Юрысь оз петавлы öти казьтылантор. Öні менам чужанiнын да быд-манiнын, Луза дорса Пöрубын, коли некымын олысь. А кöнкö во комын вит-нелямын сайын на сöмын "Спаспорубскöй" совхозлöн "Броневик" öтар юкöнас вöлі матö 100-150 морт. Мöдарас, "Борецын", нöшта на унджыкöн зілисны.

Быдлаын видзисны скöт: мöс, кукань, вöв, а водзтi и порсь на. Совхозлöн вöліны паськыд муяс, 350-450 кымын гектар. Менам дзолядырйи, помнита, кöдзлісны весиг ид да сю. Картупельсö вöлi пуктöны 60-80 гектарöдз. Арнас, кос поводдя дырйи, муяс вылын муркöшитчис куим комбайн. Налы отсöг вылö ыджыд урожай идравны волісны карса студентъяс. Петавлiсны и школаысь гырысьджык классъясын велöдчысьяс. Гожöмнас котыртлiсны силос заптан да турун пуктан мехколонна, кодi арнас сэсся картупель босьтны вуджлiс.

Страдна кадö нёль час асывсянь вöлi тракторъяс силостö заводитöны ваявны-талявны. Кöкъямыс час асылöдз уджаласны, сэсся здук-мöд шойччыштöм бöрти дзик пыр мунöны кос турун куртны-чöвтны. Квайт час гöгöр бара кутчысьöны силосö. И тадзи быд лун кöкъямыс час рытöдз. Пажнайтiганыс öти час кежлö и кусöдлöны кöрт вöвъяссö.

Кытчö тракторöн оз сибавны — берег дорсö да Пöруб ю мöдлапöвсö, торъя бригада киöн пуктылiс. Асывнас водз колö петны кöсанад ытшкыны, геб-ном садьмытöдз да лысва усьтöдз. Восьлалöны öта-мöд бöрсяыс ытшкысьяс, еджыд гач-дöрöмаöсь, быттьö маскхалатаöсь. А лун шöрнас кылан — аньяс да том нывъяс куртiгмозыс ливкйöдлöны быдсяма сьыланкывсö да сэтшöма мичаа да лöсьыда, кöть рытöдзыс кывзы.

Том йöз тшöтш петöны идравны турун. Кöть и ичöтик нажöткаыс, век нин кутшöмкö отсöг бать-мамлы. Мужичöйяс да гырысьджык том зонъяс чöвтöны зорöдъяс. А посниулов ваялöны вöлöн турун юръяс, зільöны öдйö-джык эштöдны ставсö да котöртны вадорö купайтчыны. Да, гажа вöлi кадыс…

Но олöмыс Пöрубын ньöж-йöник пондіс кусны, быттьö лампаын быри карасиныс. А мыйла эськö сідзи лои, мый понда?

Менам та вылö сöмын öти вочакыв — веськöдлысьяс дугдісны тöждысьны том йöз вöсна, отсавны налы олöмас. Ныв-зонлы весиг велöдчынысö лои некöн. Школа да кага видзанін пöдласисны. Бурдöдчанін абу. Висьман кö, колö мунны дас вит километр сайö Спаспорубö. А подöн кö он кöсйы, колö тöрöдчыны трактор телегаö, кöні сулалö нин йöв тыра 30 фляга да йöршитчöма дас кымын морт. Туйыс сэтшöм омöль, мый тракторыс джынвыйö вöйö няйт пиас. Но некодлы сыöдз мог абу. Арнас школаö челядьлы колö подöн мунны 12-15 километр. Вежон оласны интернатын, а бать-мам шогсьöны, кыдзи-мый сэні кагукъясыс олöны-велöдчöны. Воласны гортас сöмын субöта-вежалун кежлö мыссьыны-пывсьыны да босьтны мыйтакö сьöм.

Водзтi Пöрубын вöлі ыджыд велöдчанін. 8 классыс кык, 7 классыс кык жö, мукöдыс нöшта унджык. Но воис кад да, ставсö мöдісны пöдлавны. Велöдысьяс оз локны татшöм сиктад, кöнi абу оланін да некутшöм аскиа лун. Рытнас пыр этша-джык йöз кутісны волывлыны клубö. Кинотö некодлы петкöдлыны лоис.

