Елизавета Евлампиевна да Анатолий Степанович Захожийяс 55 во нин öтлаынöсь. Гозъя пыр ладöн олöмаöсь да öнöдз муслунсö сьöлöманыс видзöны. Быдторйöн зільöны отсавны öта-мöдыслы, горт гöгöрас став удж-ноксö кыкöн бергöдöны. Шогалöны кö — öтвыв, нимкодясьöны кö — бара жö öтвыв. Ныв-пиянсö тадзи жö велöдöмаöсь овнысö.
Захожий гозъялöн куим челядь: кык ныв да öти пи. Ставныс нин бать-мам позсьыс лэбзьöмаöсь, ассьыныс овмöс лöсьöдöмаöсь. Но олöма гозъяöс ас кежаныс оз кольны. На ордö ныв-пияныс тшöкыда волывлöны. Пöль-пöчöс оз вунöдны и внукъясыс.
КЫДЗИ ВЕЛÖДЧАН, СİДЗИ И ОЛАН
Елизавета Евлампиевналöн да Анатолий Степановичлöн кыкнанныслöн челядьдырыс курыд вöлöма. Война дырйи сьöкыд уджсö, и тшыгъялöмсö, и кынмалöмсö, и фашистъяслысь тешитчöмсö лоöма терпитны.
Ань чужлöма Пöддельнöйын. Бать-мамыслöн вöлöмаöсь öкмысöнöсь. Елизавета квайтöд кага.
—Бать-мамöй вöліны зэв шаньöсь, — казьтылö Евлампиевна. —Нэмсö мырсисны колхозын. Кöть эськö и асьныс эз кужны лыддьысьны ни гижны, миянöс ставнымöс велöдісны. Мамöй вöлі шулывлö: "Кыдзи кутанныд велöдчыны, сідзи и кутанныд овны".
Война чöжыс велöдчöмаöсь жö. Дерт, и колхозын мырсьöмаöсь. Челядь котыр пö вöлі ордйысям, коді öд-йöджык сё ведра капуста ваяс. Ёна тшыгъялöмаöсь. Ыджыдджык Ёгор воксö 1941 воас и босьтöмаöсь война вылö, 1942-öдас нуöмаöсь и батьсö. Гортгöгöрса удж-нокыс öшйöма мам да ыджыдджык челядь вылас. 1944 воын батьыс чорыда ранитчöма, гортас эськö локтöма, но кык тöлысь мысти кувсьöма. Ёгор вокыс жö ловйöн воöма.
—Коньöрöй дай мамукöй, кымынысь тшыгйöн водліс узьны, а миянöс вердіс. Жытник тыр паськöмыс вöлі да, ставсö нянь вылö вузавліс, мед сöмын ми тшыгла эг кулöй. Тшöтш öд и война бöрас зэв сьöкыд вöлі, — ышловзис да дзормöм юрсисö лöсьöдыштіс Елизавета Евлампиевна.
7 класс помалöм бöрын Лиза велöдчöма Сыктывкарса Кырулын ремесленнöй училищеын токарö. Сэсся куим во уджалöма Пöдтыбокса леспромхозын.
—Тöчиті ТЭН-15 станокöн катеръяслы гайкаяс, болтъяс да мукöдтор, — водзö висьталö сійö.
Война бöрас сиктъясын заводитісны кыпöдны колхозъяс. Уджалысьыс абу тырмöма да, Лизаöс тшöтш жö корöмаöсь колхозö. Весиг вöв нин сылы лöсьöдлöмаöсь, но ныв абу кöсйысьöма. А лес-промхозын токаралігас Елизаветалы вöзйöмаöсь водзö велöдчыны бухгалтерö.
НОМЙÖСЬ КОМИÖ ШУДЛА
Анатолий Степанович война кадö öдва ловйöн кольöма. Чужлöма сійö Житомир обласьтса Люборгскöй районса Педымки сиктын. Зонкалы вöлöма 11 арöс, кор заводитчöма война. Батьыс вöлöма коммунистöн. Партизаналöма Юрченколöн отрядын.
—Вермисны миян вылын и смекайтчыны вöвлöм кулакъясыд. Найö лöгалісны коммунистъяс вылö да вöлі-ны немечьяс дор. Быд лун вöлі ветлам жандармерияö справкаяс гижны, кöні батьным. Вирöдз вöлі нöйтасны, чужъяласны, — орліс гöлöсыс Анатолий Степановичлöн. — А кымынöс лыйлісны... 1945 вося апрельын миянлысь районöс мездісны фашистъяссьыд. Со öд мый дыра терпитім изьвергъяссö.
