Валентина Васильевна Иванова тöдса коми войтырлы кыдзи челядьлы коми гижысь. Тавося августын сылы тырö 55 арöс. Гижысьлöн тшупöда паслы Коми Республикаса челядьлöн С.Я.Маршак нима национальнöй библиотека сиис коми да роч кыв вылын лöсьöдöм "Челядь руöн на ола…" литературнöй памятка, кöнi висьтавсьö Валентина Ивановалöн олан туй да творчество йылысь. Унатор тöдмалi сыкöд сёрнитiгöн, и окота лои юöртны гижысьлöн олöм-вылöм йылысь мукöдлы.
—Валентина Васильевна, регыд Тi кутанныд пасйыны олöманыд тöдчана тшупöд, код йылысь, гашкö, нывбаба морт оз кöсйы восьсöн висьтавны?
—Мыйла? Август 6 лунö тырта 55 арöс. Некор арлыдöс эг дзеблы. Мöдарö на, пыр ачымöс кывлi верстьöджыкöн, кöть ола челядь руöн на.
—Кыдзи — челядь руöн?
—Менам юр вежöрын быттьö челядь кадыс кольöма на — радейта ышмывны, мöвпавтöг мыйкö вöчны, вывтiасьны либö. Челядьлöн моз кутöдöй быттьö абу.
—А мый коли вежöраныд челядьдырся кадсьыныд?
—Челядьдырöй вöлi и шудтöм, и шуда. Шудтöм, мыйла батьöй вöлi асныра, ышмысь, юны радейтысь мортöн. Изьвайыв да Уквавом сиктъясын олöмысь паметьö колис батьысь полöм, сыысь пышъялöм. Кöть сiйö и вöлi аслыспöлöс мортöн. Радейтiс вöравны, чери кыйны, став прöст кадсö колля-лiс вöр-ваын. Но быдтiс миянöс мам, велöдысь Раиса Дмитриевна Изъюрова (верöс сертиыс — Уляшева).
Кор мам куим посни челядьöн мунiс бать дорысь, веськалiм овны Кулöмдiн районса Мöскашор посёлокö. Меным, медыджыдыслы, тырис сэки сöмын на 8 арöс. Мöскашорас и вöлi шуда челядьдырöй. Ставыс вöлi ас: вöр-ваыс, Воч юыс, видзьясыс. Нинöмысь и некодысь эг пов. Вöля вылын олi. Детинка кодь вöлi. Медджуджыд чойсянь Ира пöдругакöд исласьлiм, эг полöй и пемыд гöптö сунласьны. Водз велалi сунласьны да öнöдз радейта ваад шпо-льöдчыны.
Мöскашорас унаторйö велалi: бура серпасасьны, вурсьыны, видзны да бур-дöдны пемöс-лэбачöс, гижны посни висьтъяс да кывбуръяс. Вöлiны менам каньяс, понъяс, катша, сюзьпи да доймылöм рака. Öнöдз на видза эновтöм пон-каньöс. Öтчыд вайлiм чим гöрд да сук гöна мича понйöс. Нимсö пуктiм Шелти. Веськавлiс мотоцикл улö да бурдöдiм пикöд, сувтöдiм кок йылас. 15 во олiс, а кулiс шогысла, кор менö куим во сайын кок чегöм вöсна нуисны больничаö.
Школаын на велöдчигöн кöсйылi лоны художникöн, пемöс бурдöдысьöн, велöдысьöн, геологöн… Но став тайö кöсйöмсö йитiс öти удж — лои журналистöн.
1970 воын Мöскашорын пöдлалісны школа, сэсся и посёлоксö бырöдiсны. Йöзсö вуджöдiсны Зимстанö. Сэнi вöлi сöмын 8 класса школа да 10 класс ковмис помавны Керчомъяын, интернатын олiг.
—Студенталан каднытö тшöкыда казьтывланныд?
—Кыдз нö ог! 31 во сайын нин помалi Сыктывкарса университетын филология факультет. Казьтывла велöдысьясöс, ёртъясöс. Вылö донъяла ассьым велöдысьяс Евгений Александрович Игушевöс, Раиса Ивановна Вагнерöс, Альбина Николаевна Кармановаöс, Анатолий Константинович Микушевöс да мукöдöс. Группаын збыль вö-лi ёна ёртасям. Ставöн лоины пыдди пуктана зiль йöзöн.
Журналистикаын уджалöны Сергей Торлопов, Александра Артеева, Тамара Кокшарова. Зiльöны ёртъяс и наукаын, и школаын. Пыдди пукта Нина Напалковаöс, Надежда Кутеляöс, Екатерина Немчиноваöс, Светлана Лобановаöс, Ольга Шехонинаöс да мукöдöс, кодъяс йитiсны ассьыныс олöмсö велöдан уджкöд.
Ме вöлi группаса старöстаöн да öнöдз став йыв- сьыныс тöда. И сьöлöм вылын кыпыд, ставöн бур йöз, некод эз вош олöм гудырас.
—Валентина Васильевна, кодарö Тiянöс олöмыс веськöдiс университет помалöм бöрад?
