"Коми му" газет гижліс, мый бöръя воясö тöдчымöн чиніс коми кыв тöдысь школа помалысьяслöн лыдыс. 2009 воын татшöмыс республикаын вöлöма 700 гöгöр ныв-зон, кольöм воын лыдпасыс чинöма 500-öдз, таво лоас сöмын кöнкö 300 морт.
Тані нинöм гöгöрвотöмыс абу. Чужан кывным воысь-во бырö. Тадзи важысянь нин артмö да оз кöсйы сувтны. Некыдз.
Эм кык медшöр помка, мыйла бырö кывным. Первойыс йитчöма политикакöд. Ми олам государствоын, коді шусьö Россияöн да кöні роч кывсö урчитöма медвылыс тшупöдаöн. Медым веськöдлыны ыджыд йöзкотырöн, колö öти подув. Со и мукöд войтырлöн аслыссикаслунысь öвтыштчöны. Вылісянь вöчисны сідзи, мый национальнöй кывнад некытчö он мун.
Мöд помкаыс — йöзын. Кыв кусö медвойдöр сы вöсна, мый асьным сыысь öтдортчам. Эгö кö веськодя видзöдöй мам кыв вылö, сэки та выйöдз эськö эгö воöй.
А медъёна мыжа абу кодкö, а коми интеллигенция, кодлöн и буретш мед-шöр могыс — видзны национальнöй котырлысь быдпöлöс петкöдчöмсö. Велöдчöм йöзлöн та вылö позянлуныс мукöдысь серти ёна унджык. Но, тыдалö, эз тырмы сюсьлуныс ни водзмöстчöмыс, мый понда и пакталö кывным.
Мирас дзик быдторйын, мый шедöдöма-сöвмöдöма наукаын, техникаын, культураын, пайыс медводз интеллигенциялöн. Вежöра йöз век олöмсö вежöны бурлань.
Но коми кывкöд серпасыс мöдджык. Медводдзаяс лыдын заводитісны вунöдны чужан кывсö буретш велöдчöм войтыр Сöвет власьт кадö на. Рочасьны модаыс сэки пырис йöз пöвстö. Челядьсö зілисны туйдны тайö визяс, öтдортны комиысь, а то коми сёрнитанногыс пö кутас вывті ёна кывны.
Сеталісны челядьнысö роч классъясö, медым комиыслöн дукыс эз паркйы. Сэки и вывлань писькöдчысь ныв-пиянлы кивывджык öдйöджык лоны ыджыд мортöн, шедöдны вермöмъяс. Сэтшöм вöлі да колис политикаыс, а йöзыс сöмын слöймöдчöны политика дорас.
Сэсся кутісны рочмыны прöстöйджык йöзыс, сьöд удж вöчысьяс. Но найö "вöтчисны" "интеллигентнöйджык" войтыр бöрся. Помнита, öткымынöн мырдöн рочасьлісны, оз артмы, но нарошнö кывсö песöны. Ставыс комиöн, а öти рочöн ышнясьöмöн сёрнитö. Кöсйö быттьö висьтавны: со пö ме кутшöм, медся-медся, а ті олöмсьыс кольöм йöз. Артмис паськыда петкöдчысь серпас: коми морт, кодлöн чужан кывйыс коми да тöдö сійöс, но кöсйö вунöдны, некор оз вöдитчы сыöн, а сöмын "великöйöн да вынйöраöн". Либö синö англия кывлань, коді вирус моз паськалö Му шар вылын.
Сідз шусяна элитасянь и пырис мода яндысьны коми кывйысь. И яндысьöмыс кыдзкö быттьö тувъявсьö йöзлöн вежöрас. Весиг найö, кодъяслöн уджыс йитчöма национальнöй аслыспöлöслун видзöмкöд, гижысьяс, велöдысьяс, журналистъяс, кызвынсö мунöны тайö жö кокни туйöдыс. Шоча кодлöн челядьыс тыр-бура варовитöны мам кыв вылын. Со и артмö, мый кыкнанныс, батьыс и мамыс — комияс, а челядьыс — рочöсь. Овлö, кодсюрö нимöдö асьсö кыдз национальнöй öтмунöмын зільысьöн, кыпыда горзö сöвмöм-водзмöстчöм йылысь, а ачыс...
Торйöн кö, тайö инмö газетын бöрйысьöмводз- вывса кампаниялы сиöм гижöдъясын. Сідз, "Коми муын" кодкö кандидатпуяс пöвстысь сетö программасö комиöн, кодкö — рочöн, мед ставлы гöгöрвоана пö вöлі. "Коми войтыр" öтмунöмса öти водзмöстчысь морт, коді норасьліс чинаяс вылö, мый öтдортöны коми кывсö, сетіс гижöдсö рочöн. Сэк жö паныдасьліс дзик мöдтор. Роч морт, юрист Александр Щиголевлöн шыöдчöмыс петіс комиöн, тöдöмысь, кодкö сылы вуджöдіс. Со и артмис, рочьяс миянлысь кывнымöс пыдди пуктöны, а ми асьным — ог.
Кывлöн тöдчанлун либö сылöн чинöм йылысь висьталö национальнöй филологияö велöдчыны пырысьяслöн лыдыс. Помнита, Сöвет кадö СГУ-лöн коми отделениеын велöдчыліс 25 морт. Сэсся демократия вöсна национальнöй сöвман гы кыптылігöн велöдчысьсö содтылісны 50-öдз. Но öні та мындаыс оз чукöрмывлы. Кутшöмкö воö кывлі, мый дас нёль абитуриент вöзйысьöма коми филологö.
Сэсся и унаöн уджалöны оз специальносьт сертиыс. Помаласны вузсö, а мунöны оз школаö, а мöдлаö, социальнöя могмöдан да нöшта кутшöмкö управлениеö. Велöдысь серти кивывджык лоны служащöйöн либö банкса клеркöн. Пырöны коми отделениеö вылыс тöдöмлун вöсна, сійöс кокниджык шедöдны.
Кыв вермас сöвмыны сöмын сэк, кор сійöс лэптöны кыкнанладорсянь: вылісянь и улісянь. Вылісянь, кор власьт вужвыйöнöдз вежö сы дорö политикасö. Тайö вöлі миян историяын кыкысь, 1920-öд да 1990-öд воясö. Сійö кадö унатор вöлі вöчöма, но помöдз нинöм абу вайöдöма.
Улісянь, кор асьныс йöзыс гöгöрвоасны чужан кывлысь коланлунсö, мый сытöг войтыр оз вермы шусьыны войтырöн. Тайö могсö збыльмöдöмын медыджыд тöдчанлуныс буретш интелли-генциялöн.
Эска, сійö кö эз корсь кок-ньöд, эз визувт олöм кывтыдыс, а водзсасис, талунъя кадся уна гöрöд эськö вöлі разьöма...
Бур, эмöсь на и найö, кодъяс видзöны чужан кывсö да сёрнитöны сы вылын оз сöмын ас костаныс, но и челядьыскöд. Тшöтш и карын олысьяс, кöні коми руыс оз ёна тыдав, кöні тэнö некод некытчö оз лэдз коми кывнад, и сылы местаыс кольö сöмын семья пытшкын. Та вöсна колö аттьöавны татшöм йöзсö.
