Донты — миян республикаын медся гырысьясысь öти. Специалистъяслöн видзöдлас серти, воас кад да сійö дзикöдз косьмас... Öні нин тыыс абу джуджыд. Гожöмнас ваыс пыдöсöдзыс бура шоналö. Дерт, сэсся быд сикас туруныс пуркöшитö-быдмö да васьыс кислородсö ньылалö. Бöръя воясас гожöмнас нин чериыс, овлывлö, пöдö... Тöвнас жö йиыс кöнсюрö весиг пыдöсöдзыс кынмылö. А мый шензьынысö? Öткымынлаын ваыс зэв ляпкыд.
Республикаса Госсöвет нуöдіс Кулöмдін районын "гöгрöс пызан" сайын сёрни, кöні медшöр юалöмнас вöлі ю-ты видзöм да чери видзöм-сöвмöдöм йылысь. А пример пыдди вайöдісны буретш Донты.
ВАЫС ЛЯПКАЛÖ, НЮЙТЫС СОДÖ
Коми наука шöринысь Биология институтын уджалысьяс висьталісны, мый асыввывсянь рытыввылö Донтылöн кузьтаыс ылöсас 14 километр, медся паськыдіныс 2 километр, джудждаыс матö 1,5-2 метр. Тыыслöн рытыввывса помыс йитчö Эжваö усьысь Кулöм юкöд каналöн, кодöс кодйылöмаöсь сиктса йöз матö 150 во сайын. Мыйла тайöс вöчöмаöсь? Олöма йöзлöн казьтылöмъяс серти, Важ вискыс заводитöма косьмыны. Кодйöм каналыслöн кузьтаыс 1.520 метр.
Кольöм нэмын туясьысьяс пасйöмаöсь, мый Донтылöн ыдждаыс вöлöма этша вылö 12 километр, а öні — 4-ысь этшаджык. И збыльысь тыыс ляпкалö. Ва туруныс ёна быдмö. И та вöсна нюйтыс, сапропельыс, öти вонас ты пыдöсас öкмö 3 миллиметр. Водзті Донты матігöгöрын мелиораторъяс кодйöмаöсь канаваяс да тадзи косьтöмаöсь васöдінсö, медым сэтчöс ПМК вермис перйыны да заптыны трунда. Та вöсна тыыс тшöтш ляпкалöма-чинöма.
Дон да матігöгöрса мукöд сиктын олысьяс нэмсö кыйлöмаöсь сэні чери. Вöвлöма кад, кор договор серти кыйсьысьяс вонас инавлöмаöсь 60-130 центнер сын, сир, ёкыш, кельчи.
Казьтыштам, Донты берегса нюрын котыртöма республикаса заказник. Сэні быдмö 27 сикас быдмöг да 150 пöлöс ва турун, олö 100 сикас гаг-гут да 236 пöлöс лэбач. На лыдын и Гöрд книгаö пыртöм беркут, орлан-белохвост, скопа, руд тури... Тулыс-арын ты вылын шойччöны да кынöмпöт корсьöны 10 сюрс утка-дзодзöг да кулик. Зэв уна лэбач поздысьö сылöн берегъясын.
КОР АС СИНМÖН АДДЗЫЛАН...
Пасъям, Эжва йылö кайлісны республикаса Госсöветысь мупытшкöсса озырлунъяс, вöр-ваöн вöдитчöм да экология комитетöн веськöдлысь Александр Макаренко да сійöс вежысь Александра Бушуева, социальнöй политика комитетöн весь-кöдлысь Андрей Самоделкин, оланпас дасьтöм да меставывса асвеськöдлöм кузя комитетöн юрнуöдысьöс вежысь Владимир Косов, депутат Татьяна Саладина, а сідзжö видз-му овмöс да сёян-юан кузя министр Сергей Чечёткин, мупытшкöсса озырлунъяс да вöр-ва видзан министерстволöн управлениеöн веськöдлысь Владимир Кабанцев, чери кыйöм кузя федеральнöй агентствоысь Двина-Печора территориальнöй управлениелöн Комиын государственнöй контроль, надзор да биоресурсъяс видзан отделöн юрнуöдысьöс вежысь Сергей Цогоев, Комирыбвод федеральнöй управлениелöн чери рöдмöдан да аквакультура отделöн веськöдлысьöс вежысь Евгений Цейтлин, "Комимелиоводхозпроект" институтöн веськöдлысь Геннадий Ерцев да мукöд чина йöз.
