Александр Буренков ачыс окотитіс служитны армияын. И сöмын ВДВ-ын. Том морт кöсйис лоны десантникöн: юрас — кельыдлöз берет, морöсас — кельыдлöз-еджыд визьяса тельняшка...
Сыктывкарын чужöм зон ичöтсяньыс ёртасьöма спорткöд. Медводз, дерт, аслас тшöтшъяясыскöд гожöмнас сунласьöмаöсь-варччöмаöсь Сыктыв юын, ворсöмаöсь футболöн да баскетболöн, тöвнас исласьöмаöсь лызьöн. А нöшта Александрлы мусмöма каратэ. Зонка ветлывлöма юркарса "Виктория" клубö. Думсьыс сэки нин дасьтысьöма армия кежлö.
Школа помалöм бöрын ёртъясыс мöвпалöмаöсь университет-институтын велöдчöм йылысь, а Александр ачыс мунöма военкоматö. Военкомыслы сідзи шуöма: "Кöсъя служитны армияын!"
Пасъям, Александр Буренковлöн служитігас салдата-лöмаöсь на кык во. Сэсся том зонъясöс кокньöдöмаöсь, та бöрын служитöмаöсь öти во.
СÖМЫН ВОДЗÖ
… Россияса танкъяс зэв ыджыд öдöн матыстчöмаöсь Гори карлань. Грузияса армия пöшти абу водзсасьöма, воча весиг зэв гежöда лыйсьöмаöсь, часьтъясыс мыйлакö зільöмаöсь кыдз позьö öдйöджык воöдчыны Тбилиси карö.
Десантник Александр Буренков пукалöма танклöн броня вылын. Со водзын Гори карыс. И сійö зэв мича да аслыспöлöс. Кор нöшта мöдысь Комиысь зон вермас татчö волыны? Полöм абу вöлöма. Лыйсьöм шыяс абу жö кылöмаöсь. И найö, десантникъяс, нюмъялöмаöсь-радлöмаöсь. Некод абу тöдöма, мый тайö пуксьöм лöньлуныс дасьтöма налы аслыспöлöс … нальк.
РÖКЫД ВЫЛÖ
Кöрт туй вокзал дорын лоöма виччысьтöмтор: налöн танкыс сувтöма — гусеницаыс орöма. Мукöд танкыс мунöмаöсь водзö. Командованиелысь стрöг индöдсö öд колö збыльмöдны. Тадзи найö и кольöмаöсь ас кежаныс: экипаж да öкмыс десантник. Танкистъяс соснысö пуджöмöн босьтчöмаöсь дзоньтасьны. А десантникъяс машина гöгöрыс кытшöн водöмаöсь.
Муртса саялöмаöсь роч войска, кыдзи на бöрын петкöдчöма … Грузияса спецназ. Сайöдчöм Александр арталöма-лыддьöма, матыстчысь машинаяссö да сера-сера паськöма "коммандоссö". А найö, быттьö лыдтöм-тшöттöм кодзувкотъяс, локтöмаöсь и локтöмаöсь. Грузинъяс, тыдалö, кöсйöмаöсь водзö тэрмасьысь роч войскасö мышсяньыс пурны. И мöвпыштны абу вермöмаöсь, мый друг налы паныд сувтасны … öти танк да öкмыс десантник.
Александр казьтылö:
—Грузияса салдат-техникаыс повтöг миянлань матыстчисны, и найö вöліны некымын дас пöв унджыкö-нöсь миян серти. Полім-ö ми? А мый эськö думайтінныд ті, веськалінныд кö миян местаö? Чуймöдіс командир майор Воропаев. Сійö индаліс, кодлы мый вöчны. Сылöн гöлöсыс весиг эз вежсьы. Быттьö вир кисьтана тыш пыдди дасьтысим грузинъяскöд спорт кузя кутшöмкö ордйысьöм кежлö. Майор шуис, медся тöдчанаыс пö — кадысь-кадö вежлавны лыйсянінтö, вöрöгöс бöбйöдлыны, öта-мöдлы отсавны… И сылöн тайö кывъясыс содтісны миянлысь вын-эбöс, чиныштіс и полöмным.
