Талун пасъям Ва вежöдан лун. Йöзыс эскöны, мый январь 19 лунö валöн выныс вывті ыджыд. Мыссян кö пö вежöдöм ванас, став висьöм-вомидзсьыс мынан. Вежа ва сетö дзоньвидзалун и пемöсъяслы, да та вöсна найöс тшöтш юктöдöны-мыссьöдöны. Резöны и керка-патера, мед кыпыдджыка да кокньыдджыка овсяс. Унаöн смелмöдчöны да и йиа йöрданö сунгысьлöны. Эскöны, кöдзыд ваас кö пыралан, лолыд сöстöммас.
Бöръя воясö Ва вежöдан лунö ю дорын йöзыс тыр. Пöрысь и том, тшöтш и чинаяс öти бöрся мöд суналöны йöрданö. Öтияс пернапасасьöны, а мöдъяс матькöны, кöть и морöсас перна öшöдöмаöсь. Со и думайтсьö, збыльысь-ö найö Енлы эскöны али мода бöрся вöтлысьöны? Матькигтыр кö вежа йöрданö суналöны да кöдзыд ваысь петöм бöрын вина-водка юöны. Та йылысь сёрнитім Сыктывкарса да Воркутаса епархияысь Филипп айкöд.
– Ми христиана, и татшöм оласногыс, кыдз шуласны, вирын, – висьталö архимандрит. – Ог чайт, мый Енлы эскöмыс – мода. Лолыд ачыс корö православнöй оласногсö. Нимкодь, мый йöзыс ёнджыка кутісны волывлыны вичкоö да пыдди пуктыны, пасйыны православнöй праздникъяс. Дерт, уналы йиа йöрданö суналöмыс – экстрим, кöдзыд ваын бузöдчöмыс – аслыссяма спорт. Найö куражитчöны. Та-тшöмыс, дерт, оз вермы лоны Ен праздникъяс дырйи. Йöзыс вермасны кисьтасьны кöдзыд ваöн, йöрданын купайтчыны позьö и тöвбыд.
Ва вежöдан луныс Енлы эскысьяслы вывті тöдчана. Сэки казьтылам, кыдзи Кристос пыртчис Иорданьын. Йöрданö куимысь суныштлігöн корам Кристослысь бласлöвитöм, мед сетас дзоньвидзалун да сöстöммöдас лов.
– А быть колö куимысь дзумгысьлыны ваас?
– Дерт. Нöшта быд пöрйö быть пернапасасьны да шуны: Во имя Отца, и Сына, и Святого духа. Зэв бур, лыддян кö молитва. А матькигтыр бузгысьлöм да бöрыннас водка юöм бöрын, лолыд оз сöстöммы. Öд пыран вежöдöм ваö, и мыйла сійöс пежöсьтнысö? Оз позь!
– Кывлі йöзсянь, мый матькигас татшöмъясыслöн пытшсьыныс омöльыс петö. Тайö сідз?
– Абу. Чайта, найö оз сьöлöмсяньыс эскыны Енмыслы, а йöрданö суналöны, мед мыйкö выльтор видлыны. Тöв шöрын пырны йиа ваö! Кутшöм ме смел! Сэсся "нимкодьпырысь" и сöткöны, оз вермыны кутчысьнысö да.
– Бара жö кывлі, мый Ва вежöдан лунö йöрданö колö пырны улыс дöрöмöн, а оз купальникöн.
— Буретш тадзи. Висьтавлі нин, мортыд пырö вежöдöм йöрданö да тайö лоö пыртчöмöн. Сідзкö, колö пасьтавны сöстöм улыс дöрöм, лыддьыны молитва, сьöлöмсяньыд радейтны Енмöс да эскыны сылы.
– Кыдз бурдöдысь, ті вöзъянныд тöлын сунавны йиа йöрданö? Мортыслы оз ло лёк? Либö кыдзи асьтö колö водзвыв дасьтыны, мед пыравны кöдзыд ваö?
– Мед кодкö висьмис Ва вежöдан лун бöрын, татшöмсö ог помнит. Овлö, Воркутаын сунгысьлам 32 градус кöдзыд дырйи. Кольöм во Межадорын йöрданö пыралі, комын сайö жö вöлі кöдзыдыс. Дерт, асьтö колö дасьтыны. Тöлысьöн водз кисьтасьны шоныда-кöдзыда ваöн. Сэсся бурдöдысьяс кö оз тшöктыны, йиа ваö пырны оз позь, торйöн нин сьöлöмöн нёрпалысьяслы. Вежа ваöн позьö мыссьыны, юны сійöс, тадзисö дзоньвидзалуныд ёнмö жö. А ми Казанскöй храмын купельö суналам. Йöз водзö петкöдчöм могысь йöрданын ми ог келалöй.
– Вежа ва отсалö уна висьö- мысь, йöзыс та йылысь ёна нин сёрнитісны. Гашкö, ті верманныд казьтыштны кутшöмкö дивö?
– Дивöыс, дерт, уна. Ог шу, мый колö шыбитны став лекарствосö да сöмын вежа ваöн ёнмöдчыны. Но нёрпалысьяслы быть колö юны вежа васö.
– Январь 19 лунö йöзыс ведраясöн, флягаясöн босьтöны вежа васö, мед дыр тырмас. А сэсся, коляс да, оз тöдны, мый сійöн вöчны. Быть колö во гöгöр видзны татшöм васö, и выныс оз быр?
– Вежа валöн выныс некор оз быр, бура кö сійöс видзан. Öти войт вермас вежöдны таз тыр ва, и нинöмла ведра-фляга тыр гумлавны.
– А кыдзи колö сійöс видзны?
– Ен öбраз дорын. Видзöдлыны кö физика боксянь, вежа ваыд аслыспöлöс. Тöдса, ваыд вермö ас пытшкас босьтны и бурсö, и лёксö. Сідзкö, вежöдöм ва юигöн кö матькыштан либö омöльтор шуан, ваыс вежсяс и выныс сылöн мöдпöлöс нин лоö. И некутшöм висьöмысь сійö оз нин отсав.
