...Матрос,  рулевöй,  моторист,  капитанлы отсасьысь,  капитан. Александр Жирнов нэм чöжыс уджалö ювывса флотын. И ньöти оз жалит,  мый бöрйöма тайö ордымсö.

Ылİ-ылİ  Казахстанысь 

—Ме чужи да быдми   ылі-ылі асыввылын, Казахстанын. Сэки СССР вöлі  ыджыд да вынйöра государствоöн. Тайö  республикаас казахъясысь öтдор олісны да уджалісны и мукöд кывъя войтыр. Казахстан  син водзын сöвмис, кыпöдісны выль предприятиеяс,  кытчö колісны бур специалистъяс. И став йöзыс öтув зілисны,  некутшöм зык ни вен эз кыптыв,  — висьталö Александр Борисович.

Казахстанын чужöм зон ёна мöвпалöма ювывса флот йылысь. Аслас ёртъясыслы помся висьтавлöма,  кутшöм катер да пароход кывтöны юяс кузя, нуöны-вайöны йöзöс,  вöр,  из шом да уна мукöдтор. Школаас велöдчигöн "висьмöма" катер-теплоходнас. Библиотекаысь лыддьöма дзик став журнал-небöгсö,  кöні кöть öти кыв вöлöма на йылысь.

Кöкъямыс класс помавтöдзыс на гижöма письмö Тобольскса речнöй училищеö. Думнас том морт велöдчöма сэні нин моторист-рулевöйö. Дерт,  сэтчö эськö и муніс,  но виччысьтöг другöн ставыс вежсьöма. Ылі войвылысь,  Комиысь, на дорö воöмаöсь гöститны да шойччыштны рöдвужыс. Найö и юöртöмаöсь,  мый Комиын тшöтш эм речнöй училищеыс, а войвывса юясыс зэв мичаöсь, вöр-ва йылысь нинöм и казьтывны: чериыс пуöмöн пуö,  ягын быдмö быд сикас     вотöс-тшак,  а пöткаыс — лыдтöм-тшöттöм...

Войвылын 

—Тадзи и веськалі Комиö. И меным, позьö шуны,  мойвиис: юркарбердса Гöрд Затонын вöлі 1 номера речнöй училище. Сэні миянлысь котырнымöс первойысь велöдісны куим во да ю выв флотса мотористö велöдöмысь öтдор сетісны и шöр тöдöмлун. Татшöмыс Тобольскын эз вöв, — казьтылö А.Б.Жирнов.

Медводдза гожöмнас мö-дöдöмаöсь практика вылö. Веськалöма ТНН-20 танкер вылö. Ломтас-мавтас нуöмаöсь-вайöмаöсь ю бокö пуксьöм сикт-посёлокъясö. Уджыс нöшта на мусмöма. Зэв уна выльсö зон аддзылöма. Сэсся капитансянь  матросöдз быдöн зільöма ышöдны-чуйдны,  унаторйö велöдöмаöсь том мортöс,  юксьöмаöсь сыкöд опытнас. Мöд гожöмнас  зільöма нин "Юромка" самоходка  вылын. Сійö пö  быдлаö  сибалö,  ляпкыд ваысь оз пов,  берегöдз  зэв кокниа воöдчö...

Училищеын тöдöмлун босьтігöн на заводитöма ветлыны сэкся ДОСААФ-ö. Мукöд зонкакöд велöдчöмаöсь чукöртны парашют,  весиг некымынысь и чеччыштлöмаöсь  сійöн.

Пöвестка воöма да, Александр,  кыдзи и мукöд,  мунöма военкоматö. Дерт,  босьтісны эськö  сійöс морфлотö,  но  комиссияö пырысьяс казялöмаöсь,  мый призывник Жирнов парашютöн некымынысь чеччыштлöма. Со и шуöмаöсь сылы служитны ВДВ-ын. Веськалöма Прибалтикаö, ВДВ-лöн велöдан шöринö. Сэні кыкнан восö и служитöма инструкторöн.

Матроссянь капитанÖдз 

Армияысь локтöм бöрын бара медасьöма матросöн. И том мортöс бара на туйдöмаöсь-велöдöмаöсь ыджыдджык ёртъясыс. Дерт, ачыс зільöма жö. Александр Жирнов висьталö:

—Этша вылö колö öкмыс во матроссянь капитанöдз быдмыны. И став тайö тшу-пöдсö ме вуджи. Юркарбердса Выльтыдор посёлокын сэки вöлі сідз шусяна команднöй состав велöдан школа. Куим тöв сэні босьті тöдöмлун. 1986 воын  сдайті экзаменъяс.

Тулыснас сійöс индöмаöсь ЧЛБ-7 вылö капитанöн. Ытванас, кыдзи и мукöд катер-теплоход, юяс йылысь лэччöдöма пуръяс, нуöма республикаса леспромхозъясö баржаöн ломтас-мавтас. А гожöмнас отсасьöмаöсь  Сыктывкарысь авиация отсöгöн вöр видзан базалы: ЧЛБ-ыс лоöма  вöр кусöдан катерöн.

