Кыв туялысьяслöн зільöмöн коми кыв воысь-во озырмö да тшöтш и ...мустöммö. "Коми му" газетö унаöн нин шыöдчылісны элясьöмöн, мыйла пö гижанныд тöдтöм кыв вылын. А öні со дöзмöмаöсь и Кöрткерöс районса Одыбысь бать-мам. Нэмöвöйся коми сиктын локтан велöдчан восянь оз кöсйыны велöдны комисö кыдз чужан кыв, а рочьяс моз жö "веркöссяньыс тöдмасясны".
Кагалöн гудыртчö юр
—Вывті ёна "комиöдöны" да, асьным ог гöгöрвоöй, —висьталö Лидия Михайлова, кодлöн нылукыс таво ветлö первой классö. — 2-öд класса выль учебникъяссö пет-кöдлісны да, юрсиöй сувтіс. Став терминсö комиöдöма, öти гöгöрвоана кыв абу. А öд сёрниыс мунö ас чужан кыв йылысь!
Одыбса бать-мамлы забеднö и сыысь, мый налöн коми челядь кодсюрö öдва "три" вылö велöдчöны. Потан дорсяньыс на кылöны пöль-пöчлысь кыв, асьныс сёрнитöны сöстöма, а урок вылын тöдöмлуныс оз тырмы. Мыйла? Да сы вöсна, мый коми кывнас "гудравнысö" оз кужны. Кодлы нö пö выль тöдтöм кывйыс колö, гортын кö сійöн ог сёрнитöй?
—Визябöжын племянничаöй комисö велöдö. Ачыс роч, гоз-мöд торъя кыв и тöдö, а дневникас сöмын "витъяс", — шензьö Одыбысь öти мам. — Миян челядьлы и аслыным таысь öбиднö.
Дерт, одыбса оз рочмыны. Кыдзи войдöр сёрнитлісны чужан кывйöн, сідзи и водзö кутасны. Но öнія выль кывъясöн вöдитчыны оз кöсйыны.
—Челядьлöн юрыс дзикöдз гудыртчас выль коминад, — шуасьö Лидия Владимировна. — Гашкö, татшöм кывъяснас колö тöдмöдны гырысьджык классъясын, а начальнöйын, чайтам, вывтіасьны оз ков. Мöдарö эськö майшасям жö. Вуджам кö комисö кыдз государственнöй кыв велöдан программа вылö, челядьлöн тöдöмлуныс этшаджык лоö.
Кыдзи велöдны?
Збыль-ö Одыбса школаын велöдчысь челядь кутасны велöдчыны коми кыв урок вылын рочьяс моз?
—Медым велöдны комисö кыдз государственнöйöс, та кузя шыöдчöмсö некод на эз гиж, — шуö начальнöй классъясын велöдысь Валентина Михайловна Подорова. — Но бать-мамлы збыльысь позьö бöрйыны велöданногсö, та йылысь ми налы висьталім. Дерт, сэки вежоннас час лыдыс лоö этшаджык. Кутам тöдмöдны коми гижысьяслöн творчествоöн, коми культураöн, велöдам лыддьысьны.
Бать-мамöс дöзмöдöны выль коми кывъяс, комиöдöм терминология. Гортса удж вöчигöн челядьыслы отсасьны оз нин вермыны. Водзынсö коми кыв вöлі рочлы подулöн. Медводз вöлі чужан кыв вылын велöдам существительнöйтö, а сэсся роч кыв урок вылын бара быттьö сы дорö бергöдчылам. А öні став терминсö комиö-дöма да артмö, мый коми кыв лоö кыдз коймöд иностраннöй.
Збыльысь гöгöрвотöм?
Ми шыöдчылім Коми Республикаса небöг дасьтан шöринын старшöй научнöй сотрудник Валентина Грабежова дорö. Збыль-ö выль учебникъясын уна гöгöрвотöм выль кывйыс?
—Комиöдöм терминъясöн вöдитчам ог нин öти во, — висьталö Валентина Михайловна. — Шы, шыпас, сёрникузя, эмакыв — ставыс тöдса нин. Öні пыртім найöс и начальнöй классын велöдан небöгъясö. Дзик ставсö гöгöрвоöдöма и юалöмъяс, и серпасъяс отсöгöн.
—Кор дасьтанныд зонпоснилы татшöм небöгъяссö, сöветуйтчанныд школаын велö- дысьяскöд, пыртанныд налысь вöзйöмъяс? Гашкö, збыльысь сьö-кыд гöгöрвоны да?
—Школаяскöд миян йитöдыс зэв топыд. Ми ветлывлам велöдчанінъясö, тöдмöдам педагогъясöс асланым уджъясöн. Мыйкö найö ассяньыс вöзйöны, мыйкö тшöктöны киритны. Овлö, ставсö выль пöв лöсьöдам. Да и асьным ог вывтіасьöй. Думайттöг быд выль кыв ог жö пыртöй учебникъясад. Ме и ачым уджавлі школаын да мыйсюрö гöгöрвоа жö велöданногас.
—Коми бать-мам шуасьöны, мый уна гöгöрвотöм кывйыс, пыртöма пö и диалектысь. Тайö сідз?
—Учебникъяссö дасьтам велöдчысьлы, а ог налöн бать-мамлы. Да, эмöсь сэні сёрнисикасъясысь кывъяс, но öд найö озырмöдöны комисö. Öд миянлы колö коми кывсö видзны да сöвмöдны. Та могысь и пыртам сёрнисикасысь кывъяс да ловзьöдам важсö. Ми найöс торъя пас улын гöгöрвоöдам. Быд учебникын эм кывкуд. Öткымын коми терминыс вöлöма нин революция бöрын. Но сэсся заводитім рочмыны да вочасöн вунöдім.
—Сідзкö, бать-мам весьшöрö шызьöмаöсь?
—Да. Мöд классянь челядь кутасны велöдны и англия кыв. А сы кузя налы став кывйыс да терминыс тöдса? Али гортас öта-мöдыскöд английскöйöн варовитöны? Нималана коми гижысь Геннадий Юшков на шуліс, гортса кывйыд пö зэв гöль и колö сійöс сöвмöдны. Начальнöй классъяслы öнія небöгъясыс пуктöны ныв-зонлысь сёрнисö сöвмöдöм-озырмöдöмö ыджыд пай.
—Валентина Михайловна, шуам, одыбса кö збыльысь вуджасны коми кыдз государственнöй кыв велöдан программа вылö, челядьлöн тöдöмлуныс чинас, грамматика боксянь, дерт, юася?
—Чинас, дерт. Мыйла коми кагаыслы выль пöв висьтавны пань — ложка, кань — кошка, видза олан, аддзысьлытöдз? Коми мортöс кутасны велöдны комиöн сёрнитны? Дивö?! Чайта, нинöм лёкыс оз ло, велöдчас кö коми кага сёрнитны сідз, кыдз индöма учебникын. А пондас кö сійö велöдны комисö кыдз государственнöйöс, бырö коми сиктысь чужан кывйыс.