Александр Бутыревöс, Удораса ДЮСШ-ысь тренерöс, бура тöдöны оз сöмын аслас районын, но и республикаын. Торйöн нин нимавны кутіс, кор сылöн быдтас Алексей Виценко шедöдіс Германияса Хинтерцартенын лызьöн котралысь том йöзлöн мирса чемпионатын эзысь медаль. Тайö вермöм бöрас Виценкоöс кутісны лыддьыны Россияса медбур лыжникъясысь öтиöн. Гöгöрвоана, мый том спортсменöс ошкигöн нимöдісны и сылысь медводдза тренерсö – Александр Александрович Бутыревöс. Миян корреспондент аддзысьліс сыкöд.
–Ачым ме Косланса. Велöдчигöн на радейті котравны лызьöн, ворсны волейболöн, футболöн. Та вöсна шöр школа помалöм бöрын ёна юрöс эг и жуглы: сеті документъясöс юркарса Куратов нима первой номера педучилищеö, – паніс сёрнисö Александр Александрович. – Физкультура отделение помалöм бöрын, менö, кыдз том специалистöс, ыстісны Удораса Пызьдінö. Дас öти во велöді сэтчöс школаын. А сэсся бöр локті чужан сиктö. Юрсиктад гажаджык. Том йöзыс тані унджык и. 1995 восянь да öнöдз – ме Удораса ДЮСШ-ын тренер...
–ДЮСШ-са тренерыд – öтпырйö и велöдысь, и ассьыс "овмöс" кутысь-дöзьöритысь. Кывлывлі тренеръяссянь, мый ныв-зонкöд уджысь öтдор найö кывкутöны лызьöн котралан трасса весалöм-пелькöдöм, спортивнöй эмбур ньöбöм да нöшта унатор вöсна. Збыль-ö тадз?
–Збыль. Выль сезон заводитчигöн медводз кытшовта трассасö. Лым кö усьöма, писькöда-лöсьöда туйсö "Буранöн". Öттшöтш видзöда, медым сюръяяс вылын öзъяліс би. Кöнкö кö сотчöма лампочкаыс, ачым жö кайла да вежа сійöс. Спортивнöй эмбуртö зіля жö выльмöдны. Челядьыдлы окота выль да бур лызьясöн ордйысьны. Сэсся паськöмыд мед мича жö вöлі...
–Тöдöмысь, дас квайт вонад уна и ныв-зонмöс велöдінныд котравны лызьöн?
–Стöча эг артавлы, но морт сёöс-сё ветымынöс... Дерт, кызвыныс эз лоны нималана спортсменъясöн, но, чайта да, ДЮСШ-ыд век жö колис налöн сьöлöмас джуджыд пас. Тані томъясыд кыдзкö öдйöджык верстяммöны, пыр дасьöсь локны öта-мöдыслы отсöг вылö. Спортыд öтувтö йöзöс, и мый зэв тöдчана – туйдö овны сöвесьт серти...
–А кодъясöн торйöн нин гöрдитчанныд, кыдз тренер?
–Некор эз падмывны сьö-кыдлунъяс водзын менам быдтасъяс, Косланысь спортса мастерö кандидатъяс Вера Логинова да Алексей Карпов. Кута лача, найö нимöдасны на асьнысö ыджыд спортад.
–Алексей Виценкоöс öд ті, позьö шуны, пестуйтінныд-лелькуйтінныд ичöтсяньыс...
–Ме тöдса Алексейлöн мамкöд, Августа Автономовнакöд на. Öтлаын котравлім-ордйысьлім лызьöн. Пиыскöд жö тöдмаси, кор Алексей велöдчис коймöд классын. Локтіс ДЮСШ-ö нач детинка. Быттьöкö нинöмöн эз торъяв мукöдсьыс. Но крепыд вöляа вöлöма. Тренировкаяс дырйи гортас мунлывліс медбöрын. Первойсяньыс шулі, мый сыысь лоас тöлкыс...
–И збыльысь, Алексейлы 21 арöс, но уна ордйысьöмын вöлі нин вермысьöн да тшöтш и призёрöн. Виценкоöс казялісны Россияса сборнöйысь тренеръяс, тшöкыда корлывлöны венласьны медшöр командаö. Öткымын специалист öні нин шуö, мый 2012 воын Сочиын Еджыд Олимпиада дырйи Виценколы вын сертиыс ордйысьны зарни медаль вöсна. Ті эсканныд, мый быд-тасныд вермас "ырыштчывны" меддона награда вылö?
–Ме дорын Алексей вöчис спортын сöмын медводдза воськовъяс. Водзö сійöс босьтчис тренируйтны Комиысь нималана спортсмен Андрей Нутрихин. А сборнöйын сійöс дасьтö Олег Перевозчиков. Бöръя кык наставникыслы, дерт, тыдаланаджык, веськалас-ö Олимпиада вылö Виценко да сяммас-ö шедöдны наградаяс. Но, кыдз мен кажитчö, ставыс том спортсмен сайын. Кута лача, шудыс мойвиас зонлы...
–Кор вичмылö прöст кад, Алексей волывлö тіян дорö?
–Косланö волігас сійö пыр аддзö кадсö пыравлыны ме дорö. Восьсöн юксьö аслас тöжд-дойöн. А мукöддырйиыс öтвылысь лызьöн котралыштны петалам. Шмоньсорöн ордйысьлам на, коді вынаджык...