Вера Габова: "Окота ворсны!"

2 февраля 2012 года, 16:21 | Сыктывкар
Снимокыс Фёдор МАКАРОВЛÖН

Выль во водзын Виктор Савин нима драма театрысь артистка Вера Габовалы сетісны "Россия Федерацияса заслуженнöй артист" ним. Талун сійö — миян гöсьт.

Пес лэбулын артистка

Кöмтöм кока челядьдырыс Вера Габовалöн кольöма Кöрткерöс районса Сюзяыбын. Быдмöмаöсь вит чоя-вока. Дзолядырсяньыс Вера вöлöма лабутнöйöн, но мыйлакö öтарö доймалöма. Ворсасны челядь чукöр, некод-кöд нинöм оз ло, а сійö пыр кысянькö усьöма, кытчöкö крукасьöма, кляничаöн кок пыдöсыс вундысьöма.

Гожöмыс нывкалöн кольлöма вадорын да видз вылын, кыдзи и сиктса мукöд челядьлöн. Кыдзи ачыс висьталö, ёна радейтöма турун пуктан кад. Торйöн нин юр кыскавны окотапырысь босьтчылöма.

—Мыйла ті бöрйинныд артистлысь профессия? Али став нывкаыс кöсйöны лоны артистöн да и ті тшöтш? — юася Вера Петровналысь.

—Эг та вöсна, — шуö сійö. —Сэки весиг эг мöвпав, мый коркö сцена вылö пета. Дерт, кор сиктö волывлісны артистъяс, куим часöн водз вöлі котöрта клубö, мед пуксян местаыс лоö. Сэтшöма вöлі сьöлöм вылö воö налöн сьылöм-йöктöмыс.

Концерттö видзöдасны, а сэсся пöдругаыскöд пес лэбулын асьныс концертасясны. Нывъёртыс эськö вузасьöмысь вöлöм корö ворсны.

—А меным дыш продавечавнытö, изъяснад веситчынытö, — нюмсорöн казьтылö ань. — Бурджык артисталам. А тöвнас йи вылын конькиöн исласям. Пальто бöждорöс шевкнитам-паськöдам, быттьö балеринаяс.

Вераöс школаын ошкылöмаöсь кывбуръяс бура лыддьöмысь. Кöкъямысöд классын велöдчигöн сійö гижлöма сочинение, мый мöвпалö лоны артистöн, но кöсйöмöй пö, жаль, оз збыльмы. А Сюзяыбса зонкаяс вöлöм эльтчöны: "О, артистка!"

Налöн "нимтысьöмыс" имитіс. Öні Вера Габова збыльысь Артистка!

Вурсьысь али маляр?

А öд Вера сэки абу эскöма. Кöть эськö батьыс тунавлöма, тэ пö чой-вок пиад медся мастер лоан.

—Век вöлі тшöктö пев петкöдлыны чоя-вокалы, коді пö мастерджык, — водзö казьтылö сійö. — Менам медъёна вöлі кусыньтчö, со и шуис батьö тадзи.

Дерт, эз чайт, мый нылыслöн кодзулыс öзъяс сцена вылын. Вералöн мамыс вöлöм зэв бура вурсьö. Нылыс, дерт, сы дорын гартчö, велöдчö мамыслысь. Вера сэки чайтöма, мый и сылöн кутас артмыны. Но Енмыс сылы мöдджык сям сетöма — артисталан. Дерт, и вурсьынытö кужö.

Ыджыдджык чойясыс ышöдöны вöлöм велöдысьö мунны, асьныс школаын уджалöны да. Но Вераöс сэтчö некутшöма абу кыскöма. Сэсся муртса штукатур-малярöн абу лоöма. Весиг сетлöма шыöдчöм ГПТУ-ö.

—Менö эз босьтны, школаöн веськöдлысьыс документыслысь копиясö сетіс да, мед падмöдны тайö воськовсьыс. Чойкöд паныдаси улич вылын, висьталі, да гортöдз бöр катöдіс. Кутшöм пö тэысь штукатур-маляр. Ачым эськö сэтчö эг жö ёнасö кöсйы да.