—Веськалi ме радиоö, кöнi юрнуöдiс А.М.Шарапов, а медшöр редакторнас вöлi нималана коми драматург А.К. Ларев. Уджавлi М.А.Ганов веськöдлöм улын видз-му овмöс да челядьлы сиöм передачаяс редакцияясын. Дасьтi литературалы сиöм да "Войвывса пионеръяс" передачаяс. Сэксянь, позьö шуны, менам гижан уджöй и йитчис челядькöд. Кык во сайö уджыштi весиг Сьöдкыркöтшса школаын, пиöй ичöт на вöлi да. Эг вермы командировкаясö ветлыны.
И друг… воссьö выль "Би кинь" журнал, и менö корöны сэтчö уджавны. А школаас буретш кöсйöны вöлi пуктыны завучöн. Кутшöм завуч! Челядьлы журнал — со збыльмана вöтыс! Нöшта на медшöр редакторнас вöлi гижысь, драматург Николай Белых, кодöс ме тöдлi университетсянь на. Сэки Николай Фёдорович веськöдлiс сэтчöс литклубöн, а ме зiли сэнi жö, вöлi старöстаöн. Школаын уджалiгöн ги-жышталi висьтъяс, корлiсны весиг том гижысьяслöн семинар вылö. Абу тай вунöдöмаöсь.
Бурногöн казьтывла Николай Фёдоровичöс, авъя, вежöра, шань да сибыд мортöс. Унаторйö велöдiс — пыдди пуктыны да кужны кывзыны быд авторöс, кутны накöд да том лыддьысьысьяскöд топыд йитöд. Во-дзö вылö сылöн индöдъясыс отсалiсны меным "Йöлöга" газетöн веськöдлiгöн.
—Валентина Васильевна, унаöн Тiянöс казьтывлöны буретш кыдзи "Йöлöга" газет восьтысьöс. Мыйла Тi дыр сэнi эн уджалöй?
—Восьтысьнас вöлiны унаöн. Челядьлы газет йылысь мöвпыс чужис гижысьяс котырбердса "Ордым" литклубын. Таво газетыслы 20 во нин лоö, а "Би киньлы" тырис 25 во.
Менö, том на морттö, позьö шуны, мырдöн кыскисны газетас. Öнi серам петлö, сöмын абу ёна тыр вежöра морт сэкся перестройка кадö вермис сиравны юрсö татшöм сьöкыд уджö.
Вöлi 1991 во, и тайöн ставыс шуöма! Ни сьöм, ни редакция жыръяс, ни пызан-улöс, ни уджалысьяс эз вöвны. Опыта гижысьяс эз кöсйыны локны редакцияö. А менам газетын уджалан сямыс эз жö вöв. Аттьö, босьтчисны отсавны Александра Артеева, Александр Ульянов. Спонсорöн чуктöдöм сьöм вылö лэдзим медводдза номер. Казьтыштны кö ставсö, öнi на йирмöг босьтлö!
А редакцияö сэсся повтöг босьтi уджавны Лариса Чупроваöс (öнi Попова), Павел Симпелевöс, Виктория Чугаеваöс. Кöть и помалiсны Санкт-Петербургса университетысь журналистика факультет, но уджсö аддзыны вöлi сьöкыд.
Артмис бур котыр-команда. Ачым том на да томъясыдкöд ок и зiля босьтчим вöчны выль газеттö. Шуа вöлi — эн пукалöй редакция-ын, петöй йöз дорö, ывлаö, школаö, чукöртöй "ловъя" гижöдъяссö. Сiдз и вöчим: ветлöдлiм сикт-посёлокъясö, чукöртiм "ловъя" материал, тöдмалiм челядьлысь тöждъяс. Öнi тай позьö "интернетасьны", кабинетысь петавтöг уджавны, а сэки мöд ног зiлим, йöзкöд, челядькöд аддзысьлöмöн.
—Тi уна висьталанныд газет-журналын удж йылысь. А век жö мунiнныд газетсьыд?
—А лои мунны. Сьöлöм кутiс пессьыны, газет-журналад ноксигöн кедзовтан ассьыд медшöр могтö — проза гижан уджтö. Заводитлi öд водз, университетын на велöдчигöн петавлiсны висьтъясöй. А унасö эг слöймыв вöчны. Сэсся вит во бöрын редакцияын лоины кутшöмсюрö мытшöдъяс. Татшöмыс овлö быд котырын кутшöм-кö кадö. Либö колö вöлi лоны стрöг, "палича" веськöдлысьöн, либö мунны. Тöдчис менам тырмытöмтор — вöлi сiдз шусяна либеральнöй, личыд веськöдлысьöн. Радейтi и öнöдз радейта ассьым уджалысьясöс, эг вöв стрöгöн ни ас, ни на дорö. А тэ кö радейтан ас-сьыд быдтасъястö, оз позь шуны — найö сiдзжö радейтöны тэнö, торйöн нин кор быдмасны, "ус-тошсяласны" да бордъясясны. Со и петi гижан, творческöй удж вылö. Недыр кежлö кöсйи, но недырыс кыссьö öнöдз. Öти-кö, куим тöлысь мысти веськалi больничаö, врачьяс мöдаръюгыдсьыс öдва кыскисны. Но эг öвсьы, а гижи ассьым медводдза "Керка-пöль" небöгöс. Ошкисны тай. Таöдз челядьлы и верстьöлы гижöдъяс петавлiсны журналъясын да öтувъя небöгъясын. Мöд-кö, верöсöй лои инвалидöн, и ковмис сiйöс видзны-дöзьöритны. Гижны кадыс вöлi этша. Шонъянöй верöсöй нёль во сайын мунiс мöдаръюгыдö. Палялыштöм бöрын босьтчи ачымöс "бурдöдны" гижö-мöн. Öкмисны гижöдъясöй нöшта кык небöг вылö. "Биа öгыр" — посни челядьлы да "Эн коль менö, мамук" — шöр арлыдаяслы да налöн бать-мамлы.
