Бöръя кадö "Коми му" газет лыддьысьыс уна районын содіс. Но эз быдлаын, и редакцияын уджалысьясöс майшöдлö, мыйджык оз на тырмы вужвойтырлöн кыв вылын петысь газетас, мый йöзыс виччысьöны, кöсйöны лыддьыны "Коми муысь". Тайöс тöдмалöм могысь коми газет-журналса холдингöн веськöдлысь Надежда Быковская да сійöс вежысь Ганна Холопова ветлісны Мылдін районö, аддзысьлісны сэтчöс войтыркöд да тшöтш и выль небöгъясöн тöдмöдісны найöс.

Олан Комиын – сёрнит комиöн

Мылдінын районса культура керкаö газетын уджалысьяскöд аддзысьлыны чукöрмис вель уна йöз – "Коми войтыр" öтмунöмын, ветеранъяслöн да нывбабаяслöн котыръясын водзмöстчысьяс, велöдысьяс. Ставныслöн сьöлöмыс висьö вужвойтырлöн, чужан кывлöн аскиа лун вöсна, да быдöн зілис юксьыны та йылысь аслас мöвпъясöн.

Сідз, вöвлöм велöдысь Вера Нечаева кöсйö, медым "Коми муын" унджык вöлі национальнöй политика, а сідзжö коми кыв велöдöмын мытшöдъяс йылысь гижöдыс.

–Миян медся ёсь тöждыс сыын, мый Печора йылын коми грездъясыс бырöны, торйöн нин кор кольöм нэмö татчö мукöд кывъя йöзöс вöр пöрöдны кутісны вайöдны, – висьталіс Вера Ивановна. – Эмöсь öд вужвойтырöс доръян ООН-öн вынсьöдöм документъяс. Наöн колö паськыдджыка йöзсö тöдмöдны, öд найöс веськöдöма миянлысь аслыспöлöс культуранымöс, кывнымöс видзöм вылö. Менам видзöдлас серти, воин кö овны-уджавны Комиö, велöд татчöс войтырлысь кывсö.

Сыктывкарысь воöм журналистъяслы сикт-посёлокын олысьяс висьталісны и Печора йывса тöждъяс йылысь. Но пасйисны, найöс венöм могысь пö и асьным унатор вермам вöчны.

–Регыд поссöветö депутатъясöс бöрйыны кутам. Найö ставныс миянкöд орччöн олöны. Нывбабаяслöн сöветын бур тöдсаяс жö водзмöстчöны. Öти улич вылын олысьяслысь комитет колö бöрйыны, и ставныс кö найö, тшöтш и полицияса участкöвöй, öтув кутасны уджавны, сэки и пöрадокыд лоас, – вöзйис Лия Крищенко. – А вöчнысö миянлы колö уна: и вермытöм йöзлы, и олöмаяслы, торйöн нин кöкъямысдас арöсысь ыджыдджыкъяслы, и том мамъяслы отсöг-кокньöд сетöм могысь.

Босьтчылöмаöсь эськö уличвывса комитетсö бöрйыны, да абу артмöма, общественнöй уджад водзмöстчыны кöсйысьыс пö этша.

Вöралысьяс тані олöны

Мылдін районын медся коми грездыс Еремей. Сэні олысьяскöд аддзысьлöмсö вöлі котыртöма культура керкаас жö.

И сёрниыс бара пансис эз сöмын газетлöн, но и грездлöн тöжд-могъяс йылысь. Туйыс пö Еремейöдз абу, асьныд казялінныд, кутшöм сьöкыд миянöдз воöдчынысö. Бöръя дас вонас сöмын таксофон сувтöдісны, а телефоныд пö эськö и гортаным колö. И клуб дзоньтавны кад нин, со весиг джоджыс воссьö.

Республикаса Юралысьлöн Общественнöй приёмнöйлöн Мылдін районса юкöнын уджалысь Надежда Терентьевалöн кывъяс серти, таво кежлö район сöвмöдан бюджетын Ылыдз вожö туй лöсьöдны, Палью вомöн пос вöчны кык миллион сайö шайт вичмöдöма. Тöвнас Пальюсянь Еремейöдз веськыда воöдчöны, а гожöмнас лоö кытшлавны Пальюсянь да Приуральскöйсянь Урал гöраяслань мунысь вöр петкöдан туйяс кузя. На костын дас кык километр (тайö туйкостсö войтырыс "кöзяйкаöн" шуöны) дзоньтавны-лöсьöдны и вичмöдöмаöсь сьöмсö. Нöшта йöзöс новлöдлан машина кöсйöны ньöбны.

