляшев, вöлі Комиын йöзöс велöдöм кузя министрöн. Мамöй, Альбина Ивановна, нелямын воысь дырджык зілис Кулöмдін районысь Выльгортса школаын, — висьталö Жанна Генриховна.
Кор Жанна быдмыштöма, нуöдöмаöсь детсадйö. Но сэтчö сійö ветлöма дзик öти лун. Абу кажитчöма, зэв пö гажтöм. И лун бöрся лун сэсся коллялöма школаын мамыслöн урокъяс вылын. Нывка водз заводитöма лыддьысьны-гижны. И первой классын сылы бара лоöма гажтöм. Ныв-зон нускöны парта сайын, а сійö ставсö нин тöдö. Мамыс сэсся шуö вöлöм, Жанна, отсав пö ёртыдлы артасьны да гöгöрвоöд, мыйла колö буретш тадзи гижны...
Лызьöн котралöма
1984 воын Помöсдінса шöр школа помалöм бöрын пырöма Сыктывкарса государственнöй университетлöн коми отделениеö. Велöдчыны ёна кажитчöма. Но...
Жанна коймöд классянь котралöма лызьöн. И, колö шуны, быд ордйысьöмын асьсö бура петкöдлöма. Весиг и Сыктывкарын сійöс казялöмаöсь. Öтчыд вöзйöмаöсь ичöт калибра винтовкаысь пасö лыйлыны. И ветымынысь сылöн öкмöма нелямын öкмыс очко! Тренерыс весиг акнитöма. Тадзи Жанна веськалöма биатлон кузя нывъяслöн республикаса сборнöйö. Вит во сэні тренируйтчöма да ордйысьöма. Тренернас вöлöма Татьяна Гвардина. Мастерö кандидат нимсö шедöдöм могысь öти(!) секунд абу тырмöма.
—Уна нималана спортсменкöд мойвиис öтлаын лызьöн котравны. Казьтышта Василий Рочевöс. Пыр нимкодяси Раиса Сметанинаöн. Некымынысь вöлі сылöн музейын. Сэні зэв уна быд сикас медаль-кубокыс. Юрö пыр вöлі воö гуся дум, ок эськö, мися, и меным кö тадзи жö ордйысьны! — казьтылö Жанна Сизева. — Но воис кад бöрйыны: ыджыд спортö нырччыны али коми кыв велöдны. Нималана учёнöй да коми кыв туялысь Евгений Александрович Игушевысь пышъян öмöй! Тадзи и бöрйи велöдысьлысь ордымсö. И ыджыд аттьö Евгений Александровичлы туйдöм-ышöдöмсьыс...
1990 воын Жанна Генриховна заводитöма велöдны Коми Республикаса Юралысь бердын искусствояс гимназияын. И öнöдз сэні уджалö. Таысь öтдор дас öкмыс во нуöдö нывъяслöн юркарса гимназияын коми кыв урок. Велöдысь йылысь, чайта да, медбура висьталöны став Россияса да республикаса конкурcъясын сылöн вер-мöмъясыс.
Содтöд тöдöмлунла —суйöр сайö
—Лыддя, аслыс велöдысьлы колö пыр водзö сöвмыны. Сэки и уроктö мöдан бурджыка нуöдны, и челядь окотапырысь кутасны велöдчыны. 2000 восянь велöданног сöвмöдан республикаса институтын юкся кар-районысь педагогъяскöд аслам тöдöмлун-сямöн. А таöдз помалі велöдысьяслысь тöдöмлун сöвмöдан Удмуртияса институтын аспирантура. Гижи "Организация обучения коми языку как государственному" кандидат ним вылö диссертация. Дасьта 8-öд да 9-öд классъяслы коми кывйысь небöгъяс, найöс йöзöдасны да, сэки и дорйыся, — висьталіс Жанна Сизева.
Сійö ачыс пыр зільö босьтны содтöд тöдöмлун. Сідз, кыкысь велöдчöма Финляндияын. Öтчыдысьсö М.А. Кастрен нима котыр чукöртлöма велöдчан небöг дасьтысьясöс, мöдысьсö финн-роч школалы отсöг сетан котыр нуöдöма "Двуязычное воспитание в детском возрасте" семинар. Таысь öтдор "Велöдöм" нацпроект серти кывзöма "Основы педагогического мастерства" курс, велöдчöма "Использование мультимедийных технологий в языковом образовании" да "Обучение для будущего" уджтасъяс серти...
—Выль учебникъяс дасьтан уджö босьтчыны ышöдіс велöданног сöвмöдан республикаса институтын уджалысь Любовь Моторина. Вöзйис лöсьöдны 5-öд класслы небöг. Сэки институт бердас вöлі учебник дасьтан шöрин. Сьöлöмсянь эськö зіли, но йöзöдны эг удит — шöринсö тупкисны, — казьтылö Жанна Генриховна.
И век жö Галина Ватамановакöд да Елена Ярошенкокöд öтвылысь дасьтöмаöсь да йöзöдöмаöсь 5-öд класслы "Шонді нюм", 6-öдлы — "Маръямоль", верстьöлы "Рöмпöштан" учебникъяс, а сідзжö 5-9-öд классъясын коми кыдз государственнöй кыв велöдан программаяс.
Жанна Генриховна нюммуніс, учебник дасьтöмыд пö мыр бертöм кодь. Уна пöсь лоö кисьтны, но олöмыс водзö мунö, и воö кад выль небöг нин лöсьöдны. Сідз, Финляндияын быд куим во мысти выль учебник лэдзöны.
