Россияын, Венгрияын, Финляндияын да Эстонияын – сэні, кöні олöны финн-йöгра да самодийскöй войтыр, майнас вöлі панöма "Имя финно-угорского мира" конкурс. Сійöс котыртысьяс чайтöны, тайö пö отсалас бöрйыны рöдвуж войтыр пöвстысь петöм медся тöдчана йöзöс, кодъяс ыджыд пай пуктісны ас войтырöс нимöдöм-сöвмöдöм вылö да тöдмöдны накöд, а öти сайысь и вужвойтырлöн историяöн мир пасьталаын унджык олысьöс.
Конкурсас артмö куим юкöн. Август 31 лунöдз öтуввезйын www.finugor.ru лист бокын быдöн вермас пасйыны мортöс, кодöс чайтö финн-йöгра пöвстын тöдчанаöн, да бура подулавны ассьыс видзöдлассö, мед и мукöдöс эскöдны таö. Та бöрын октябрь 31 лунöдз öтуввезйын жö либö sms-ясöн позяс сетны ассьыд гöлöстö сы вöсна, кодöс лыддян збыльысь нималанöн. И коймöд юкöнас декабрь сизимöд лунöдз медуна гöлöс чукöртысьяс пöвстысь кöкъямыс нимпасын лоö бöрйöма вермысьясöс.
Öнöдз вöзйöма нин сизимдасысь унджык мортöс, и налöн лыдыс лунысь-лун содö. Медводдза нимпасын вермасясны финн-йöгра мифъясын, легендаясын паныдасьлысь персонажъяс. Сідз, перымса комияс нимöдöны Пера-багатырöс, а финнъяс – ассьыныс Кöдзыд пöльсö – Йоулупуккиöс. Комияслöн уна жö геройыс, но талун кежлö некод на абу водзмöстчöма пасйыны найöс конкурсас. Историяын тöдчана йöз нимпасын колö вöзйыны политикаын, религияын, общественнöй олöмын водзмöстчысьясöс, кодъяс асланыс войтырлöн историяын кы-зьöд нэм заводитчытöдз колисны тöдчана пай. Шензьöдö, мый коми войтырсянь татчö пасйöмаöсь Григорий Распутинöс, коми вирыс пö сылöн эм жö. Уналы, гашкö, тайö и оз во сьöлöм вылас. Карелъяслöн нималана мортыс – Александр Суворов, венгръяслöн – Аттила. Вячеслав Гайзерöс вöзйöмаöсь коймöд нимпасын, кöні вермасьöны öнія кадся политикаын, общественнöй олöмын, религияын водзмöстчысьяс.
"Туялысьяс, йöзöс туйдысьяс" нимпасын бöръясны найöс, кодъяс сöвмöдöмаöсь либö сöвмöдöны националь-нöй да мирса наука, образование. Комисянь тані вöзйöмаöсь Питирим Сорокинöс, и, дерт, тайö зэв ошкана кандидатура. Вермасьны сійö кутас сэтшöм йöзкöд, кыдзи финн Матиас Кастрен да удмурт Кузебай Герд. Культураын уджалысьяс нимпасын вöзйöм мортыс медся уна, и тайö абу дивö, öд гижысьяс, серпасалысьяс, шылад тэчысьяс, театрын да киноын ворсысьяс, архитекторъяс пöвстын нималысьыс и збыльысь уна. Иван Куратов, Виктор Савин, Вениамин Чисталёв, кыв шутöг, бура петкöдласны коми войтырöс.
Этшаджык на кандидатöс вöзйöма спортсменъяс лыдысь, кöть эськö татшöмыс финн-йöгра пöвстын уна жö. Комиысь тайö нимпасас финн Пааво Нурмикöд, карелка Лариса Лазутинакöд да мукöдкöд "ордйысьö" нин Раиса Сметанина.
Василий Латкинöс, XIX нэмся промышленникöс да путешественникöс, Коми му туялысьöс, купечöс, вöзйö-маöсь вермасьны кыдзи экономикаын водзмöстчысьöс. Татчö жö позьö индыны и кöр видзысьясöс, чери кы-йысьясöс, вöралысьясöс...
И кöкъямысöд, бöръя нимпасас вермасясны мукöд кывъя войтыр, кодъяс пуктöмаöсь финн-йöгралöн сöв-мöмö тöдчана пай – "Финн-йöгралöн ёрт". Комисянь тані "ордйысьö" республикаса вöвлöм Юралысь Юрий Спиридонов.
* * *
Öтуввезйын öні нин вензьöны, вермасны-ö тайö йöзыс петкöдлыны войтырсö ставнас. Коді чайтö, мый и бурджык йöз на эмöсь, мед ачыс гожöм помöдз вöзъяс найöс. А арнас нин став мирöн гöлöсуйтöмöн бöръям медся пыдди пуктана войтырöс, кодъяс и артмöдöны финн-йöгралысь нимсö.
