Неважöн НТВ телеканал петкöдліс "Таинственная Россия: Республика Коми. База внеземных цивилизаций?" передача, кöні висьталісны, мый Кöрткерöс районса Висер вожын олöны крокодилъяс. Тайö телепередачаыс шызьöдіс сэтчöс олысьясöс. И эз сöмын сэтчöс...
Висер вожын крысаяс оз овны
Шöр телеканалса журналистъяс заводитöны сысянь, мый Висер вожын абуöсь крысаяс. Но тайöн сэтчöс йöзсö он чуймöд. Войдöр сиктъясö шыдöс-пызьтö да мукöд вöлöга вайлісны баржаясöн. Дерт, сёян пöвстад ю кузя шлывъялісны и крысаяс. Но кор баржа воліс Гöрд чой дорöдз, кортöм "пассажиръяс" шызьылісны да сьöрсьöн-бöрсьöн чеччавлісны веськыда ваас.
"Таинственная Россия" телепередача снимайтысьяс катер вылö аскöдныс тшöтш босьтöмаöсь крысаясöс. И збыль, Висер ю кузя кывтігöн найö быттьö дурмисны да заводитісны гöгравны-пестуйтчыны клеткааныс. Снимайтан котыр кодсюрöлы лэдзисны мездысьны кулöмысь. Клетка öдзöс восьтöм бöрын гыжгунъяс öта-мöдсö ордйöдöмöн чеччалісны ваö. Гоз-мöдöс журналистъяс катöдісны Висерöдз да лэдзисны сикт шöрас. Видзöдісны, мый накöд лоö. Но, дерт, некод на пиысь Висерö эз поздысь.
Лэбалöны мöд мусаяс да Зарни Ань
Мыйла Висер вожын оз овны крысаяс? Та вылö вочакывйыс учёнöйяслöн да и сэтчöс олысьяслöн уна. Öтияс чайтöны, мый сэні аслыспöлöс турун быдмö, мöдъяс шуöны, мый муыс повзьöдлö. А "Таинственная Россия" снимайтысьяс серти лои, мый татчöс пармаын мöд муясвывса олысьяслöн базаыс, лэбалö сэні и Зарни ань. Да, тыдалö, найö и повзьöдлöны ёсь пиняясöс. Москваса журналистъяслы висерсаяс быттьö висьталöмаöсь, мый мусяньыс кылö гора шы. Мукöддырйи сэтшöм гора, мый сиктсаяс весиг узьны оз вермыны.
—Меным тай некутшöм шы узьны оз мешайт-а, — висьталіс Висерса öти ань. — Кымын во нин тані ола, нинöм на эг кывлы.
—Сöрöм тайö ставыс. Дас куим во уджалі лесникöн, кытшлалі Висер, Одыб, Лымва гöгöр парма, кык вежонöдз сэні узьлі, но некутшöм лэбалысь дивö эг аддзыв да муысь шы эг кывлы, — висьталö Леонид Игушев.
Лымваын олöны... крокодилъяс
НТВ телеканалса журналистъяслы тайö сöрöмыд этша на кажитчис. Передачасö суктісны нöшта öти дивööн — Висер да Лымва юясын олöны крокодилъяс! Дерт, висервожсаясысь та йылысь некод эз висьтав. Кодлы нö окота ас йöз водзын янöдчыны?
Но "дивö корсьысьясöс" тайö эз падмöд. Найö быттьö кайисны Лымваöдз (кöть эськö одыбсаяс шуöны, мый машинаяснас НТВэшникъяс Ньывсер юсö вуджны, а сідзкö, и эновтöм грездöдз воöдчывны эз вермыны) да кутшöмкö киссьöм сарайысь аддзисны муртса на чужöм крокодиллысь юрлысö! Да висьталісны на, быттьö пö крокодилписö сёйöма сиктса пон. Но öд Лымваын матö кызь во нин некод оз ов. Сэтысь йöзыс заводитісны мунавны война бöрын нин.
Сідзкö, кодлöн пö тайö юрлыыс? Крокодилпилöн? Висервожса кыйсьыс-вуграсьысьяс серти, Москваса журналистъяс петкöдлісны сир юр, кодöс асьныс жö и пуктісны киссьöм сараяс.
Яндысьтöг сöрöны
Дöзмöдіс тайö телепередачаыс эз сöмын висервожсаöс, тшöтш и Коми наука шöринын уджалысьясöс.
—Нинöм абусö сöрисны! Абу тай яндзим! — дивитана шензьö Коми наука шöринысь этнограф Ирина Ильина. — Тыдалö, сэтчöс чери кыйысьяслысь корисны сир юр да крокодиллысь пыдди шуисны. НТВ телеканалса тешитчисны и висервожсаяс, и учёнöйяс вылын. Няйтöсьтісны найö Михаил Рогачёвлысь да Валентина Филипповалысь нимъяссö. Öд буретш найö висьтасисны передачаын.
Ирина Васильевналы НТВ-са вöзйöмаöсь жö снимайтчыны тайö телепередачаас, но пыксьöма. Некымын во сайын этнограф ачыс веськавлöма налöн "налькйö". Сэки Москваса журналистъяс снимайтöмаöсь йöзкостса бурдöдчысьяс йылысь. Шыöдчылöмаöсь Ирина Ильина дорö, мед висьтыштас тöдысьяс йылысь. Öд сійö уна во нин туялö налысь уджсö.
—Кор ме аддзи передачасö, шогö уси, — казьтылö Ирина Ильина. — Найö орйöдлöмаöсь менсьым сёрниöс да кытчöсюрö сюялöмаöсь. Артмöма сöрöм, кыдзи и öні.