Донты берегын найöс виччысис крестьянско-фермер-скöй овмöс нимсянь Василий Павлов. Сійö дасьтöма торъя карта, кöні тысö ставнас бура серпасалöма-петкöдлöма. Весиг и сапропель ведра сэні жö сулаліс. Василий Степанович висьталіс:
—Донтысö миян овмöс босьтіс кöртымö, и тані ми кутам кыйсьыны 20 во. Дерт, уна лоис котравны, дасьтыны быд сикас кабала. Öні миян овмöсын дас морт ботанасьö, черисö иналам сельпоö. Урчитöма, вонас позьö вугравны 3 тонна сын-сир. Таысь öтдор дзик быдöн вермö кыйсьыны шатин-кыснанöн, 50 метр кузьта ботанöн, но мед синмыс 32 миллиметрысь абу ичöтджык. Ас сиктсаöс ог кöсйöй дзескöдны ни дöзмöдны. Сэк жö законыс абу зэв гöгöрвоана. Угоддьöсö кöртымö босьтысь видзöдö ты вылын пöрадок бöрся. А кыдзи тайöс вöчны? Мыждыны правоным абу. Сöмын чери видзан госинспектор вермö кывкутöмö кыскыны.
Василий Павлов майшасьö, мый тыас ваыс вочасöн ямö. Чина йöзöс нуöдліс помöд дорö, кодöс вöчлöмаöсь 20 во сайын. Сэки Василий Степанович уджалöма ПМК-ын. Вайöмаöсь Тиманысь зэв гырысь изъяс да помöмаöсь Дон виссö. Ваыс метр джынйысь унджык туöма-воöма. Но та мында кад кольöм бö-рын ваыс вочасöн кырöдö помöддоръясса берегсö. Дыр-ö сійö нöшта сулалас?
"ГÖГРÖС ПЫЗАН" САЙЫН
Сэсся чина йöз чукöртчисны юрсиктын "гöгрöс пызан" сайын. Кулöмдін районса администрацияöн веськöдлысь Дмитрий Шатохин пасйис, мый öткымын карын гырысь предприятие могмöдö уджöн сэтчöс олысьяссö. А Дон сиктын тайö тыыс лоö татшöм "вердысьнас". Дмитрий Александрович казьтыштіс, мый 17-18 нэмъясын Донтыö кыйсьыны волöмаöсь весиг Усть-Сысольскысь да Емдін районысь войтыр. Кольöм нэмся на 50-60 воясын Дон сиктса вуграсьысьяс черисö сдайтлöмаöсь матö 15 тонна. Райадминистрацияса юралысь вöзйис Дон висса помöдсö дзоньтавны мелиорация либö аквакультура кузя уджтас серти. А нöшта тані позьö сöвмöдны туризм. Ачыс Донтыыс зэв аслыспöлöс, сэсся Ыджыд да Ичöт Кадам тыясыс, позьö шуны, орччöнöсь.
Республикаса видз-му овмöс да сёян-юан кузя министр Сергей Чечёткин лыддьö, мый Донтысö кöртымö сетöм бöрын пöрадокыс лоис. Сергей Лукич эс-кöдö, мый Коми наука шöринысь Биология институтын уджалысьяслы колö тысö быд боксянь бура туявны. А дзоньтасян уджъяссö заводитны Дон виссянь. 1965 восянь ваыс ляпкалöма 1 метр. Та вöсна сійö ёна шоналö да ва туруныс бура быдмö. Донтыас колö рöд-мöдны быдмöг сёйысь чериöс, шуам, гычöс. А сир-ёкышыд сідз рöдмас. И сапропельсö колö заптыны. Республикаса санаторийясö вайöны татшöм косьтöм нюйт-сö да ваöн нин кизьöртöны. А, гашкö, Донтыса сапропельыс нинöмöн абу лёкджык?
Чери кыйöм кузя федеральнöй агентствоысь Двина-Печора территориальнöй управлениелöн Комиын государственнöй контроль, надзор да биоресурсъяс ви-дзан отделöн веськöдлысьöс вежысь Сергей Цогоев ошкыштіс Василий Павловöс:
—Сійö сяммис воöдчыны сиктса йöзкöд öти кывйö. Та вöсна чери кыян промыслöвöй участокын эз кыпты некутшöм зык ни вен. И таысь сылы ыджыд аттьö. Тайö овмöсыс ас кадö юöртö, уна-ö да кутшöм чери кыйöмаöсь-сдайтöмаöсь. Федеральнöй тэчаслöн индöд серти öні чинталöны госслужащöйяслысь лыдсö. Та вöсна Эжва йылын кольöма дзик öти госинспектор Николай Шахов. Дерт, сылы отсасьöны милицияын да ГИМС-ын уджалысьяс.
