Виктор Савин нима драмтеатрын пуктісны Уильям Шекспирлысь "Гамлет". Шöр рольсö – Гамлетöс – ворсіс Анатолий Федоренко. Талун сійö "Коми му" газетлöн гöсьт.
Артисталысь слесарь
Татшöм йöз йывсьыс рочьяс шулöны — "звёздный мальчик". Збыль, Анатолий Федоренколöн кодзулыс чужöмсяньыс öзйöма. Артиставны сійö заводитöма садйö ветлöдлігас на. Медводдзаысь ворсöма Пöльöс "Курочка Ряба" мойдын.
—Садйын мыйлакö пыр меным вичмыліс ворсны олöма йöзöс, — нюмсорöн казьтылö Анатолий Петрович.
Ичöтдырйиыс öти пöрйö сійö кöсйöма лоны археологöн. Но медсясö Анатолийöс кыскöма искусство. Ветлöдлöма драмкружокö, пионеръяслöн керкаын ворсöма аканьяса театрын. Верстяммыштöма да ветлöдлöма "Фантреальность" студияö. Кыдз шуласны, пыр вöлöма сцена вылын. Но школа бöрас сійö бöрйöма... слесарлысь профессия.
Неуна уджыштöм бöрын Анатолий Федоренкоöс босьтöмаöсь армияö. Служитöма ракетнöй часьтын. Ас да служитöм йылысь висьтасьны налы оз вöлöм позь. Коркö Мирный карын Анатолий веськавлöма госпитальö.
—Анькытша шыд пуигöн сотчи, — нюмдіс сійö. — Госпитальын весиг ним-овöс да кутшöм часьтын служиті оз вöлі позь висьтавны. Гижисны менö "прочий" ним улын. Выль во водзын мела локтісны командиръясöй да бурдöдчанінысь эз и аддзыны. Налы шуöмаöсь, мый Анатолий Федоренко нима висьысь на ордын абу. Сэсся тöд вылас усьöма жö налы, а, гашкö пö, "прочийöн" пасйöмаöсь.
Армия бöрас Анатолий Федоренко видлöма пырны велöдчыны ГИТИС-ö, но кыдзи ачыс шуö, сконйыштöма грамматика.
—Коліс гижны сочинение. Öшыбкаöй вöлі уна да, мöд турас эг и веськав, — казьтылö сійö. — Локті бöр гортö слесаравны. Уджалі ЛПК-са ТЭЦ-ын.
Но аслас кöсйöмысь абу лэдзчысьöма. Удж бöрас ворсöма спектакльясын Эжваса культура керкаын. И 1991 воын бара видлöма пырны ГИТИС-ö. Мöдысьсö артмöма нин. Велöдчöма Марк Анатольевич Захаровлöн режиссёрско-актёрскöй факультетын.
—Меным мойвиис, сочинениетö сэсся эз нин гижöдны, — висьталö Анатолий Федоренко.
Эз чайт лоны Гамлетöн
—Быд артист окотитö ворсны Гамлетöс. Искусствоын тайö аслыспöлöс медвылі тшупöд. Ті ворсінныд нин сійöс. А водзö мый?
—Ме ог шу, мый олі сöмын Гамлет йылысь мöвпъясöн. Драматургияыд зэв паськыд, ставсö он ворс. Дерт, ыджыд аттьö режиссёр Олег Нагорничныхлы, мый лэдзис меным ворсны Гамлетöс. Зэв ыджыд удж лои вöчöма да и водзö на мунö.
—Кор драмтеатрын мöвпыштöмаöсь "ырыштчыны" Шекспир вылö, Олег Нагорничных, кыдзи ачыс висьталіс, медводз ассьыс юалöма, а эм-ö пö Гамлетыс театрын? Да дзик пыр тіян йылысь и думыштöма. А асьныд чайтлінныд, мый ті — Гамлет?
—Режиссёр бурджыка аддзö, кодлы кутшöм роль индыны. А артмис эз менам Гамлетöс ворсöмыс, донъялас видзöдысь.
—"Гамлетын" тіян кык мам, Гертрудаöс ворсöны Ольга Сосновская да Галина Микова. Кодарыскöд вöлі, гашкö, кокньыдджык, бурджык ворсны?
—Донъявны, дерт, видзöдысьяслы. Чайта, кыкнанныскöд артмис аслыспöлöса. Галина Аркадьевнакöд важöн нин öтлаын уджалам да öта-мöдöс бурджыка гöгöрвоам.
Шойччö вадорын
—Артистъяс висьталöны, кор велöдöны роль, пырöдчöны геройлöн ку пиö, унаысь овлö, найö веськалöны сылöн "налькйö". Татшöмыс тіян вöвлі?
—Дерт, премьера водзын либö сы бöрын заводитла майшасьны, артмис эз, войыс весиг оз узьсьы. Тадзи быд артистлöн овлö. Здук кежлö сурсмунлан да вöтасян, мый кывъясыд вунöмаöсь, а спектакльыс мунö нин. Ырс садьман. Вольпасьын. Вöтаси. Но медым овны спектакльса герой ног, татшöмыс эз вöв. Быдöн ас ногыс "шыбитö" маскасö, петö геройлöн куысь. Ме жö радейта шойччыны вадорын да вöрын.
—Вуграсянныд-вöраланныд?
—Чери кыйны радейта, а ружьеöн ог ветлыв. Пармаын ме вотча. Медсясö радейта ветлывны öтнам, мед некод эз мушшайтчы.
—Чери кыйысьыд радей-тö казьтывны медыджыд чери шедöм либö, мöдарö, мынöм йылысь. Мыйöн ті верманныд ошйысьны?
—Ог радейт сöрны, мый кага юр ыджда синма чери мыні. Шедлывлö, дерт, вугыр вылад ки пыдöс кузьтаыд. А медся ыджыдыс пöшти куим килоа ёкыш вöлі. Кыйлі и стерлядь.
Овлö и пиратöн
Анатолий Федоренко ворсö и мойдъясын. Сэні сійö уджъёртъясыскöд, кыдзи ачыс шуö, вильшасьö. Öд кöнкö сійö пират, кöнкö — рöзбойник. Драма ворсігöн, дерт, ыръянитны оз позь. Сэні ставыс стöча шлывгö. Но, дерт, сцена вылад быдторйыс овлö. Коркö вöлöм ворсöны "Обломовын".
—Петкöдчим ветеранъяслы, — казьтылö Анатолий Федоренко. — Уджъёртöй лыддьö Обломовлысь монолог, синваыс доршасьö. Тадзи коліс спектакль серти. А залын дед да баб сёрнитöны, аддзисны бöрддзöмсö да. Олöма аньыд юалö: "А мый лои?" Мöдыс чöв олыштöм бöрын чуймöмöн вочавидзö: "Нинöм". Кылім налысь варовитöмсö да бöрдöм пыдди ставнымлöн серам петіс.
—Анатолий Петрович, сцена вылын ті овланныд нимкодь руа, вильшасьысь, нор, шог, пират, кыдзи асьныд висьталанныд. А олöмад?
—Сэтшöм жö пират, — шмонитö сійö. — Бöръя кадас, гашкö, мöвпалысь, лöнь.
