Луздор районысь Ручпозъя – важся коми грезд. Водзынсö сэні олöмыс пуöмöн пуöма. А öні сöмын кык керка öшиньын öзйö би. Олöны Ручпозъяын кык семья – Ивановъяслöн. Öтарыс кык челядя том гозъя, а мöдарыс öтка баб – Лидия Афанасьевна.
Вöр-валöн сывйын
Екатерина Анатольевна да Михаил Константинович дас сизим во нин олöны Ручпозъяын. Тöдмасьöмаöсь найö клубын йöктігöн. Öта-мöдныслы важöн нин сьöлöм сертиныс вöлöмаöсь, но радейтöм йылысь яндысьöмаöсь висьтавны. Сэсся öти рытö ныв смелмöдчöма да матыстчöма Михаил дорö. "Колльöд гортöдз!" — сöмын и артмöма Екатериналöн. Тайö вöлöма радейтчöмлань медводдза воськов.
Регыд Екатерина да Михаил кутöмаöсь овны öтлаын. Быдтöны кык челядьöс. Ивановъяслöн ыджыд овмöс, видзöны уна скöт. Гозъя муркöдöны гортса уджсö öтвыв.
—Ті том йöз. Абу шуштöм овны кушмöм грездын?
—Кыдзи вермас лоны гажтöм вöр-валöн сывйын, — нюмъялö ань. —Керканым сулалö мойдын кодь мичаинын, а дінын радейтана верöс да челядь.
Гозъя шудаöсь Ручпозъяын. А мый сэсся колö мортыдлы?
Аслад паччöрыд медся муса
Лидия Афанасьевна Ручпозъяö жö верöс сайö петöма. Öні сійö öтнасöн кольöма, воöн-джынйöн сайын верöсыс кувсьöма. Но ас керкаысь мунны оз кöсйы. Весиг овмöс на кутö. А öд сылы таво сентябрын 71 арöс тырöма. Гидас Лидия Афанасьевналöн лысьтан мöс, кукань, порсь, квайт ыж. Яйсö челядьыслы сетö, вурунсьыс налы жö кепысь-носки кыö. Град йöрас быдсямасö жö быдтö.
Мамыслöн Лидия вöлöма öтка ныв. Батьсö нулöмаöсь война вылö да сэтысь бöрсö абу и волöма. Лидия Афанасьевна öнöдз оз тöд, кытчö батьыс юрсö пуктöма. Дзолядырйиыс быдсяма сьöкыд уджсö ковмöма сылы вöчны, кызвыннас колхозын мырсьылöма. Дерт и, тшыгъявлöма.
—Видз вылысь бобöнянь да шыранькытш вöлі öктам. Мыйкö öд сёй, — казьтылö олöма ань.
Велöдчылöма 7 класс. Да и сійöс öдва помалöма, сы вöсна мый мамыс велöднысö абу вермöма.
—Велöдчыныд окота вöлі, — водзö казьтылö сійö. — Мамлысь весиг деньгасö сундуксьыс гусявлі, медым книгаяс ньöбны. Леткаöдз подöн вöв бöрсяыс лэччылі.
Ручпозъяын лавка абу. Лидия Афанасьевна няньсö пöжалö ачыс. Но сöмын нянь он акляв. Вежыд и мукöдтор вылö петö. Дерт, челядьыс вайöны вöлöгасö. Но дзик на вылö надеяöн оз на ов. Баб подöн ветлывлö Мутничаöдз. Ручпозъясянь сэтчöдз кык верст лоö.
—Ен сыкöд, кокöй нуö на да, — шуö Лидия Афанасьевна.
—Öтнад он пов? Челядьыд дорö он кöсйы овмöдчыны? — юася сылысь.
—Ачым на вöрöдча да, — висьталö баб. — Да и аслад паччöрыд медся муса. Челядь менö видлыны волöны. На вылö ог элясь. Со ёрт пыдди Шарик пон ви-дза. Луннас телевизор ви-дзöдышта, радио кывза. Телефон эм. Ас керкаад, майбыр, абу на гажтöм.