Коми Республикаса опера да балет театрын Японияысь йöктысь Мина Окумура бöр мунöма чужанінас, Исикаваö. Сьöрсьыс нуöдöма и ёртсö, театрын жö йöктысь Вадим Можеговöс.

Та йылысь юöрыс кывсис неважöн на, кöть и Мина удж вывсьыс мунöма май помын нин.

—Комиö бöр локны Мина оз кöсйы, — висьталіс театрын йöктысь, сылöн нывъёрт Алёна Панюкова. — Ми сыкöд письмöасям öтуввез пыр, но ас йывсьыс ёнасö оз висьтась. Шуис сöмын, мый аддзöма нин гортсьыс сьöлöм сертиыс удж.

Казьтыштам, Мина Сыктывкарын йöктіс квайт во. Татчö сійöс Перымын государственнöй хорео-графическöй училище помалöм бöрын корис опера да балет театрысь шöр балетмейстер Любовь Сизова. Мина Окумура петкöдчыліс "Встречные ветра", "Лебединое озеро", "Жизель", "Яг-Морт" да мукöд балетын.

Минакöд апрельын сёрнитігöн сійö шуліс, мый мöвпалö восьтыны Японияын балет школа. Велöдчö тшöтш вуджöдчысьö. Кодар ордымсö бöрйис Мина, абу тöдса.