Парчегын кöть Зеленечын юалöй, кытысь позьö аддзыны Ош Ярош Дöрöш Васьö Паш Галинаöс? Пыр жö вочавидзасны, тайö жö пö миян велöдысь – Галина Павловна.
Зеленечса шöр школаын директорöс велöдан удж кузя вежысь Галина Петрунева асьсö лыддьö шуда мортöн. Радейтана удж, муса велöдчысьяс... А нöшта на ас нэмас аддзысьлöма уна бур йöзкöд, кыдзи сиктсакöд, сідзи и нималана войтыркöд.
А кöні кутшöм велöдчанін...
Зеленечса шöр школаын на велöдчигас Галина Петрунева кöсйöма лоны бурдöдысьöн либö велöдысьöн. Ичöт морт сэки ас ногыс мурталöма. Врачöн пö лоа да бурдöда и бать-мамöс, и пöль-пöчöс. И висьнысö пö сэсся ог сет.
–А сиктса школаас сэки уджалöмаöсь збыльысь енбиа велöдысьяс. Наысь пö бурджык йöзыс вöльнöй светас абу, – и öні на эскöдö Галина Павловна да водзö казьтылö: – Коми кывтö ёна радейті. Миянöс велöдіс Лидия Алексеевна Юркина. Роч кыв да литература кузя урок нуöдіс Рея Михайловна Напалкова. Сэсся сэки директораліс Владимир Васильевич Тимин. Буретш тайö енбиа гижысьыс велöдіс миянöс радейтны кывбуръяс. Гортын вöлі рöмпöштан водзö сувта да гораа лыддя, кыдзи и тшöктö вöлі Владимир Васильевич.
Школа помалöм бöрын нывъёртъясыскöд кайöмаöсь Сыктывкарö. Кöні кутшöм велöдчанін, сиктса нывъяс, дерт, абу тöдöмаöсь. Медводз син уланыс усьöма Иван Куратов нима педучилище. Сэтчö ставöн и пырöмаöсь...
Пöнара биöн
Диплом босьтöм бöрас начальнöй школаса велöдысь Галина Петруневаöс мöдöдöмаöсь Ухта районса Кедвавом сиктö.
Туйыс вöлöма сэтчö кузьсьыс-кузь. Но тайö абу повзьöдöма. Том специалистöс индöмаöсь… интернатöн веськöдлыны, таысь öтдор кагульничаалöма сэні, а школаас содтöд нуöдöма физкультура урок.
–Сідзи директор и шуис, тэнад пö могыд – мед Кедвавомын быдмисны Раиса Сметанина да Николай Бажуков кодь жö вына да збой спортсменъяс. Челядькöд öтвылысь вöлі лызьöн котралам. Таысь кындзи мыйсö сöмын эг вöчлöй! Ме öд сэки вöлі том. Сиктсаяс ёна шензисны, татшöм пö велöдысьыс миян школаын эз на вöв. Видзöд пö, челядьыскöд Галина Павловна лым пиас туплясьö, накöд тшöтш ворсö... А збыльысь, Кедвавомын мойдын моз олі-уджалі. Интернатса ныв-зонмöс колö кыдзкö гажöдны. Вежöсын быд рыт кутш моз он пукав. Со и зіли ывлаö тшöкыдджыка петкöдлыны. Сэсся öд и налöн дзоньвидзалун вöсна кывкуті, – нюмъялö Галина Петрунева.
А велöдчысьяс сійöс радейтöмаöсь. Сиктса школаас тöдöмлун босьтöма Андрей Семяшкин. Тöвнас быд асыв сійö водза-водз чеччылöма, мед радейтана велöдысьыслы йи улысь ком кыйны.
Кедвавом сикткöд орччöн визувтöны Изьва да Кедва юяс. Сэтчöс вöр-ваыслöн мичлуныс сьöлöмöдз пö йиджö. Галина Павловна пасйис, мый сиктын олысьясыс зэв вежавидзысьöсь, шаньöсь... Бокысь воöм ве-лöдысьöс ас мортöс моз пыдди пуктöмаöсь.
–Интернатса челядькöд да налöн бать-мамкöд колö вöлі тöдмасьны-аддзысьлыны. Тайöс вöчны вöлі зэв сьöкыд. Сідз, Поромöсь грездöдз матö öкмыс километр. Вöла доддьöн сэтчö ветлывлі. А матігöгöрас кöиныс зэв уна рöдмöма. Тöвзян южмöм туйті, гöгöр сьöд вöр, а киын пöнар. Бисьыс кöиныд полö да, – висьталö Галина Петрунева.
Во уджалöма Кедвавомын. Сэсся сійöс корöмаöсь Зеленечö. Бöръя лунас ёна и шогалöма. Сэсся войбыд бöрдöма. Синваöй пö эз косьмыв. Татшöм бур йöзсö пö некор да некытысь ог паныдав. И Ан-2 самолётын лэбигöн бара на бöрдöма.