Унджык том йöзыс мунiсны карö. Сэні петiсны верöс сайö либö гöтрасисны. Во-лöны гортаныс бать-мам дорас сöмын гожöмнас отпуск дырйиыс, вежон-кыкöс оласны — и бöр карö шлывкнитöны. Водзтi сы мында том йöз вöлі жуö, а öнi морт дасыс кö лоö и сiйö бур.

Босьтны кö, шуам, миян сиктысь "Броневик" юкöннымöс. Нёль нывбабалы вöлі сетöма уна челядь вайöмысь орден. Елена Осиповна Ракина, Мария Илларионовна Лобанова, Анна Ивановна Лобанова вайлiсны-быдты-лiсны сизим челядьöн. Тамара Степановна Лобановалöн квайтöнöсь вöліны. Сöмын тайö нёль семьяас кызь сизим зон да ныв быдмис-туис. Му-кöдыслöн куим-нёль кагаысь этша эз жö вöв. Сиктын жö сулаліс комын вит керкаöдз. Со и лыддьöй, мыйта том йöзыс вöлі. И пöшти ставныс мунісны юрсиктö да карö...

Казьтывла, кутшöм олöмыс войдöр вöлі да, горшöй гöрддзасьлö, синваöй петö. Чужанiнсö, сэтшöм мича пельöссö, колисны том йöз. Эта ыджда эрдъяс вылад позьö быдтор быдтыны. А öні найö тырисны бадь-кыддзöн. Муяссö лои нинöм-ла гöрны да пуктыны. Тракторъяс вузалiсны. Ньöбисны найöс ас кок йылас зумыда сулалысьяс. Найö жö и скöтсö босьтісны, а мукöдсö начкисны дай. Нинöм сиктын эз коль, удж ни нажöтка абу.

Верман кö, дерт, вöрыштны, аслад мöскöн да йöрöн позьö на кыдзкö-мыйкö тöв-йыны. Коді мый вермö, сiйö и вöдитö град вылас: капуста, морков, свеклö да оз на дзикöдз тшыгйöдчы. Том-джыкъяс тшак-вотöс сдайтыштöны да, куритчан да нянь ньöбöны. Эмыштöсь на вöралысьяс да чери кыйысьяс. Но веськыда кö шуны, Пöрубын кольысьясыс оз овны, а сöмын мусö талялöны, олöмыс бырис-вошис кытчöкö.

Веськöдлысьяссянь талун кывлан, эновтöм сиктъясысь муяссö пö колö сетавны йöзлы, мед скöт видзасны да пуктас вöдитасны. А мыйла нö эськö найö сикт-совхозъяссö кисьтiсны-куштісны?! Мыйла "нерентабельносьт" вылö ыстысьöмöн ставсö пасьвартiсны?! Совхозтö кутöм могысь колö трактор-машина. Сэсся ломтас-мавтас, запчасьт, урожайлы — тöвбыд видзанiн. Уджалысьяслы — вогöгöрся нажöтка. Быдлаö колö сьöм. А веськöдлысьяслöн сöмын öти вочакыв — сьöм абу. А пöдлалан совхозтö да, юр висьöмыд бырö.

Сиктъяс бырöны, а шойна вылын гуыс содö. Со мыйöдз йöзсö вайöдiсны. И воысь-во олöмыс лоö пыр омöльджык.

Помнита, Коми Республикаса Юралысь Юрий Спиридонов некымынысь воліс "Спаспорубскöй" совхозö, кайлывліс и Пöрубö. Сыкöд сёрнитны чукöртчывлiс уна йöз. Ёна и юасисны Юрий Алексеевичлысь быдтор йылысь. Юралысь быдöнлы зiлис тöлкöн-ладöн воча- видзны, пöрысьлы и томлы. Öти татшöм чукöртчылігöн Юрий Алексеевич шуис, ме пö бура тiянöс гöгöрвоа: Пöрубныд кусö, но, чайта да, верма неуна сьöлöмъяснытö личöдыштны. Ми пö ёна мöв-палiм веськöдлысьяскöд да шуим сиктаныд бöр лов-зьöдны ыджыд, ён совхоз. Локтасны пö татчö Воркутаысь йöз, вöчасны тiянлы асфальта туй. Кыпöдасны челядьöс видзанін, школа, клуб, неыджыд стадион, том йöзлы оланiн лöсьöдасны. Шахтаяс пö öнi пöдлалöны да, налы быть кöнкö колö водзö овны да уджавны. Сов-хозад бара на кутасны бур скöт видзны. Унатор на висьталіс-мойдiс Юралысь. Ставныс ёна и нимкодясисны татшöмторйыдлы, мöдiсны виччысьны мöд олöм.

