Сыктывкарысь Ольга Сметаниналöн öкмыс челядь. Медыджыд нылыслы дас кöкъямыс арöс, а Андрюшалы тöлысь на абу.
Мыйта Енмыс сетас
Красноярскысь Комиö Ольгаöс вайöдöма тьöткаыс. Овмöдчöма Усинскö. Медасьöма мусир перйысьяс дорö пусьыны. Тöдмасьöма коми мужичöйкöд. Регыд и öтлаасьöмаöсь Владимир Адриановичыдкöд.
Но быдторйыс тай олöмад овлö. Сідз артмöма, мый Ольга медводдза кагасö перйöма. И том гозъялы лов вылас зэв сьöкыд лоöма, кылöмаöсь асьнысö мыжаöн.
—Ен водзö пидзöсчаняси да прöща кори, — висьталö Ольга Ивановна. — Кöсйыси, мися, мыйта сетан челядьсö, сы мында и чужта.
Бать-мамыслöн найö вöлöмаöсь куимöн. Ольга медыджыд. Ань пыр мöвпалöма, мый куимöс жö быдтас. Но Енмыс сылы öкмысöс нин сетöма.
—Дерт, быдтысьнытö сьöкыд. Но шудыс öд челядьын и эм, — медся ичöт пиуксö нёньöдігмоз висьталö уна челядя мам.
Уджйöза налькйö
Важ йöз шулöмаöсь, шудыд да шогыд пö орччöн ветлöны. Ольга да Владимир Сметанин гозъя тавоöдз олöмаöсь Усинскын. Гожöмнас найö вуджöмаöсь Сыктывкарö. Но уна челядя бать-мам юркарын веськалöмаöсь налькйö.
Кыдз найö висьталöны, Усинскын Сметанинъяслöн вöлöма вит жыръя патера. Найö окотитöмаöсь вуджны лунвывланьджык. Ань пыр декретын пукалö, челядьнысö быдтö. А Владимир Адрианович нэмсö мусир перъянінын зільöма да мукöд мужикулов дорысь водзджык пенсия вылö петöма. И со налöн öти тöдса висьталöма, позьö пö вежны патерасö да овмöдчыны Сыктывкарö.
—Пыр и звöнитчим газетын йöзöдöм телефон номер серти, — висьталö Ольга Ивановна. — Шуисны, юркарын патераыс нёль жыръя, но оланіныс миян дорысь ыджыдджык. Нöшта на и гараж эм. Сёрнитчим, мый вежсям.
Сыктывкарö овмöдчöм бöрын Сметанинъяслы воöма вот службасянь письмö. Патера вузалöм-ньöбöмысь найö уджйöзаöсь государстволы витсё сюрс сайö шайт.
—Шыöдчылім нин вот перйысьяс дорö, висьталім, мый ми ог вермöй вештыны сы мында уджйöзсö, — шогсьöны Сметанин гозъя. — Но насянь письмöяс öтарö воöны. Дивö, мый уджйöзаöсь налы и миян тыр арлыдтöм челядь. Уджйöзсö ставным вылö юкисны да, ветымын сюрс гöгöр быдöнлы колö вештыны.
Сметанинъяс эськö эз шедны уджйöза налькъяс, Усинскын патеранысö кö асэмбуралісны куим воысь дырджык сайын. Но вöчöмаöсь тайöс сöмын во кык сайын.
—Та йылысь патераöн вежсигöн миянлы некод эз висьтав. Тöдöмöн эськö эг жö уджйöзасьöй, — нормöма ань. — Кытысь öні чуктöдам сы мында сьöмсö?
* * *
И збыльысь, Сметанинъяслы патера вузалöмысь уджйöзсö быть ковмас вештыны. Дерт, тыр арлыдтöм челядьлысь вот оз перйыны. Но на вöсна, оланпас серти, кывкутöны бать-мам.
