Волсяын унаöн бура тöдöны Владимир Афанасьевич Бобровöс. Чужлöма Луздор районын, Верхолузье сиктбердса Ула грездын. Велöдчылöма Москваса лесотехническöй институтын. Но гöтрасьöм вöс-наыс абу слöймöма помавны. Бöрынджык семьяыскöд овмöдчöма Сыктыв районса Первомайскöй посёлокö. Пöрöдöма вöр, стрöитчöма.
— Волсяö локтім 1990 воын, — висьталö Владимир Афанасьевич. — Гöтыркöд, Светлана Александровнакöд котыртім крестьянскöй фермер овмöс. Быдтам вузалöм вылö свеклö, морков, картупель, капуста. Гожöмнас сідзжö вузалöм вылö заптам турун. Таысь öтдор пöрöдам вöр. Могмöдам пескöн Волсяын да Первомайскöйын олысь нелямын гöгöр семьяöс. Телега пескыс сулалö 2,5 сюрс шайт. Тайö абу ёна дона. Мöд во нин асланым пилорамаын пилитам йöзлöн корöм серти тьöс-плака. Öти кубометрсö вузалам 3,2 сюрс шайтысь. Неважöн аукцион пыр ньöбим 155 кубометр вöр делянка.
И татшöм зіль войтырыс Волсяын талун абу этшаöнöсь. Позьö шуны, на вылын и кутчысьö öнія сьöкыд кадö тайö важся сиктас олöмыс.
Владимир Афанасьевич оз сöмын ас вылас уджав. Тöждысьö и йöз вöсна, кыдзи ас овмöдчöминлöн да районлöн сöветъясса депутат. Кывкутö Волся сиктса да Первомайскöй посёлокса войтырлöн тöжд-майшасьöмъяс вöсна. Миян волігöн регыд мысти и кутіс тэрмасьны аслас могъясöн.
Сыкöд сёрни бöрын миян дінö матыстчис Владимир Афанасьевичлöн Алексей пиыс.
— Волсяын вöр-ваыс мичасьыс-мича, — шуö том морт. — Ме некытчö татысь ог кöсйы мунны. Со и шуи стрöитны аслым керка.
Алексей помалöма Эжваын милиция школа. Босьтöма юристлысь диплом. Уджалöма карын. А сэсся локтöма батьыс дінö.
— Кöсъя водзö нуöдны сылысь туйвизьсö, — водзö висьталö Алексей Бобров. — Миян овмöсын öні эм "МТЗ" трактор, "ЗИЛ-157" машина. Ньöбим ытшкан техника да гöр. Отсалам татчöс олысьяслы гöрны гортдорса муяс, а го-жöмнас заптам скöт видзысьяслы турун.
Мекöд сёрнитысь неуна ланьтыштлö да висьталö водзö:
— Ёна кöсъя, медым татшöм мича сиктас олöмыс пуöмöн пуис. Со и чужис мöвп — паськöдны Волсяын туризм. Тані шойччыны окотитысьяслы гожöмнас позяс кыйны чери, ветлыны вöрö, а тöвнас исласьны. Сэк жö позяс лöсьöдны мыйкö музей сяма. Гöсьтъяс кутасны тöдмасьны, кыдзи водзтіджык овлісны Волсяын йöзыс. Кута лача, ассьым мöвпъясöс верма збыльмöдны.
Алексей Бобровлöн висьталöм серти, йöзыс тані зільöсь, восьса сьöлöмаöсь. Сöмын некодлы найöс бур вылас туйдны. А водзті Волсяын быдса совхоз вöлі. И ставыс быттьö тшын йыв кайис. Кыдзи сійö шуö, татчöс муяс вылын позьö быдтыны и рудзöг да зöр, вöчны наысь комбикорм. Тайö сувтас бокысь вайöм серти донтöмджык. И татчöс скöт видзысьяслы сэки позяс паськöдчыны.
Кöсйöмъясыс збыльысь бурöсь. Мед сöмын найöс удайтчас збыльмöдны.