И Юрий Алексеевич кывсö збыльысь кутіс. Регыд мысти нин Пöрубöдз вöчисны чорыд веркöса туй. Водзтi тракторнад юрсиктöдз колö вöлі мунны кык час, а öні машинаöн тюран 15-20 минутöн. Кыпöдісны школа да детсад улö кирпичысь кык судтаа ыджыд стрöйба. Быдса улича пöлöн лэптiсны керкаяс, мед локтiсны йöзыс да овмöдчисны сэтчö. Но бокöвöйяс эз и воны. Сиктса томджык семьяяс вуджисны, а школа-сад стрöйбасö эштöдöм пыдди джынвыйö бöр разисны да эновтiсны. Эз удитны выль совхозтö лэптыны — Юралысьыд вежсис. Сы пыдди пуксьöм Владимир Торлопов, гашкö, эз и тöд, мый кöнкö Луздор районын эм Пöруб, кöнi кöсйисны выльмöдны коркö ылöдз нималысь колхоз. Да и колiс-ö сылы эновтöм öти сиктыд? Республика пасьта со мыйта сэтшöмыс...

А мыйла буретш öнi воис юрö Юрий Спиридонов йылысь казьтылöмыс? Сы понда мый мортыс, кöть и Юралысьöн вöлi, эз вышитчы, кужис сибавны йöз дорас.

Коркö ми ёрткöд паныдасим сыкöд ельдöг öктігöн. Буретш пажын кадö найö нёльöн нуръясисны. Ми матыстчим на дорö, эгö öд тöдöй, мый сэні тшöтш Юрий Спиридонов. Чолöмасим тöдтöм йöзкöд. Юрий Алексеевич сувтiс, кисö миянлы нюжöдлiс да корис öтлаын пажнайтны. Но ми сiйöс аддзöм бöрын повзимкодь да шуим, мый эгö на тшыгъялöй. Юрий Алексеевич жö тшöктіс пуксьыны да висьтасьны, кодъяс ми да кытысь, кутшöм сиктысь. Висьтасьöм бöрти сiйö вочави-дзис миянлы: "Да, жаль, мый унджык том йöзыс мунiсны этатшöм мича да гажа пельöсысь. Эськö кутшöм бур олöм позис лöсьöдны. Но колö видлыны бöр кыпöдны сикттö. Вот тi меным веськыда висьталöй, локтанныд онö, том йöз, бöр чужанінад, ловзьöдам кö совхозтö? Лоас кö школа, челядь видзанін, оланін, выль вузасянін, клуб, мукöдтор? Сöмын веськыда висьталöй, ылöдчытöг". Ми веськыда и висьталім: "А мыйла нö огöй, локтам. Удж кö лоö да позяс кö овны кöнкö, бöр на мöдасны локтавны том йöзыс асланыс чужан му вылас". Миян татшöм кывъяс бöрын Юрий Алексеевич дыр мыйкö мöвпалiс ас кежсьыс, а сэсся сетіс кыв, мый ставсö вöчас томъясöс сиктъясö бергöдöм могысь.

Да, Пöруб сикт кусö. Гожöмнас локтан гу вылö бать-мамтö казьтыштны, видзöдан да, сэні ставныс карысь воöмаяс. Ветлан чужан-быдман керкатö видзöдлыны, öти здукöн став олöмыд син во-дзад лэбыштö. А сикт пасьтала шы оз кыв, весиг пон оз увтышт. Сьöлöмыд нюкыртчö да öдйö бöр мунан карö.

А водзтi вöлі майбырыс! Кодкö гораа авзö либö пинясьö, мöсъяс баксöны, понъяс увтöны, кук-ыж шöйтöны, трактор-пила шы ывласö сёр рытöдз поткöдö. Рöмдыны кутас да, петöны гуляйтны томджык ныла-зонма. Коді волейболöн ворсö, коді джуджыд качай вылын "лэбалö". Вой шöрнас сэсся кыдзкö-мыйкö разöдчасны, мед водз асывнас кок йыланыс нин сувтны. Со кутшöм вöлі кадыс, а öні...