Кутшöм кöть сьöкыд эз вöв олöмыс, век жö Анатолий Степанович вермöма велöдчыны. Помалöма 7 класс, а сэсся велöдчöма техникумын Малин карын. Украинасянь том специалистöс ыстöмаöсь Комиö уджавны вöр овмöсын.
Сэки Анатолий Коми йылысь нинöм на абу тöдöма. Татчö локтöдз пыралöма библиотекаö да карта серти видзöдлöма. Öти тöдса висьталöма, мый Комиын уна ном да чери.
—Збыль сідзи и вöлöма, — серöктіс Анатолий Степанович. — Тані ме "висьми" чери кыйöмöн да вöралöмöн. Ветымынöд воясад ю-пармаыд збыльысь зэв озыр вöлі кыйдöснад.
Комиын Анатолий Захожийöс индöмаöсь Шойнатыса леспромхозö. Ёртыс эськö сійöс повзьöдлöма номъяснад, но татысь том морт аддзöма и ассьыс шудсö — кузь кöсаа, мичаник коми ныв Елизаветаöс.
КУЖЛİМ И УДЖАВНЫ, И ГАЖÖДЧЫНЫ
—Водзынтö öд кöть и ёна уджавлім, кужлім и гажöдчыны, — казьтылöны Захожий гозъя. — Клубын быд рыт вöлі кутшöмкö да гаж. Сьылам, йöктам, ворсам.
Öти татшöм рытйысигöн и тöдмасьöмаöсь найö. А сэсся регыд мысти и öтлаасьöмаöсь. Пажын костіыс и котöртлöмаöсь сельсöветö гижсьынысö.
—А кыдзи нö гажа кö-лысьтöг? — юася налысь.
—Дерт, пасйыны колö, но семья лöсьöдöмын медтöдчанаыс абу гаж, — шуöны олöма гозъя. — Мортлöн олöмас медся кывкутана воськовнас, гашкö, семья лöсьöдöмыс лоö. Кор ныла-зонма гозйöдчöны да мöвпалöны челядь чужтöм йылысь, налы колö муртыштны оз öти во вылö öтув олöм. Збыль вылас öд зэв сьöкыд нэмтö ёрта-ёрттö радейтны да гöгöрвоны.
Кöлысьсö эськö Елизавета да Анатолий ворсöмаöсь жö. Матысса рöдвужсö корлöмаöсь. Гöлиник ныла-зонмалы рöдвужыс и вöчöмаöсь гажсö. Елизавета Евлампиевналöн ыджыдджык Лариса чойыс козьналöма алöйгöрд розаяса турунвиж платтьö, а Анатолийлы — пемыдлöз костюм. Ёгор вокыс кыйöма да жаритöма быдпöлöс черисö.
Во мысти том гозъялöн чужöма Галина ныв. Сэсся Татьяна.
—Коймöдсö чужтыны лэч-чöдіс верöсöй да шмонитöмпырысь чиршöдліс: "Нылöс кö ваян, гортöдз подöн локтан". Сэки Шудöгын вöлі олам. А Шойнатысяньыд подöнтö ылын. Со сэсся повзьöм вывсьыд Коля пиöс чужті, — нюмъялö-шмонитö олöма ань.
Мыйöн ыджыдджык нылыслöн матыстчöма школаö пыран кад, Шудöгысь Захожий гозъя кöсйöмаöсь мунны Украинаö. Но Анатолий Степановичöс индöмаöсь Лесозаводса ЛДК-ö технорукöн. Дзик пыр сетöмаöсь и патера. Татчö сэсся и кольччöмаöсь. Елизавета Евлампиевна пырöма уджавны сберкассаö.
Елизавета Евлампиевна да Анатолий Степанович ныв-пияныслы да внук-внучкаыслы лоöны семьякостса олöмын примерöн. Найö некор абу зыксьылöмаöсь. Весиг пö эг тöдлöй, кыдзи нэмыс коли. Дерт, олöмас быдтор-йыс вöлöма: юмолыс и курыдыс. Но гозъя пыр олöмаöсь öта-мöд радиыс. Мед пö сöмын радейтана пöлыд-лöн ставыс вöлі бур.
* * *
Елизавета Евлампиевна да Анатолий Степанович важöн нин пенсия вылынöсь. Но весь оз овны. Пенсия вылас петöм бöрас карса патерасö эновтöмаöсь да овмöдчöмаöсь Дырнöсса дачаö. Гозъя кыпöдöмаöсь ичöтик керка, лöсьöдöмаöсь куим порсьöс, чипанъясöс да кроликъясöс. Тані 21 во нин олöны. Бöръя вояссö скöт оз видзны, пон да кань сöмын налöн. А град йöрас уджыс юр выв тыр на, быдторсö быдтöны да.