XIV нэм помö — XV нэм заводитчигöн Эжваса Перымöс вöлі öтлаöдöма Роч государствокöд. Коми мулöн быд пельöсö паськыдджыка кутісны овмöдчыны комияс да рочьяс. Чужисны выль пöчинокъяс, слöбöдаяс, сиктъяс. Торйöн паськаліс тайö гыыс XVI нэмын, кор Россияын заводитчисны выль муяс вöдитöм кузя реформаяс.
Татшöм сикас овмöдчöминъяс лыдас пырис и Шульгинлöн слöбöда, коді вöлі пуксьöма Усть-Сысола сиктсянь 15 верст кывтчöсджык. Медводдзаысь сы йылысь казьтыштöма йöзöс да угоддьöяс гижалан 1586 вося небöгын. Талун важся Слöбöда сикт пыдди быдмис выль промышленнöй район. Но Эжваса öнія олысьяс оз вунöдны ассьыныс историянысö. Öд тайö муыс лоис налы гортöн.
Слöбöдалы 425 во тыригкежлö, кодöс пасъясны 2011 вося августын, Эжваысь Н.М.Дьяконов нима литературно-театральнöй музей Эжва районса администрациякöд öтвылысь шуисны нуöдны "Старая Слобода" выставка-конкурс.
Музей шыöдчö республикаын олысьяс дінö корöмöн пырöдчыны конкурсас. Зарни киа мастеръяслысь уджъяссö лоö петкöдлöма Эжва районлöн лунлы сиöм выставка вылын.
Выставка-конкурслöн могыс — сöвмöдны Коми Республикаса декоративно-прикладнöй искусство кузя мастеръяслысь традицияяссö, видзны важся Слöбöдалысь да талунъя Эжвалысь историясö.
Тайö аслыспöлöс ордйысьöмас вермасны пырöдчыны декоративно-прикладнöй искусствоса профессиональнöй да асшöр мастеръяс, прикладнöй творчестволöн кружокъясöн веськöдлысьяс, художественнöй школаясын да студияясын велöдчысьяс, кöні кöть найö оз овны.
"Старая Слобода" конкурс вылö позьö мöдöдны керкалысь, пывсянлысь, амбарлысь, потшöслысь макетъяс, пу вужйысь, пуысь, сюмöдысь, бадь ньöрйысь, пу йöгысь, сёйысь вöчöмторъяс. Вылö лоö донъялöма и важ ногöн вöчöм, и выль сикас творческöй уджъяс. Уджыс вермас лоны уна сикас юкöна, коді эськö пыдісянь петкöдліс Слöбöдаса войтырлысь олöм-вылöмсö. Макетсö позьö мичмöдны торъя серпасъясöн.
Кывкöртöд вöчигöн лоö донъялöма авторлысь сямсö, вöчöмторлысь мичлунсö, аслыспöлöслунсö.
Уджъяссö кутасны донъявны Эжва районса администрацияын да музейын зільысьяс. Петкöдчысьясöс пасъясны дипломъясöн да грамотаясöн. Медбур уджъясысь сетасны дона козинъяс.
Конкурс вылö уджъяссö колö мöдöдны 2011 вося июль 30 лунöдз татшöм адрес серти: Сыктывкар, Маяковский нима улича, 3 номера керка, Н.М.Дьяконов нима литературно-театральнöй музей.
Звöнитны позьö 62-64-98 номера телефон пыр.
Электроннöй пошта адресыс: E-mail: [email protected]