Вера сиктса самодеятельносьтын сьылöма-ворсöма. Культура керкаöн веськöдлысьыс вöзйöма сылы культпросвет училищеö видлыны пырны. Сэтчö ныв и мунöма. Велöдчöма театрально-режиссёрскöй юкöнын. Помалöм бöрас гоз-мöд тöлысь уджыштöма Кöрткерöсса народнöй театрын, сэсся Шойнатыын. Ачыс режиссёралöма и сьылöма-ворсöма. Водзö пырöма драмтеатрса актёрö велöдчыны Сыктывкарса искусствояс училищеö.

—Мыйла водзö эн режис-сёралöй?

—Сійö абу менам, — висьталö Вера Петровна. — Ме абу веськöдлысь. Меным окота ворсны.

Мойдын — вильыш

Ворслöма артистка челядьлы спектакльясын. Мойдъясын сылы векджык вичмылöма вильыш геройöс ворсны. Кодöн сöмын Вера Габова абу вöлöма: ыръянь, дыш нылöн, вильыш кöчöн, шыр мамöн, уртшакöн да весиг коз колльöн. А кольöм нэмся 80-öд воын ворсöма олимпиадаса ошкöс.

—Сэсся лэбзин жö?

—Эг, — нюмыс петіс артистлöн.

—А кыдзи позьö колльöс ворсны, сьöкыд?

—Пу вылысь уси да и тімбыляси-ворсі. "Мудрый ворон" мойднас весиг Москваö ветлывлім.

Медводдза вояссö уджалігöн Москваысь театраль-нöй критикъяс волöмаöсь, видзöдöмаöсь Виктор Савин нима драмтеатрын артистъяслысь ворсöмсö да ёна ошкöмаöсь Вера Габоваöс, зэв пö енбиа, сьöлöмсяньыс ворсö. Москваса критикъяслöн ошкöм бöрын мукöдыс весиг завидьтöмаöсь. Шуасьöмаöсь, миян театрын пö öтнас Вера артисткаыс.

Кор горзöны ме вылö — бöрда

—Артистлысь ловсö мыйöн позьö медъёна дойд-ны?

—Кодлысь кыдз. Ме ог радейт, кор горзöны ме вылö. Сэки ог вермы ворсны, бöрдны окота, — шуö Вера Петровна. — А мукöд режиссёрыс тöдöмöн дойдö, мед спектакляс кокньыдджыка бöрддзан. Чайта, тадзи оз ков.

Вера Габовалы режиссёръяс пырджык сетöны драматическöй рольяс. Артистка зэв бура вермö петкöдлыны геройлысь сьöлöм дойсö, майшасьöмсö.

—Серавны и бöрдны öтмоз кужа. Но аслыд серавны либö видзöдысьяслысь серам петкöдлыны — тайö абу öтитор, кыдзи и бöрддзöдны залын пукалысьöс. Ме абу комическöй актёр. Чайта, нормöднысö менам кокньыдджыка артмö.

Аньлöн шуд

Да и збыль олöмас Вера Петровналы уна сьöкыд ковмöма венны. Кутшöмкö пöрйö аньлы окота вöлöм куткыртчыны кань моз да мед сійöс некод оз вöрöд. Олöма юысь мужиккöд. Кыдзи ачыс висьталö, öкмыс во пö мелі кывъяс пыдди чорыд кабырöн "малаліс". Некöн абу уджалöма, öтарö юöма-кодалöма.

—Кымынысь ме театрö волі пиньтöг да лöз чужöмöн, — синваыс доршасьліс аньлöн. — А коді сэсся та-тшöма "баситöм" аньтö сцена вылö лэдзас?

Эновтны эськö татшöм мортсö. Но ань пыр надейтчöма, мый верöсыс öвсяс лёк оласногсьыс. Вера Петровна сійöс и юöмсьыс бурдöдöма, и машина ньöбöма, но ставыс весьшöрö. Мужичöй нöшта на ярмöма. Вера Петровна дзикöдз лигышмунöма шогысла.