Медъёна кажитчис "Комимелиоводхозпроект" институтöн веськöдлысь Геннадий Ерцевлöн сёрниыс. Геннадий Николаевич тöдчöдіс, мый сійö тысö выльпöв туялöмлы паныд. Учёнöйяс пö бара дасьтасны ассьыныс вöзйöмъяссö, кыдзи да мый колö вöчнысö. Да и татшöм туясьöмыс зэв дона. Та пыдди пö бурджык сьöмсö вичмöдны ты видзöм-дорйöм вылö. Матысса дас воöн ты пыдöсас сапропельыс чукöр-мас 10 сантиметр. А ваыс кö водзö кутас ямны?
Чукöртчöм йöзлы институтöн веськöдлысь петкöдліс неыджыд кинофильм. 1990-1994 воясын унатор, вöлöмкö, вöчöмаöсь: Дон вискын казьтылöм помöдсö кыпöдöмаöсь, Важ вислысь вомсö весалöмаöсь-джудждöдöмаöсь, ты дорö нюжöдöмаöсь бур туй, ньöбöмаöсь ты пы-дöссö джудждöдысь машина да оборудование, 1990-1995 воясын перйöмаöсь 68 сюрс кубометр сапропель...
Геннадий Ерцев висьталö, мый нюйтыс тöдчымöн лоöма унджык бöръя 30 вонас, кор тыыс ляпкалöма 0,5-1,5 метр джудждаöдз. Таын пайыс и казьтылöм помöд буждöмыслöн. Институтын уджалысьяс уна во нин туялöмаöсь Донтысö. Г.Н.Ерцев шуис, мый, ковмас кö пö, став колана кабаласö сетам. А нöшта на колö дасьтыны тыыслысь медводдза вомынсö джудждöдöм кузя документъяс...
ПАВЛОВ ТЫ?
Аддзысьлі Комирыбвод федеральнöй государствен-нöй учреждениелöн Вылыс Эжваса отделöн веськöдлысь Николай Чалановкöд. Тöда, Николай Иванович — веськыд морт, висьталö ставсö, мый думайтö. И Донты кузя сідзжö восьсöн сёрнитіс.
—Апрель помын, буракö, татшöм жö чукöртчылöм вöлі. Чина йöз соборуйтісны, индісны, кыдзи да мый колö вöчны... А ме ног, оз ков гырысь уджтасъяс дасьтыны. Та пыдди неыджыд воськовъясöн колö водзö мунны. Первой Важ висса помöдсö кыдз позьö öдйöджык выльмöдны-дзоньтавны. Письтас-пазалас кö сійö, некутшöм программа оз отсав. "Караултö" ковмас сэсся и горзыны, — висьталö Николай Чаланов. — Тані уджала 19 во. И став тайö кадсö сёрнитöны Донты лов-зьöдöм йылысь... Кад жö нин кöть мыйкö да вöчны! Кольöм во В.С.Павлов шыöдчыліс районса администрацияö отсöгла. Ставсö вöлі сёрнитчöма нин, сöмын колис мынтыны сьöм, и изсö сöвтісны да вайисны эськö. Сё сюрсысь этшаджык шайт абу сюрöма...
Н.И.Чаланов эскöдö, мый Донтыса помöдыс реестрас абу, а сідзкö, сылöн абу кö-зяиныс ни паспортыс. Тайö тшöтш жö падмöдö. Кодлы урчитны-сетны сьöмсö, медым босьтчыны дзоньтасян уджъясö?
—Чайта да, Донтысö важöн нин колö нимтыны Павлов тыöн. Нэм чöжыс Василий Степанович вийсьö ты вöснаыс. Жаль, но республикаса ни миян районса чинаяс сійöс быттьö оз кывны. Кыв вылас быдöн дась отсавны, но доддьыс, тыдалö, сирасьöма, некыдз оз вöрзьы. А Донты берегса нюр-заказникыс республикаса тöдчанлуна. Мыйла та йылысь вунöдöны? Татчöс нюрын быдмысь-кисьмысь мырпом да турипув кодь чöскыд кöра вотöсыс некöн сэсся абу, — шуö Николай Иванович.
Донсаяслы тыыс збыльысь зэв тöдчана. Вотчыны мунігöн сиктсаяс сьöрсьыныс сöмын сов да нянь босьтöны. Тшыгла пö ог кулöй, чери кыям да юква пуам дай...
* * *
Госсöветысь депутатъяс вынсьöдісны вöзйöмъяс, кодъяс сетасны позянлун ловзьöдны Донты. Окота эскыны, мый тайö тадзи и лоö.
Шензьöдіс, мый весиг специалистъяс оз вермыны воны öти кывйö, öнöдз на вензьöны, кутшöм туясьöмъяс колö нуöдны...
Донты кузя чина йöзыд унаысь нин чукöртчылöмаöсь. Чайта да, татшöм ко-миссияö пырысьяс кö быд пöрйö сьöрсьыныс вайисны кöть öти изйöн, Важ висса помöдсö важöн нин позьö вöлі дзоньтавны.