Кольöма дас во. 1987 воын Ухтаын нуöдöмаöсь велöдысьяслы семинар. А Кедвавомöдз сё верст. И Галина Павловна шуöма пышйывны сэтчö. Сёрнитчöма öти шоперкöд. А вöлöма апрель пом. Туйыс некытчö шогмытöм. Нёль сайö час писькöдчöмаöсь сиктöдз.
Машинасьыс Галина Павловна петöма да пыр и сувтöма. Изьва юыслысь тöдса кöрсö апнитöма да. Сійö бара на казьтылö:
–Сиктыс быттьö абу и вежсьöма. Ставыс тöдса, муса. И йöзыс помнитöны на. Кос Парась баб, код дорын сэки овлі, вöлі ловъя на. И бара став сьöлöмсяньыс примитісны. Рытывбыд казьтылім кольöм кадсö. А вöлі мый йылысь сёрнитны. И пывсянын тшöтш пывсьöдісны.
Первой лунсяньыс "доддяси"...
Зеленечын медводдза дас восö Галина Павловна велöдöма начальнöй классъясын челядьöс. Уджысь орöдчыв-тöг помалöма Коми пединститут.
–Первой лунсяньыс "доддяси". Кадсö вöлі ог казяв. Лунтыр зонпосникöд школаын зіля. А рытнас найöс гортö на нуöдла. Первой классаяс пиысь кодкö омöля лыддьысьö, мöд, видзöдан да, лёка гижö либö артасьö. Татшöмъясыскöд содтöд вöлі уджала, – висьталö Г.П.Петрунева.
Урокъяс бöрын быдтасъясыскöд öтвылысь небыд чачаяс да аканьяслы паськöм вурлöмаöсь, а нöшта нывъясöс велöдöма вышивайтчыны да коми серöн салфеткаяс мичмöдны... Дерт, сэсся найö ассьыныс велöдысьсö мöд мамöн шулывлöмаöсь. Кад нин гортö мунны, а челядьлы абу окота, удитам на пö, бурджык висьталöй, Галина Павловна, кыдзи ошпилы пельяссö вурны?..
А сэсся бара на дас во велöдöма коми кыв да литература. Велöдысь казьтылö:
–Первой восö син мудзтöдз лыдди коми висьт-романъяс. Торйöн нин выльöн йöзöдöмаяссö. Коми небöг лэдзанінын петöм став книгасö аслам библиотекаö ньöби. Сідз нин велавсьöма да, лыддьысигöн листъясас карандашöн аслым пасйöдъяс вöчала, медся кажитчанаинсö торйöдала.
Сэки Зеленечса шöр школаын ныв-зонмöс сійö велöдöма коми национальнöй уджтас серти. А сиктса челядь рочмöмаöсь нин, унаöн на пиысь кыдъя рочöн сёрнитöны. Гöгöрвоöны эськö, но омöля лыддьысьöны да гижöны.
И век жö Галина Павловна сяммöма пестыны аслас велöдчысьяс сьöлöмын коми кыв дорö муслунсö. Бöрыннас таысь найö "аттьöалöмаöсь" сійöс. Сідз, на пиысь öти, Денис Рассыхаев, талун ворсö Виктор Савин нима республикаса драма театрын.
А öні Зеленечын коми кывсö велöдöны нин кыдз государственнöйöс. Медым роч челядь радейтісны коми культура да искусство, тöдісны грамматика, сяммисны лыддьысьны да гижны...
Бöръя дас восö Галина Павловна зільö директорöс вежысьöн. Вуз бöрын воöм том велöдысьяслы отсалö пырöдчыны уджö, кывзö налысь урокъяссö, водзмöстчöмысь ошкö, но и тырмытöмтор вылö индалö.
Сэтшöм окота сьывны!
Галина Павловна окотапырысь петавлö и сиктса культура керкалöн сцена вылö. Сійö висьталö:
–Школаын на велöдчигöн праздникъяс дырйи радейтлі лыддьыны кывбуръяс, нывъёртъяскöд ворсім тешъясын, асьным найöс гижлім.
Зеленечса культура керкаын котыртöмаöсь драма кружок. Кольöм вося декабрын самодеятельнöй артистъяс петкöдлöмаöсь сиктсалы "свадьба приданöйöн" спектакль. Галина Петрунева ворсöма "Искра" колхозса председатель Василиса Павловаöс.
–Жаль, Енмыс абу сетöма меным гöлöс. А сэтшöм окота сьывны, – пасйис велöдысь.
Томдырйиыс моз радейтö исласьны лызьöн. Войвывса вöр-ва да сöстöм сынöд отсалöны ёнмöдны дзоньвидзалун, кыпöдöны лов. Удж бöрас, овлö, подöн öтарö-мöдарö восьлалö Зеленечса "бродвейті". Тадзи сиктсаяс шуöны порсь видзан карталань нуöдысь туйсö.