Енлы эскö
Кулöмдін сиктö пыранінын сулалö ыджыд крест. Сійöс аслас сьöм вылö Сыктывкарын вöчöма, юрсиктö вайöма да сувтöдöма Жанна Сизева. Сідзжö сійö нуöдöма Кöрткерöс районысь Визябöжса челядьлöн православнöй лагерын коми кыв кузя урок. А мыйла заводитöма эскыны Енлы?
Кольöм нэмса 90-öд вояс шöрын тайö вöлöма. Апрель 1 лунö Сыктывкарса да Воркутаса епархиясянь звöнитöмаöсь велöдысьлы гортас. Гашкö пö, босьтчанныд коми кывйö велöдны Енлы эскысьясöс? Сійö нюмъялö:
—Чайті, шмонитöны, апрель 1 лунö шыöдчисны да. Аскинас муні епархияö. Збыльысь, вöлöм, шыöдчöмаöсь. Некымын тöлысь сэсся велöді коми кывйö Сыктывкарса да Воркутаса епископ Питиримöс, Филипп айöс да мукöдöс. Сійö кадсяньыс накöд ёртася.
Жанна Генриховна нёльысь нин ветлöма Анапаса православнöй лагерö. Асывнас, дерт, вичкоын служба, лыддьöны молитва. Луннас саридз дорын гожъялöны да шойччöны. Рытнас бара служба. Таысь öтдор лагерас сійö котыртлöма коми лунъяс. Сэки молитвасö комиöн лыддьöмаöсь. Öтчыд владыка Питиримкöд службасö öтвылысь комиöн нуöдöмаöсь. Сійö висьталіс, мый епископ радейтö сьывны "Коми ань" да "Алöй лента"...
Йöрас маръямоль дзоридзалö
—Кадыс ньöти оз тырмы. Быттьö и водз чечча, сёрöн вода, но... Быд рыт урокъяс кежлö дасьтыся, выль учебник вылын уджала, сэсся и пусьыны-пöжасьны, песласьны колö, горт гöгöрын мукöд удж вöчны, — висьталіс велöдысь. А сэсся содтіс: — Сы пыдди дачаын шойчча.
Позьö кö, дерт, сэні зільöмсö тадзи шуны. Сылöн дачаыс — 15 "сотка". Жанна Сизева ёна радейтö дзоридзьяс. Йöрас быдмö нарцисс, тюльпан, ландыш, флокс... Лым сылöмсянь да усьтöдзыс найö гажöдöны, мичмöдöны дачасö. Но медся уна пö маръямоль — матö ветымын куст öттшöтш дзоридзалö. Автобус сувтланінöдз юртö кольмöдана кöрыс воö. Йöзыс пö автобусысь петöны да Сизевъяслöн потшöс дорö матыст-чылöны... Этатшöм мичыд быдöнлы сьöлöм вылас воö.
Кольöм во арнас Жанна Генриховна аслас дача йöрын быдтöма 150 ведра картупель, 6 мешöк морков, 3 ме-шöк свеклö, кык ыджыд теплицаын — öгурцы да переч...
А нöшта велöдысь ёна радейтö вöр-ва. Арнас окотапырысь вотчö. Майбыр, ачыс машинаöн журъялö-ветлö. Ёртъясыс висьталісны, öти луннас пö сійö вит ведра(!) турипув вотлö. Сиктын быдмöм мортыд та боксянь зэв зіль да сюсь.
И урок вылын гудöкасьö
Витöд классын велöдчигöн Жанна "висьмöма" гудöкöн. Помöсдін сиктын быд ыджыд кöть ичöт праздник дырйи мужикулов век вöлöм дзажгöны-ворсöны. Со и "сирасьöма" мамыс дорö, ньöб пö меным гудöк. Альбина Ивановна заводитлöма эськö пыксьыны, нывъяс пиысь пö некод тай оз гудöкась, öтнад со ыззьöмыд. Да и сы сайысь тэ пö он и кут тыдавны. А тадзи и вöлöма. Жанна коркö öтчыд киас ворсансö босьтöма да сöмын юрыс муртса и тыдыштöма. Но медся ыджыд помкаыс, дерт, вöлöма мöд — сиктса лавкаын гудöкыс сэки вöлöма 70 шайта. Велöдысьлöн тöлысся удждоныс буретш та мында. И век жö бать-мамыс ньöбöмаöсь гудöксö нывлы.
—Во чöж велöді "Во поле берёза стояла" сьыланкыв. А код дорö ме, ичöт нывка, шыöдча? Мужикулов дорö матыстчыны ог лысьт. Но век жö велалі. 70 шайттö öд тöв йыв он шыбит. И талун урок вылын гудöктö тшö-кыда киö босьтла, и праздник дырйи окотапырысь ворса, — висьталö Жанна Сизева.
Гудöкасьöма и аслас кöлысь дырйи. Чукöртчöмаöсь жöник-невеста, ныв-зон да налöн бать-мам юркарса öти кафеын. Но пластинка шылад улын йöктыны кыдзкö гажтöм. Сэки и еджыд платтьöа невеста босьтöма киас гудöк да сэсся рытывбыд ворсöма, гöсьтъяс — гажöдчöмаöсь-йöктöмаöсь.
А гитарасö киас медводдзаысь босьтöма СГУ-ын. Кыдз ачыс шуис, студентъяслöн пызан сайын гажöдчиг-сьылігöн пö и велалі ворсны.
* * *
Шулöны тай, миян аньыд пö и ыпъялысь керкаысь пикö воöм мортöс петкöдас, и рöдтысь вöлöс сувтöдас... Кыдз аддзам, таысь öтдор на сійö и челядьöс велöдö, и небöгъяс дасьтö да уна мукöдтор вöчö.