—А кодi да мый Тiянöс ышöдö гижны?
—Ышöдö олöмыс. Нöшта сьöлöмсянь аттьö "Би киньса" уджалысьяслы. Николай Тюрнин пыр "дöзмöдчö", звöнитас да корö гижöдтö. Владимир Моторин кисьыд "кватитö" да компьютерö нин сюйö висьтъястö. Аслам öд пыр на абу компьютерöй да тайö ёна падмöдö. Сытöг гижöдтö öнi оз босьтны. Молодеч Владимир Моторин, выль "Гора да Гоша" повесьтöн ноксьö. Отсалö и Нина Обрезкова.
—Валентина Васильевна, гижöд сюрöсъястö кытысь босьтанныд? Ас олöмысь тшöтш?
—Дерт, мыйкö ас йылысь. Шуам, Федя Кармановыс кызвыннас ме, мыйтакö пиöй. Гора да Гоша — суседъяс. Да кытчö кöть синтö он чöвт, быдлаысь гижантортö позьö аддзыны. Олöмыс сэтшöм озыр, йöзыс сэтшöм аслыспöлöсöсь. Сöмын пуксьы да гиж. Ачым ас йылысь гижа — дыш морт ме. И абу писькöс, абу нырччысь.
—Мыйын тайö тöдчö?
— А мукöдыс тай и сьöмтö корсясны, и издательствоясысь оз петавлыны. А ме ог куж, пукала да виччыся, кор гижöдъяс асьныс "котöртасны" небöг лэдзанiнад. А вояс лэбöны, ой-ой-ой!
Öтчыд гижысь Елена Габова шулiс:
—Валентина, тэныд нинöм оз ков думыштны, сöмын пуксьы да ас йывсьыд гиж.
И збыль, олöмыс менö сэтшöма бергöдлiс, шыблалiс, уналаö и сунавлi да унатор аддзывлi. Быттьö меыс — некымын лов и быд олöм кост олö торъя морт.
—Кутшöм сьöкыдлунъяс падмöдöны?
—Сьöкыдлуныс — ачым. Нелямын арöсöдз Енмыс сетiс ставсö. А сэсся быттьö личöдiс вöжжисö да тшöктiс аслым кывтны визув, коськöсь юöд. Петан кö — пет, он кö — ачыд мыжа. Сэки збыльысь гöгöрвои, мый мортöн вермö веськöдлыны кутшöмкö ортсыса лёк, сьöд вын. Тэчö тэныд мытшöдъяс. Со и мöвпала: "А мыйла нö, сiдзкö, 1997 воас Енмыс менö мöдаръ-югыдсьыс кыскис, сетiс позянлун водзö овны. Сэк öд асьныс врачьяс эз эскыны менам бурдöмлы. Сiдзкö, уджйöза ме Ен водзас, и йöз водзас, аслам пи да внучка водзын. И сэтшöм окота лои овны-вывны, радлыны лунъюгыдыслы. Кыдзи коркö ичöтдырйи на мам шулiс: "Ов сiдз, мед ни меным, ни тэныд эз вöв яндзим. Мед войнас бура узьсис, а асывнас радпырысь чеччывсис да окотапырысь овсис".
—Валентина Васильевна, кутшöм Тiян медыджыд кöсйöмныд?
—Медым пи семьялöн олöмыс бура ладмис-сöвмис. Виктория внучкалы шуд кöсъя. Медым йöзыс радейтiсны да пыдди пуктiсны öта-мöднысö. Мед вермисны венны ас пытшсьыныс лёксö, наянлунсö да скöрлунсö. А нöшта ичöтдырйи моз ёна кöсъя, медым коркö козьналiсны меным "чача" — ноутбук. Аттö ёна сiйö колö. Но тайö, кыдз шуласны, збыльмытöм кöсйöм.
—А кутшöмкö ышöдана пас-награда, нимöдöм он мöй кöсйöй?
—Нимöднысö менö ни-нöмысь. А ышöдана медальыс менам кык — Шондi да Тöлысь. Лун и вой найö югзьöдöны менсьым олан туйöс. Мый нöшта колö?
