Та ыджда котырнас Войвыв кöрт туй вöсна кывкутысьяс республикаö важöн нин эз волыны. Тайö лунъясö найö кырымалісны миян правительствокöд сикт-каръясö 8 поезд лэдзöм йылысь сёрнитчöм. А воторникö и Комиын олысьяс вермисны шыöдчывны на дорö асланыс юалöмъясöн Коми Республикаса Юралысьлöн общественнöй приёмнöйын "веськыд йитöда" телефон пыр. Мый жö майшöдлö кар-районъясын олысьясöс?

--Воркутаысь Кристина Богомолова юаліс, мыйла абуöсь 3 да 5 тонна груз новлöдлан контейнеръяс.

Миянлы вöзйöны нуны эмбурнымöс 20 тонна груз новлöдлан контейнеръясын. А найö тöдчы-мöн донаджыкöсь, — норасис ань.

Но транспортöн могмöдан войвыв шöринöн веськöдлысь Андрей Си- доров эскöдіс, мый Воркутаын 5 тонна груз новлöдлан контейнерыс тырмымöн.

—119, — стöчмöдіс сійö. — Матысса кадö воас нöшта 65. А йöзсянь шыöдчöмыс талун кежлö сöмын 46. Мукöд карын татшöм контейнерыс эм жö. Но найö вочасöн важмöны-жугласьöны, а Россияын важöн нин оз лэдзны ичöтджык груз новлöдлан контейнерсö. Да и мукöд странаын вöдитчöны сöмын гырысьджыкнас. Воас кад, кор дзикöдз ковмас вуджны татшöм вылас. Ми кутам чукöртны некымын мортлысь грузсö öти ыджыд контейнерö либö нуны-вайны пöдса вагонöн.

Некымын морт норасис вах-тöвикъяс вылö, кодъяс поездын дöзмöдчöны вина юöмöн, овлö, и тышкасьöны, да корисны котырт-ны вагонъясын пöрадок.

—Кольöм во поездысь чеччöдісны вина юöм понда 384 мортöс. Ми кутам сёрнитны та кузя уджöн могмöдан предприятие-организацияясöн веськöдлысьяскöд, медым новлöдлыны вахтöвикъясöс ыджыд котырöн да, гашкö, и торъя вагонын. И котырыслöн мунöм йылысь юöртны полициялы. Öні жö поездын пöрадок бöрся видзöдö МВД-ысь погона нёль морт.

Сосногорскысь Григорий Шевченко вöзйö лöсьöдны торъя купеяс вермытöмъяслы да олöма йöзлы. Удораысь Мария Худяковалöн кагаыс инвалид да тшöкыда ковмывлö ветлыны Сыктывкарö. Но весиг юркарса вокзалын абу платформаыс. И зэв сьöкыд висьысь каганад пуксьыны вагонö да петны поездысь.

Войвыв кöрт туйöн веськöдлысьöс вежысь Сергей Пастернак висьталіс, мый Сыктывкарын платформаыс лоас, та могысь вичмöдöма нин сьöм.

—Мыйла проводниклöн аптечкаын абуöсь лекарствояс? — нöшта юаліс Мария Худякова.

—Проводникыд абу врач. Кытысь сійö тöдас, кутшöм лекарство тіянлы отсалас? А бинт да йод пыр эм, — вочавидзисны аньлы.

Унаöн элясисны и дыш да вежавидзтöм проводникъяс вылö. Сергей Пастернак вочавидзис налы:

—Быд поездын эм начальник, код дорö позьö шыасьны, эм тетрадь, кытчö позьö гижны ассьыныд элясьöмтö либö вöзйöмтö. А сідзжö позьö гижны-звöнитны Ярославльö. Ми ни öти шыöдчöм ог кольöй видлавтöг. Мыжа кö уджалысьным, кыскам кывкутöмö, а ковмас кö, и удж вывсьыс мездам. Ми тöждысям асланым бур ним вöсна.