ВЕЛÖДЧЫНЫ, ДЕРТ, СЬÖКЫД
Нималана роч фельдмаршал Суворов на шулöма, мый велöдчигöн сьöкыд, сы пыдди салдатлы ёна кокниджык вир кисьтана тышын. Та йылысь тшöкыда казьтылöмаöсь Москва обласьтса Ногинск карын, кöні вöлöма том салдатъясöс дасьтан шöриныс. Буретш сэтчö и веськалöма Александр Буренков да сылöн выль ёртъясыс, кодъясöс босьтöмаöсь служитны армияö.
Квайт тöлысьыс зэв öдйö кольöмаöсь. Тайöс некымынысь тöдчöдіс Александр. Котралім пö, лыйсим, ветлім стройöн… Офицеръяс ёна зільöмаöсь.
Урчитöм кадö шöринас воöмаöсь Россия пасьталаысь офицеръяс бöрйыны младшöй сержантъясöс. На лыдын вöлöма и 76 номера гвардейскöй десантно-штурмöвöй дивизияысь капитан. Код тöдас, кытчö эськö Комись зон веськаліс водзö служитны… Александр ачыс вöзйысьöма тайö дивизияас. Öтчыд дай мöдысь шыöдчылöма, босьтöй пö менö. Офицерлы младшöй сержант сьöлöм вылас воöма. Тадзи сійö веськалöма Псков карö.
2007 вося майын кырымалöма контракт. Том морт пасйис:
—Контракт серти колö служитны куим во. Ме жö квайт тöлысь вöлі нин армияын, сідзкö, кольö нöшта 2,5 во. Сэсся мынтöны 10-12 сюрс шайт удждон. Миян взвод вöлі ыджыд семья кодь, öта-мöдöс пыдди пуктім. Дерт, быд боксянь бура дасьтісны. Асывнас котралім, луннас да рытнас нöшта сідз шусяна спортивно-массöвöй мероприятиеяс вöліны: котралам 100 метр, 3 километр, турник вылын лэптасям да ставсö он лыддьöдлы. Вежоннас öтчыдысь, пекничаö, полигон вылын лыйсим автомат-пулемётысь.
Грузиякöд война водзвылын дивизияса салдат-сержантъясöс мöдöд-лöмаöсь буретш Лунвыв Осетияö командировкаö. Сэки сэні нуöдöмаöсь аслыспöлöс велöдчöмъяс. Дерт, уна да ёна лыйсьöмаöсь. Быттьö часьтса салдат-сержантъясöс водзвыв дасьтöмаöсь тыш-кось кежлö.
Часьтö воöм бöрын кольöма вежон. 2008 вося август 8 лунö сержант Буренков вöлöма нарадын. Водзвыв мöвпалöма, кыдзи рытсö коллялас, мый кутас вöчны... Дерт, ёртъясыскöд видзöдасны Олимпиада восьтöм.
Став дум-мöвпсö торкöма стрöг индöд: "В ружьё! Боевая тревога!" Первойсö думыштöма, мый нин пö бара лоис-а… А часьтса телевизорын юöртöмаöсь-петкöдлöмаöсь: Грузияса "Градъяс" шковгöны-лыйлöны Цхинвал кар кузя…
ТАНКСА ЭКИПАЖ ДА ÖКМЫС ДЕСАНТНИК
Кöрт туй вокзал дорын найö, танкса экипаж да öкмыс десантник, виччысисны матыстчысь вöрöгöс. Арталöм серти, вöлі этша вылö 150 морт. Грузияса спецназö пырысь салдатъясöс дасьтісны, дерт жö, Америкаса инструкторъяс. Со кутшöм повтöг локтöны, кианыс Америкаса М-4 винтовка да "Стингеръяс". Найö эз тöдны, мый на бöрся огнемётлöн прицел пыр видзöдіс сержант Александр Буренков. И сылöн ёртъясыс вöліны дасьöсь.
