"Бöрйы ассьыным!" акциякöд йитöдын Сыктывкарса йöв заводын кольöм вежонö нуöдісны йöла вöлöга вöчысьяс пöвстын конкурс. Юркарысь, Ухтаысь, Кöрткерöс, Койгорт, Кулöмдін, Чилимдін, Изьва да Луздор районъясысь 14 предприятиеын зільысьяс петкöдлісны ассьыныс сямлунсö рысь, вый, нöк, сыр, шомйöв вöчöмын, вузöссö тубралöмын, а йöв заводысь специалистъяс юксисны накöд асланыс кужöмлуннас.
Татшöм ордйысьöмсö республикаын нуöдлісны 1997—2004 воясö, а сэсся дугöдчисны. И со 8 во мысти видз-му овмöс да сёян-юан министерство шуис сійöс ловзьöдны, öд уналы окота видзöдлыны, мый тайö кадас вежсис оборудование боксянь, локтісны-ö овмöсъясö выль йöз, вöдитчöны-ö öнія технологияясöн да с.в.
Вöлöгасö донъялісны Комиын видз-му овмöс министерствоысь, Роспотребнадзорлöн управлениеысь, Росстандартлöн юкöнысь да сертифицируйтан шöринысь специалистъяс. Ставсö видзöдлöм-видлалöм да вом дорсö нюлыштöм бöрын жюри кывкöрталіс: 10 прöчента медбур йогурт вöчöны Сыктывкарса "Пригороднöй" овмöсын, 9 прöчента медчöскыд рыськыс "Помöсдінса" СПК-лöн. Веж петкöдлана чöскыд "Адыгейскöй" сыр дасьтöны Кулöмдінса МТС-ын. Выйсö ошкисны 3 овмöслысь: Сыктывкарса да Кöрткерöсса йöв заводъяслысь да Чилимдінса "Заря-1" СПК-лысь. 20 прöчента нöкйысь 1 места сетісны Луздорса "Южное" овмöслы. Медводдза места да сьöма козин вичмис и Сыктывкарса йöв заводлы "Умница" йодоказеина йöлысь.
Коми серъясöн вузöссö мичмöдöмысь пасйисны Кöрткерöсса йöв завод да Чилимдінысь Т.Кирьяновлысь крестьянско-фермерскöй овмöс, а сідзжö конкурсö медся том пы-рöдчысьöс, "Пригороднöй" ВАК-ысь 23 арöса Денис Коровинöс, да Кöрткерöсса йöв заводысь технолог Галина Александровна Морозоваöс, коді зільö радейтана удж вылас 50-ысь унджык во.
Рысь вöчöмын да сійöс тубралöмын мастеръясöн шуисны Кöрткерöсысь Галина Морозоваöс, "Южное" овмöсысь Анна Черныхöс да Сыктыв районса йöв вöчан цехын зільысь Светлана Ахвадулинаöс.
Кыдз пасйис видз-му овмöсса министр Сергей Чечёткин, талун республикаын йöв переработайтöмын абу на ставыс лючки. Молзавод-цехъяс эмöсь 20 кар-районысь сö-мын дас кыкас. 7 муниципалитетын 47 прöчент овмöсас асланыс цехыс абу, а кöні эмöсь, сэні важмöм оборудованиеöн вöчöны сöмын вый. Сэк жö вый вöчöмыс сувтö зэв дона. Ёна донтöмджык вуджны рысь, нöк да шомйöв дасьтöм вылö, водзöсыс таысь унджык и. Та вöсна правительство отсалö аграрийяслы. Сідз, апрельын йöла вöлöга вöчан выль цехъяс воссясны Изьва районса "Заречье" ООО-ын, Емваын да Чилимдінса Трусовын. Кольöм во лои выльмöдöма оборудованиесö 6 заводын: Кöрткерöсын, юркарын, Койгортын, Изьва районса Діюрын, Кулöмдінса Помöсдінын да Печораса "Агровид" ООО-ын. Сідзкö, и водзö вылö йöла вöлöга вöчысьяслы позяс венласьны кужöмлуннас да юксьыны сямлуннас, чöсмöдлыны миянöс нöгыля рысь-нöкйöн да йогурт-выйöн.