Сідзжö Сергей Пастернак вочавидзис и налы, кодъяс юасисны, мыйла тшöкыда лоö ветлыны нэмöвöйся нин вагонъясын, мыйла абуöсь биотуалетъяс.

—Ковмас виччысьлыны на. Абу позянлуныс выльмöдны öтпырйö став вагонсö, но ми зілям. Таво Комиö воас 12 выль вагон. Найöс медводз торйöдам челядьöс шойччанінö новлöдлыны. Но ме сета кыв, мый ни öти вагон, кодöн вöдитчан кадыс колис нин, оз пет туйö. Таво лоö спишитöма 42 вагон. А биотуалетъяс лоасны сöмын сэк, кор кöрт туй станцияясын вöчасны ва качайтанінъяс. Печораын татшöмыс быть колö. И лоö. Но кор, стöча шуны ог на вермы, — веськыда шуис веськöдлысьöс вежысь.

—Мыйла абу Ираёльын груз видзанін?

—Тайö абу сэтшöм ыджыд станция, грузыс овлö этша, та понда абу коланлуныс вöчны торъя стрöйба.

—Но кöть нин вокзалсö дзоньталöй!

—Матысса кадö дзоньталам вокзалсö, лöсьöдам и платформа.

—А мый вöчны сідз шусяна бомжъяскöд, кодъяс вокзалас олöны?

—Збыльысь кö, меным жальöсь найö. Кыдз вöтлан мортсö ывлаö, кöні кöдзыдыс трачкöдчö? А некытчö кö сэсся сылы муннысö? А гашкö, туй вылас сьöмыс абу? Тайö мытшöдсö колö разьны социальнöй службалы, полициялы, правительстволы öтвылысь. И ми ог жö öтдортчöй.

—Мыйла тупкисны Юкаркаысь кассасö?

—Абу кивыв миянлы. Ветлысь- мунысьыс этша, а рöскодыс уна.

—А мыйла сöмын 2 минут сулалö сэні поездыс?

—А мыйта татшöм сувтланіныс? Быдлаын кö 10 минут кутам сулавны, воштам уна кад да колана местаöдзыс воам ёна сёрöн. Поездыс кö скорöй, оз на и сувтлы быдлаö.

—Мадмассаяс 15 минут оз удитны Сыктывкарö мунысь поездöдзыс, и мöдсö лоö виччысьны Микуньын матö 5 час.

—Гашкö, и артмас вештыны кадсö.

—Москваысь Печораö воысь поездыс сувтö туй вылö, кöні абу платформаыс. А платформаа туй вылас сідз сулалöны тыртöм вагонъясыс.

—Ми видлалам тіянлысь шыöд-чöмтö.

—Мыйла абу Сыктывкар — Котлас торъя поезд либö кöть нин пысалісны öтувъя вагон Москваса поезд дорö?

—Вöчны тайöс абу кивыв, ветлысь-мунысьыс этша да.

* * *

Телефон да скайп пыр шыöдчыліс матö 40 морт.

—Збыльвылас, миянлы тöдса став тырмытöмторйыс. Зілям, медым ветлысь-мунысьлы туяс вöлі кокни. И дасьöсь водзö ёртасьны Коми Республикаса правительствокöд, — кывкöрталіс Сергей Пастернак. — 15 регионын карысь карö ветлысь поездъяс вайöны чуктöс. А чуктöсыс кö эм, лоö и содтöд сьöм. Ми вичмöдім нин 280 миллион шайт Сосногорскса да Княжпогостса вокзалъяс дзоньталöм вылö.

Республика кöсйысис жö пуктыны таö ассьыс пай. Та йылысь висьталіс промышленносьтса, транспортса да связьса министрöс вежысь Сергей Иванов. Нöшта, сылöн кывъяс серти, правительство ньöбас 15 вагон, медым новлöдлыны йöзöс Воркутасянь Москваö.