–Аски бöръя лун уджала, – паныдасигöн виччысьтöг шуис Лидия Логинова.

Шемöсми весиг – кыдзи нö ми коми колипкайтöгыс кутам овны? "Зильган турунын" матö дас кык во сьыліс, сыöдз филармонияын, фольклор театрын зілис. А ме медводдзаысь сійöс 1982 воын на музтеатрлöн сцена вылысь аддзылі, да сэксянь радейтана артисткаöн лоис. Сизим арöссянь пö сьыла, шуö.

–И мый кöсъянныд шойччигад вöчны?

–Медводз, дерт, дзоньвидзалунöс ёнмöдыштны колö. Сэсся и гортса олöм кöсъя видлыштны, öд концертъясöн ветлігад матыссаяслы кадыс зэв этша вичмыліс. Сыктывкарса театръясысь став спектакльсö видзöда, водзті век некор вöлі да. Сöмын гортсаяс тöдöны, кутшöм сьöкыд сьылысьлöн уджыс. Пыр öд кöсъян, медым кывзысьяслы вежöрас и сьöлöмас мыйкö колис. Йöз водзад петöмыд Ен водзö сувтöм кодь.

–Верöсныд мый шуис сьывны дугöдчöм йывсьыд...

–Зэв рад лоис. Во помöдз на кöсъя вöлі уджавны, да Иван шуö, Выль во бöрас пö ыджыд сцена вылö петöмсяньыд кызь во тырас, сэсся Май 9 лун воас, а сэні и аслад юбилей матыстчас. Тадзинад некор уджсьыд он эновтчы. А шойччыны петан да, ме пö вöравны аскöд кута нуöдлыны.

–Тöлысь-мöд сайын висьтавлінныд выль диск дасьтöм йылысь...

–Сьöлöм шонтана юöрыс эм жö – тайö вежон помас нин Сыктывкарö Москваысь воас "Сьыла, сьыла, сьыла..." диск. Сэні лоас уна выль сьыланкыв. Кызь öти сьыланкывйысь öкмысыслы кывъяссö гижи ачым, на пиысь нёльыслы – и шыладсö тшöтш лöсьöді. Лэдзöма лои 1 сюрс диск, разалас кö – содтöд на йöзöда. Ньöбны сійöс позяс и Сыктывкарса Печать керкаын, "Ордым" лавкаын.

–И век жö, Лидия Петровна, некыдзи оз эскыссьы, мый сентябрь 30 лунас бöръя лун уджаланныд да збыльысь дзикöдз пенсия вылö петанныд. Сьывнысö он нин кутöй?

–Корасны кö, сьыла, дерт.