Тöд вылö пыр жö усьö ВДВ-лöн 104 полкса 4-öд роталöн подвигыс: сэки десантникъяс помöдз сулалісны Аргунса ущельеын. И 76 номера гвардейскöй десантно-штурмöвöй дивизияса тайö öкмыс десантникыс дзик жö тадзи вöчисны. Бöрö абу вöчöмаöсь ни öти воськов. Кöть некымын дас пöв унджык вöрöг зільöмаöсь нырыштны-бырöдны.
И РАЦИЯЫС ПАСЬМУНÖМА
Грузияса спецназ кузя медводдзаöн аслас огнемётысь лыйöма Александр Буренков. Гöгöр ставыс чашнитöма-ыпнитöма. Сэсся сылöн ёртыс Сергей Рябинин шковгöма огнемётсьыс. И öта-мöдсö вежöмöн нöш-та куимысь лыйöмаöсь. Пулемёт-автоматъяслöн сяргöмыс абу лöньлöма час кык-ö-куим. Александр казьтыштіс:
—Автомат тай донавліс-а. Öдвакö арталан, мыйта патрон сэки ёртъяскöд лыйлім. Рöкыд вылö, рация пасьмунöма. Та вöсна отсöг корны эг вермöй. Миян водзын пласьтви-дзисны сера-сера паськöма салдатъяс. Спецназ заводитліс эськö кытшавны, но ми водзсасим.
Кöрт туй вокзал дорын ёсь косьсö казялöмаöсь 58-öд армияса офицеръяс. Ыстöмаöсь Т-72 кык танк. Найöс аддзöм бöрын кольöм "коммандос" пышйöмаöсь. Десантникъясöс пуксьöдöмаöсь броня вылö да вайöмаöсь Гори карö.
Та бöрын Александр Буренков сэсся абу воюйтöма, кöть матö вежон олöмаöсь Гориын. Видзöмаöсь йöзсö, медым Грузияса войска эз уськöдчыны ни пушка-миномётысь кар-сиктъяс кузя эз лыйлыны.
ЧОЛÖМАЛÖМА ДМИТРИЙ МЕДВЕДЕВ
Александрöс лэдзöмаöсь гортас, ветлы пö шойччышт, бать-мамыдкöд олышт. А сэсся виччысьтöг Сыктывкарö звöнитöмаöсь часьтсяньыс да юöртöмаöсь, тэнö пö виччысям Москваын. Весиг абу висьталöмаöсь, мыйла сэтчö корöны. Ставсö гöгöр-воöма, кор Москваын сійöс да нöшта кöкъямыс десантник-ёртсö, кодъяскöд воюйтöмаöсь Грузияса спецназкöд, заводитöмаöсь велöдны Главнокомандующöй дорö матыстчыны да бöр мунны.
Кремльса Екатерининскöй залын странаса Президент сетöма гвардияса старшöй сержант Буренковлы Мужество орден. Татшöмторсö öмöй коркö вунöдан?!
Муртса сёрöнджык Дмитрий Медведев юалöма орччöн сулалысь генераллысь, тайö пö сійö öкмыс десантникыс, кодъяс абу бöрыньтчöмаöсь кöрт туй дорысь. И матыстчöма öкмыснан дорас, топöдлöма быдöнлысь кисö да точкысьöма шампанскöй тыра бокалнас.
СЛУЖИТНЫ КОЛÖ БЫДÖНЛЫ
Тадзи эскöдö вöвлöм старшöй сержант Александр Буренков. Сійö пас-йис, мый армия отсалö зонъяслы öдйöджык верстяммыны, налöн вежсьö олöм вылö видзöдласыс, а медся тöдчанаыс — содö кывкутöмыс.
