Февраль 21 лунö Россияын и суйöр сайын — став мирын — пасйисны Чужан кывлысь лун.

Сыктывкарын некымын во дорвыв нин тайö лунас том коми войтыр петалöны уличаяс вылö да ышöдöны воча воысьясöс сёрнитны чужан кывйöн. Таво жö шуисны туявны, кöні юркарын позьö шыасьны комиöн да медым тэныд комиöн жö и вочавидзисны.

А татшöм мöвпыс чужöма тадзи. Кольöм во Финляндияысь том зон Нико Партанен вит тöлысь велöдчис Сыктывкарса университетын, бура сёрнитö комиöн, а рочасьны оз куж. Лавкаын вузасьысьяс гежöда сійöс гöгöрволöмаöсь, комиöн шыасьлöма да. А морöсаныс кö пö вузасьысьлöн öшаліс торъя пас — "Ме сёрнита комиöн", сы дорö и матыстчи эськö. И вöзйöма нуöдны татшöм акция, весиг отсалöма "Тані сёрнитам комиöн" стикеръяс да пасъяс вöчны.

"Ми" котырын да "Коми войтыр" öтмунöмлöн юркарса представительствоын водзмöстчысьяс медводз мöдöдчисны ЦУМ-ö. Коми вузасьысьыд сэні и збыльысь уна вöлöма. Валентина Бутиева мöд судтаас уджалö нывбабаяслы улыс паськöм вузаланінын. Меным пö нимкодь, кор ньöбасьысьяс комиöн сёрнитöны, накöд пö век чужан кывйöн жö варовита. Нина Шахова газет киоскын зільö, коми кывтö кыліс да пыр жö нюмъявны кутіс, быттьö меддона йöзкöд паныдасис.

Лавкаысь петігöн юркарса коми культура шöринын уджалысь Ольга Аверина телефон пыр комиöн корис такси. Воис Сергей Исаков. Ачыс Кöрткерöс районса Вомынысь. Машинаö пуксигöн на пö казяла коми морттö, и зэв жаль, оз кö окотит мекöд комиасьны. Öшинь стеклöö öшöда пассö, быдöн мед тöдас, мый мекöд комиöн позьö сёрнитны.

Коми войтыр сюрисны и госслужба да веськöдлöм кузя республикаса акаде- мияын. Пöрччысянінас уджалысь аньяс долыда вочаасис-ны том йöзкöд ас кыв вылын, тадзи жö сёрнитісны накöд и аудиторияясын, и ректорыс — Нина Александровна Нестерова.

Февраль 21 лунö чужан кывлы сиöм акция нуöдісны и Эжваын да Сыктывдін районын.