1974 восянь кывтлöма республикаса кызвын юяссö: Эжва, Сыктыв, Лöкчим, Ви-сер, Ньывсер, да ставсö  öмöй лыддьöдлан. А öтчыд катернас ветлöма Белозерск карö. Му вывті сэтчö воöдчыны абу зэв кокни, а ва туй нöшта на аслыспöлöс. Капитан казьтылö:

—Первой кывтім Сухона юті,  сэсся Кубенскöй водохранилище,  Войвыв Двина пыр Шексна юöд воöдчим Ленин нима Волга-Балтика каналö да вöлисти воим Белозерскö. Унатор выльсö сэки аддзылім.

Уджыс аслыСпÖлÖс 

Катер-теплоход вылын  уджыс аслыссикас: мортыс,  позьö шуны, йи кылалöмсянь да сувттöдзыс олö-уджалö ва вылын. Берегас гежöда и петалö. А сэсся тöвбыд...  уджтöмалö. Александр Жирнов содтöд шопер,  сварщик да нöшта на уна мукöдтор велалöма вöчны. Кыккирудзтö пукавны зіль морт оз вермы. Некымын тöв уджалöма сідз шусяна погрузчик вылын: сöвтöма вагонъясö тьöс да пöв,  кодъясöс сэсся мöдöдлöмаöсь Германияö,  Венгрияö...

Ачыс пасйис, тöлыс пö  пыр дыр нюжалö. Тулыссö  виччысьны он вермы, сэ-тшöм окота öдйöджык петны ю вылö. Мукöддырйи вежонöдз кос муас оз петавны: первой катöны ю йылö,  босьтöны пур да лэччöны. Асьныс пусьöны,  песласьöны и. Содтöд Александр Борисович вöлöм шуда чери кыйысь да вöралысь. Сійö висьталіс,  консерв шыдыд пö эськö абу лёк,  но дзодзöг яйыд ёна чöскыдджык. Да пражи-  тöм сир-сыныд тöдчымöн пöтöс.

Öти пöраö медасьлöма "Лузалес" предприятиеö. Сэтчöс чина йöзöс нуöма-вайöма. Абу кажитчöма та-тшöм олöмыд: пыр пö ко-дöскö виччысян,  медсясö кар дорын бергалан... Со и вуджöма "Эжва" ООО-ö. Сетöмаöсь КС-100 В-12 катер. Тулыснас Эжва ю кузя кыскö-лэччöдö  Сыктывкарса ЛПК-лы пуръяс. Тайö кражсьыс сэсся пуöны целлюлоза да вöчöны быд сикас кабаласö. Ва ямöм бöрын, гожöмсяньыс да йи сувттöдзыс, аслас катерöн новлöдлö предприятиеясса чина йöзöс да специалистъясöс. Мукöддырйи  командировкаыс нюжавлö некымын вежонöдз. Неважöн на нуöдлöма торъя котырöс Эжва йывлань. Мужикулов весалöмаöсь берегъяссö,  кытчö ытваыс вайöма-косьтöма пурйысь разалöм керъяссö.

17 лун торъя котыр зільöма Кулöмдін районса Зимстан посёлокын. Сэки вöчö-маöсь ю вомöн пос.

—Меным кажитчö  кузь туй. Век нин мыйкö выльтор аддзылан, уна бур йöз-кöд тöдмасян. Зэв ёна радейта Емва. Берегъясыс шензьöдана мичаöсь. А ваыс сöстöм, визув... Зэв уна кось. Визулыс гырысь изъяс косттіыс нöшта на öддзö. Радейта Висер,  торйöн нин йывсö. Пуясыс дзик берегас быдмöны. Сьöлаясыс ю вомöныс жбыръялöны-лэбалöны.  Серпасыс шензьöдана мича.

Öнİ оз нин дасьтыны 

А.Б.Жирнов радейтö ас-сьыс уджсö. Но капитан майшасьö:

—Ми, тыдалö, колим ювывса флотын бöръя уджалысьясöн. Жаль,  но республикаын абу ни öти училище, ни мукöд велöдчанін,  кöні дасьтöны мотористöс либö капитанöс. Воддза моз Комиын юяссö оз весавны. Кольöм во гожöмнас Сыктывкарсянь катер дугдöма вуджöдны йöзсö Сидöрполойö. Помкаыс — Сыктыв юыс ёна ляпкалöма. Та вöсна миянлысь уна ю абу нин пыртöма катер-теплоход ветлан реестрö.

Вит вонас öтчыд быд капитанлы колö вöлöм  тöдöмлунсö выльмöдны-содтыны. Медводз Печораын либö Архангельск обласьтса Лимендаын велöдчыны кык вежон. Сэсся торъя комиссиялы сдайтны экзамен. Öні компьютер отсöгöн тайöс вöчöны.