Юысьыдкöд олігад ань дзикöдз гöльмылöма. Мужикыс некöн абу нажöвитчöма, а Вералысь став сьöмсö горш пырыс сысъялöма-лэдзöма. Мукöддырйиыс пö вöлі пикöд сёрнитам, мися, öні ог вермы ньöбны тэныд дона чача-машинатö. А быдман да, ставыс тэнад лоö.

—Коркö Ыджыд лун вöлі лöсьöдчам пасйыны, а сьöмöй сöмын вит чипан кольк вылö тырмис. Сы мында и ньöби, — ышловзис ань.

Нывбаба шудыслы Вера Петровна абу нин и эскöма. Чайтöма, сöмын курыдсö панявны чужлöма. Но öтчыд вöлöм мунö гортас пöдругаяссьыс да сувтöма сыкöд орччöн зэв дона машина.

—Туйыс вильыд вöлі да, сöлі, кöсъя жö вöлі машина медавны-а, — казьтылö Вера Петровна. — Руль сайын пукалысьыскöд варовитім быттьö важ тöдсаяс. Мортыд висьталіс, мый сійö Сыктывкарса епархияын шопералö да и мукöд удж вöчö. Менö гортöдз нуöмысь деньга эз и босьт. Сэсся кыдзкö öдйö и ладмим сыкöд, куим тöлысь мысти нин гижсим.

Вунö кö — пач сайö

Гастрольöн ветлігöн быдтор вермас лоны. Торйöн нин омöль туйяснад. Некымынысь Вера Габова мукöд артисткöд тшöтш неминучаö веськавлöма. Öтчыд тракторöн путкыльтчöмаöсь, мöдысь Инта районын вездеходныс пöрöма, коймöдысь Удораын самолётыс муртса абу усьöма. Но кыдзи ачыс шуö, Енмыс пыр видзö.

—Артистъяс уна тешкодьтор висьталöны и сцена вылын сорсьылöм-яс йылысь. Тіян вöвлі жö мыйкö?

—Помнита, "Коми бал" спектакль дырйи Галина Питиримовна Лыткина вöлі Пома Идаöс ворсö. Мыйкö бабаяс ас костаныс пинясьöны, а меным колö вöлі найöс лöньöдны. Со и шуи: "Тырмас! Эг öд ми та вылö чукöртчöй. Ноко, Питиримовна, лок пуксьы пызан саяс..." Ачым эг и казяв, мый сорси. Залын ставöн кутісны серавны, сцена вылын тшöтш вашъялöны. А ме ог гöгöрво. Сэсся бöрыннас нин юалі, мый, мися, сералісны, да уджъёртъясöй висьталісны сорсьöмöс.

Кыдзи висьталіс Вера Петровна, спектакль дырйи кывъяс вунöдöмысь оз пов. Дерт, кывбура кö сёрниыс да сорсян, вермас торксьыны спектакльыс. Коркö Вера Габова ворсöма, позьö шуны, дзик дасьтысьтöг. Öти артистка висьмöма да, кык лунöн колö вöлöм сылöн рольö пырöдчыны. Мый вöчны? Он öд кут мыктавны сцена вылад. А декорацияяс пöвстас вöлöма пач. Сы сайö Вера Петровна и пуктöма аслас кывъяса гижöдсö. Мыйкö висьталас, сэсся пач сайö ветлас. Видзöдлас кывъяссö да бара йöз водзö. Тадзи и ворсöма.

—Сэсся велалі нин, но пыр вöлі пач сайö мунсьö, — серампырысь казьтылö артистка.

—Водзö вылö мый мöвпаланныд? Гашкö, кутшöмкö роль окота ворсны?

—Драматургияыд паськыд, дерт, уна спектакльын на окота ворсны.

Екатерина Макарова, "Коми му" газет

  Рубрика: Общество
  • 0
  • 0
  • 0
  • 0
  • 0

Если вы заметили ошибку в этом тексте, просто выделите ее мышью и нажмите Ctrl+Enter.

Выделенный текст будет автоматически отправлен редактору




Новости mediametrix




Видео








Индекс цитирования Яндекс.Метрика Рейтинг@Mail.ru Статистика Система Orphus
Смотреть видео