Эм-ö миян республикаын збыльысь гырысь чериыс, кодöс суйöр сайын нöшта шуöны "трофейнöйöн"? Вермас-ö кодкö стöча вочавидзны тайö юалöм вылас?
Муртса чаль кузьта
Комиын зэв унаöн вуграсьöны йи вывсянь. Кöдзыд пöльыд муртса на дорас ю-ты, мужикулов пыр жö босьтчöны кыйны чери. Быд шойччан лунö, а праздник йы-лысь и сёрни абу, татшöмъясыс дасьöсь машинаöн журкнитлыны кöть мусюр сайö, мед сöмын мачыштны кöть нин гоз-мöд гырысь ёкыш либö кельчи. Но шоча кодлы усьлö татшöм шудыс.
Бöръя воясö вуграсьысьяс тшöкыда ветлывлöны Княжпогост районса Синдор сикт дорö. А юркарсянь сэтчöдз туйыс ок и ылын. Сикт дортіыс визувтöны Вис да Сімва неыджыд юяс.
Сэні, дерт, позьö бурпöт вуграсьны. Öткымын лунö чериыс дугдывтöг дэбöдчö. Медсясö кельчи. Сямаджык йöз кöкъямыс-öкмыс килограммöдз луннас кыйöны. Но кельчиыс посни, муртса чалльысь кузьджык. Зэв гежöда шедлывлö весьтысь ыджыдджыкыс.
Öткымын воö сэтчöс жö Чича юö пыралö уна ёкыш. Но сійö абу жö гырысь. Вугралігöн кодсюрö радлö, эта-тшöм горша пö самсö кватитö. Но гортас воöм бöрын, кор заводитö татшöм ёкышсö керны, пыр жö ловнас усьö: чериыс уна, но посни. Кыдз шуласны, лы ёкмыль. Найöс вильöдігöн, он кöсйы да, виньдан.
Вуграсям… öтуввезйын
Менам уна тöдса талун "вуграсьö" öтуввезйын либö чери кыйöмлы сиöм видеофильмъясын.
Каспий саридзö Волга юлöн усяніныс – чери кыян рай. Сэні котыртöма уна база, кöні эм ставыс, мый лолыдлы колö: узьланін, нуръясянін, весиг и финнъяслöн кодь сауна. А медся тöдчана – базасянь кык воськов сайын гожöмын кöть тöлын позьö бура вуграсьны быд сикас угоддьööн. А чериыс сэні зэв уна.
Мормышкаöн кöть кыснанöн шедö зэв гырысь ёкыш да сир. Кельчи да краснопёрка йылысь и сёрни абу. Видзöдан, кыдзи йöзыс вуграсьöны, да бöрдны окота. Муртса ыджыд кыснан воö ю пыдöсö, пыр жö сійöс тшапкö 600 грамма ёкыш. Öти, мöд, коймöд... И ставыс öти йöрданысь!
Сибырын да Ылі Асыввылын кыйöны дона чери: ком, ленок, кебöс, нерка да мукöдöс. И найö абу весьт кузьтаöсь. Озыръяс, кодъяс радейтöны вуграсьны, сьöмсö оз жалитны, медым веськавны татшöминас. А воöдчыны сэтчöс ю-ты дорö абу кокни, та могысь колö медавны весиг вертолёт.
И Комиын тшöтш
Миян республикаын эм жö чериöн озыр ты-вадйыд. Но сöмын войвылын. Сідз, Изьва районса Кыдзкар сикт таладорса да мöдлапöвса тыясын рöдмö гырысь кебöс, сир, ряпушка...
Тавося январын Константин Бизенков йи вывсянь кыснанасьöма öти тыын. Гырысь ёкыштö бура мачалöма. Сэсся виччысьтöг кöрт ёкмыльсö кватитöма ыджыд чери. Вель дыр Константин "воюйтöма" сыкöд. Бурöн писькöдöм йöрданö юрсö некыдз оз вöлöм сюй. Коркö-некоркö мудзöма да кыдзкö-мыйкö сетчöма жö. Ставöн акнитöмаöсь, кор йи вылö Константин перйöма ыджыд сирöс (снимок вылын). Гортас веситöмаöсь да, квайт килограмма.
Во кызь сайын Кыдзкар сиктын олысь Василий Фёдорович Истомин аслас Илья внуккöд Игпашко тыын йи вывсянь жö кыснанасьöмаöсь. Пöльыслысь кыснансö ньылыштöма ыджыд жö сир. Сылöн юр-ыс йиас вöчöм розяс абу тöрöма. Олöма морт дыр думайттöг черилöн нёкчимас пысалöма нöшта некымын кыснан да ваас черитö бöр лэдзöма. Жилкаа некымын угоддьöысь пö оз мынтöдчы... Сэсся пыридзöн йöрдансö ыдждöдöмаöсь да вöлисти перйöмаöсь. Веситöмаöсь да, сирыс вöлöма кöкъямыс килограмма.
Кыдзкар дорса тыясын зэв жö гырысь гыч уялö. Висьталісны, сэтшöм пö ыджыд, мый рачö оз тöр. Та вöсна гычсö первой шöрипельö вундöны да вöлисти пражитöны...
Пыдди пуктана лыддьысьысьяс, гижöй, кодлы да кöні нöшта шедліс ыджыд чериыс...
