Кыдзи ачымöс помнита, Паль гöра вылын паськöдчöм сикт-грездъяс бердын пыр овлісны турун ошъяс. Гожöмнас найö нуръясисны вöрын быдмысь вотöсöн. Ёна радейтісны чöсмасьны анькытш сора зöрйöн, кодöс совхоз кöдзліс вöрбердса муяс вылö. Мöдöдчан вöрö да пыр и казялан, мый анькытш сора зöрсö бара нин лякöмаöсь ошъясыд. Корсюрö и мортыдкöд паныдасьлісны, но вешйылісны бокö. Тайö зверыс полö мортсьыд да зільö видзны ассьыс кусö. Сöмын пияна ошъяс ассьыныс быдтасъяснысö дорйöм могысь вермöны повзьöдны морттö. Со и вöрö ветлігöн сикт-грездса войтыр эз ёна майшасьны, мый налы туйсö потшас ош.

Сэк жö ускöттьöыд суö оз сöмын йöзöс, но и ошъясöс. Кольöм вося жар да кос гожöм вöсна вöрын эз кисьмы некутшöм вотöс. Тшыгъявны кутісны ошъясыд да сетчисны мортлöн оланінлань. Пальса öткымын олысьяслысь найö кутісны пышйöдлыны понъясöс. Кольöм арнас öти ыджыд ош локтіс "гöститны" Данямитьдор грездса олысь Валерьян Егорович Белыхлöн керка дорö. Кöзяиныс муртса удитіс йöртны гортас понсö. А вöрса зверыд дыр на ыджыдалöма кöзяинлöн керка бердын.

Тöвнас ошъясыд лöнисны, водісны гуясö. Но тулыснас бара пондісны асныравны. Кольöм вося тшыг гожöмыс тöдчис. Сідз, Ивадор грездса олысь Валерьян Иванович Белых май заводитчигöн öти рытö дас час гöгöрын кыліс, мый ёна увтö суседыслöн понйыс. Петіс ывлаö видзöдлыны, мый лоис. Вöлöмкö, пон вылад уськöдчöма зэв ыджыд ош. Но мöдыс орöдöма дом поводсö да пышйöма. Пöшти дас кык лун ветлöдлöма понйыд орöдöм чепнас.

—Ошкыд скöрмис, мый эз сюр сылы понйыд, да уськöдчис ме вылö, — казьтылö Валерьян Иванович, — ко-тöрöн пыри сарайö да игнаси. Весиг повзьыны эг удит. Бöрынджык гортö пыри да висьталі ош йылысь гöтырлы. А сійö шуö, ылöдчан пö.

Мöд лунас нин звöнитлісны милицияö, корисны вöралысьясöс. Но оштö найö, дерт, эз аддзыны. Сійö абу жö йöй. Тöдö ассьыс мыжсö да дзебсис вöрö. Вöлöмкö, кольöм во да таво Паль гöгöрын ошъясыд уна понйöс вöрö пышйöдöмаöсь. Вöрса зверьясыд найöс виöны да тыртöны муöн, лыс лапъясöн, мед дуксясны. Сэсся бöрынджык нин сёйöны. Но кык кымын пон бöр воöмаöсь ас садяс да пышйöмаöсь гортаныс.

Кыдзи шуö вöвлöм мусир перйысь, а öні пенсионер В.И.Белых, ошъяссьыд пö ми збыльысь некор эг повлöй. А öні со кык во нин сулаліс кос гожöм. Вöрын нинöм эз быдмы. Со и тшыгöсь вöрса зверьясыд да кутісны волывлыны сикт-грездö, оз-ö мыйкö и налы вичмы. Но бур, мый öні и туруныс нин öдöбтчис. Сідзкö, турун ошъясыдлы сёяныс тырмö. Век жö быдöнлы колö видзчысьны тайö вöрса зверьяссьыс.

Снимокъяс вылын: В.И.Белых сарай öдзöс дорас, код сайö удитіс дзебсьыны ошкысь; тайö понсö и кöсйис пышйöдны Микайлö Ивановичыд.