Редакцияö шыöдчис Койгорт районын олысь: юрсиктын куйлан больничаын киссьöма пö йиркыс, а висьысьясöс мöдöдöмаöсь гортаныс. Миян корреспондент аддзысьліс Койгорт районса больничаысь главнöй врач Вадим Мечетинкöд.

Вадим Сергеевич висьталіс, мый зэра поводдяö больничалöн вевтыс пондöма ёна виявны, и унджык куйлысьсö збыльысь лэдзалöмаöсь гортаныс. Найöс, кодъяслы колö быдлунъя дöзьöр да врачлöн отсöг, лэччöдöмаöсь мöд судтаö, кодсюрööс нуöмаöсь Вежъюö, больничалöн сэтчöс отделениеö.

—Больничаын пöтöлöксö гипс плиткаöн эжöма. Найö кöтасьöмаöсь да, ыджыд шыöн пондісны гылавны, повзьöдлыны висьысьясöс. Миянлы быть ковмис лэдзавны куйлысьясöс гортаныс. Но, вермас лоны, кодлыкö тайö эз во сьöлöм вылас, — висьталіс Вадим Сергеевич. — Дзоньтасян уджсö шуöма эштöдны октябрöдз.

Но вевтыс эз виччысьтöг письты. Сійö важöн нин виялöма. Таво урчитöмаöсь сійöс дзоньтавны, кызвыннас вежöмаöсь нин, но вевтсö водз-выв ставнас разьöмаöсь, а став коланасö абу слöймöмаöсь вайны ас кадö. Со и суöма ускöттьöыс.

Вадим Мечетин висьталіс, мый тайö тöлысьö эштöдасны и водзтіджык на панöм дзоньтасян удж хирургия юкöнын. А кольöм сьöм вылас дзоньталасны кага ваянін да челядьöс бурдöданін.

Ставыс больничаын 54 куйлан койка. Сы лыдысь кызьыс — челядьöс бурдöданінын.