Июнь 28 — июль 5 лунъясö Ханты-Мансийскын муніс Россияса финн-йöгра фотокорреспондентъяслöн семинар, кытчö ветлісны и Комиысь журналистъяс: Изьва районысь Михаил Мельничук, Кöрткерöсысь Евгений Казаков, РФ-са финн-йöгра культура шöринысь Ольга Худяева да "Коми му" газетысь Виктория Чугаева.

Снимайтчöмын öтияслöн вель нин ыджыд сямыс, мöдъяс воисны велöдчыны налысь. Журналистъяслы вöлі котыртöма мастер-классъяс да фотовыставкаяс, найö аддзысьлісны нималана да пыдди пуктана йöзкöд, тшöтш и Войвылын этша лыда вужвойтырлöн ассамблеяöн веськöдлысь Еремей Айпинкöд, серпасасьысь Геннадий Райшевкöд, йöзкостса мастер Зоя Лозямовакöд (аски тайö зэв аслыспöлöс аньсö петкöдласны "Поле чудесын").

Таысь кындзи гöсьтъясöс тöдмöдісны хантылöн да мансилöн оласногöн, обычайясöн да традицияясöн. Тайö муас олö и уна коми, найöс тані шуöны зырянаöн. Эмöсь и финн-йöгра котырысь мукöд кывъя войтыр. Журналистъясöс нулісны Обь ю кузя национальнöй сиктö, челядьлöн этнолагерö, мужичöйяслы мойвиис и чери кыйыштны. А Ольга Худяевалы (снимок вылын) усис шуд ветлыны кöр видзысьяслöн стойбище вылö, а сідзжö пыравны "Метеор" теплоходса капитанлöн рубкаö да кутыштны штурвал.

Тайö семинар йывсьыс миян корреспондент паськыдджыка гижас локтан номеръясын.