Еремей йылысь республикаын, гашкö, быдöн кывліс, öд Россия пасьтала нималысь Маньпупунёр из кындзи тані во костмысти "Вöралысьлысь гаж" нуöдлöны, кытчö волö уна гöсьт. Водзті Еремейын вöлі и сьöд руч видзан овмöс – Комиын дзик öти. Öні руч видзöмысь эновтчöмаöсь, "Соболь" овмöсын брус-плака пилитöны. Овмöсыс вылö еремейсалöн медыджыд надеяыс. Кыдзи висьталіс Ниофит Александрович Попов, "Собольöн" веськöдлысь Сергей Юрьевич Мишарин кö пö пенсия вылö петас, грезднымлы пом воас. Дерт, татшöмыс мед эськö эз жö ло, öд Еремейыс и збыльысь зэв мича сикт, выль керкаыс уна сулалö, му вылас зумыда сулалысь йöз сэні олöны. И зэв шог вöлі кывны насянь, некытчö пö муннысö да сы вöсна тані олам.

Ставыс морт сайын

Приуральскöй посёлокын газетса уджалысьясöс виччысьöмаöсь школаын, кызвыныс – велöдысьяс. И, дерт, шöр сёрниыс вöлі коми кыв велöдöм йылысь. Медводз пö коліс та могысь подувсö лöсьöдны, а сы бöрын нин босьтчыны велöднысö.

"Коми му" йылысь сёрнитігöн Приуральскöй посёлокса администрацияöн веськöдлысь Евгений Юшков пасйис, ми пö абу велалöмаöсь лыддьысьны. Öти ань пö меным висьталö, дон босьттöг пö "Коми мутö" вöлі вайöны да, водзсяньыс бöръя лист бокöдзыс лыддя. Колö пö и водзö кежлö судзöдны.

Школасянь мöдöдчим посёлокса администрация керкаö, кöні меститчö "Родное Приуралье" музей. Гежöда на весиг районса шöр сиктъясын аддзывлан татшöмсö, кутшöмöс лöсьöдöмаöсь Приуральскöйын Ольга Уляшовалöн водзмöстчöмöн. Ставсö бура мöвпыштöмöн вöчöмаöсь, быттьö специалист уджалöма. Ольга Яковлевна висьталö, карса музейясö волігöн пö зіля быдтор казявны, вежöрö тшупыштны, кыдзи колö петкöдланторъяссö бурджыка тэчны-меститны.

Мылдінöдз кузь туй на виччысис миянöс, да недыр кежлö и шуим кежавны музеяс, а пырим да бöрсö петны ог убöлитöй, öтитор окота тöдмавны, мöдтор видзöдлыны, коймöдтор киö босьтлыны. Сьöлöм бурмытöдз лоис. Ставыс öд морт да сылöн сям-кöсйöм сайын.

Оз сöмын коми майшась

Покча сулалö Печора бокса джуджыд мылькъяс вылын. Сиктса администрациялöн керкаö чукöртчöмаöсь войтыр, кодъяс збыльысь тöждысьöны коми кыв вöсна. Та йылысь мöвпъясöн и юксисны газетын уджалысьяскöд. Öткымын семьяын пö весиг гортас бать-мамыскöд рочасьöны. Надежда Шахтарова висьталіс, пиöй пö гортын миянкöд комиöн сёрнитö, а мунас детсадйö да рочасьö нин сэні:

–Сыктывкарысь гöсьтъяс локтісны да, сійö чайтöма, мый карсаыдкöд рочöн колö сёрнитны. Рочöн и шыасис, а кор комиöн вочавидзисны, зэв öдйö бöр чужан кыв вылö вуджис.

–Покчаысь бокö кö петам, гöтыркöд ми век комиöн сёрнитам, – шуис Александр Маслов. – Чужан кывлöн аскиа лун йылысь майшасьöны оз сöмын коми, но и мукöд войтыр. И тайö ставнымлöн миян зэв ыджыд тöжд.

Миянлы зэв нимкодь лоис, мый покчаса унаöн висьтасисны, судзöдам да лыддям пö "Коми мутö". А сьöрысь выль небöгъяс вайлім да эз öтиöн, а некымынаöн ньöбалісны, листалісны-видзöдалісны да öта-мöдыслы инда-лісны-петкöдлісны, мыйöн бур сійö либö мöд книга. Выль во водзын редакция лэдзис Алексей Поповлысь, Елена Габовалысь, Андрей Каневлысь повесьт-пьесаяс, челядьлы гижöдъяс. Öні дасьтам нöшта выль петасъяс, да та вöсна лов вылын долыд лои, öд коми и роч небöгъяссö йöзыс виччысьöны, кöсйöны лыддьысьны. Тайöс ми казялім и Мылдінса библиотекаын, кытчö пыралім Сыктывкарö мöдöдчöм водзвылын нин. Сэні висьталісны, бöръя воясö пö коми книгаястö кык пöв тшöкыдджыка кутісны босьтлыны. Сідзкö, ог весьшöрö зільöй-уджалöй.