Луздор районса Лойма сиктын олысьясöс пöгибö воштöмаöсь шöйтысь понъяс.

–Панельысь керкаяс дорті муннысö он лысьт, пыр и уськöдчасны, – висьталö Татьяна Петровна Дорошенко. – Коді сöмын найöс рöдмöдö?

Лоймаын олысьяс шыöдчылöмаöсь нин сиктса администрацияö, медым бырöдасны шöйтысь понъяссö. Тöвнас пö быттьö и этшаджы-кöнöсь вöліны, а тулыссяньыс бара ыджыд стая рöдмöма. Сиктса олысьяслöн висьталöм серти, понъясыс зэв скöрöсь, усьласьöны ветлысь-мунысьяс вылö. Мукöдыс весиг сьöрсьыс нянь новлöдлöны. Уськöдчасны кö понъясыс, шыбитöны налы. Но, тыдалö, курччасьысь пемöсъясöс тадзитö он раммöд.

Шойччан лунъясö Лоймаö рöдвужыс дорö гöститны ветлöма и Сыктывкарса öти семья. Карсаястö Лоймаса "кöзяинъясыд" сэтшöма чуййöдлöмаöсь, мый шойччöм пыдди найö олöмаöсь полігтырйи.

–Öмидз вотны ветлім да, ошъяссьыс омöльджыка по-лім, – висьталöны найö. – Кöть эськö и вотчанінас нёль ош семья олö, матігöгöрса пуяссö ставнас парсалöмаöсь-пасъялöмаöсь.

Артмö – понъяс скöрджыкöсь ошъясысь? Гортса пе-мöсысь йöзыс полöны ёнджы-ка. Та кузя ми шыöдчылім Лойма сиктса администрацияö. Сэні висьталісны, мый сиктас шöйтысь понйыс этша. И бöръя кадас администрацияö эз норасьлыны, мый кодöскö курччалісны понъяс. А элясясны кö курччасьысь либö усьласьысь пон вылö, пыр жö и корсьöны "мыжа" пемöслысь кöзяинсö да тшöктöны домавны сійöс, йöртны вольерö либö дзикöдз бырöдны.

–Ме ачым ветлöдла тайö панель керкаяс дортіыс, сэні куим пон. Но некод эз уськöдчы. Жарысла весиг юрсö оз вермыны лэптыны, – висьталö Лойма сиктса админи-страцияöн веськöдлысь Валерий Андреевич Машуков. – Йöзыс асьныс найöс вердöны, а сэсся газетö элясьöны.

–А тіян эм позянлун бырöдны шöйтысь понъяссö?

–Кодöскö кö курччас, колö шыöдчыны больничаö да участкöвöй дорö, медым найö пасъясны лоöмторсö. Сэки нин дзескöдам кöзяинсö, коді лэдзис понсö домсьыс. А абу кö некутшöм шыöдчöм, нинöм и больгынысö. Ми пыр сёрнитам йöзкöд, мед оз лэдзны ассьыныс скöтсö улич вылö. Овлö и, туй вылын öшъяс шöйтöны. Налысь кöзяинъяссö тшöтш жö öлöдам. А понъяс дорсьыд найö нöшта на лёкджыкöсь, торйöн нин кö найö ветлöд-лöны нöйччысь мöсъяскöд.