Мый йылысь талунъя томулов мöвпалöны? Кутшöм налöн дум-кöсйöмыс? Тшö-кыда кодсюрö шуасьлö, сур сулея киас босьтöмöн пö ныв-зон сöмын ывлаті шлавъялöны... Збыль вылас тадзи-ö?
Олег Михайлов велöдчö Коми наука шöринлöн Биология институтса аспирантураын. Зіль, писькöс, водзмöстчысь. Аскиа учёнöй туялö Сыктывдін районса Мöдлапöв нюр. А нöшта на Олег Михайлович депутаталö Сыктывкарса сöветын.
ВЕЛÖДЫСЬ РÖДЫСЬ
Сійö чужöма да быдмöма Печора карын. Том мортлöн кывъяс серти, налöн семьяыс аслыспöлöс. Яков Маврикиевич пöльыс да Раиса Ивановна пöчыс нэм чöжыс велöдöмаöсь челядьöс Изьва районысь Краснобор сиктса школаын. И мамыс тшöтш ассьыс олöмсö йитöма посни войтыркöд. Педучилище помалöм бöрын кагульничаалöма Печора карса детсадйын. Ставыс тайö йиджöма Олеглöн сьöлöмö.
Ичöтсяньыс заводитöма ветлыны вадорö да пармаö. Олег Михайлов нюмъялö:
— Муртса кок йылö сувті, а сэки меным вöлі кык арöс, первойысь нуöдісны ю дорö. Алексей Петрович батьöй да Роман ыджыдджык вокöй пыр сьöрсьыныс босьтлісны вöравны да вуграсьны. Вöр-ва вöсна тöждысьöмыс, сійöс видзöм-дорйöмыс вир-вемö, тыдалö, йиджöма. Быдмиг-верстяммигöн олöмын унатор вежсис. Вöралысьяс да чери кыйны радей- тысьяс öд пыр майшасьöны-тöждысьöны, медым юясын ваыс вöлі сöстöм да чериыс сэні эз чин, медым кыдз позьö этшаджык кералісны яг-рас, медым эз бырны дозмöр да тар койтъяс... Та вöсна, гашкö, и шуи лоны вöр-ва видзысьöн.
Школа помалöм бöрын пырöма Сыктывкарса государственнöй университетлöн химико-биологическöй факультетö, кöні дасьтöмаöсь экологъясöс.
НЫРЧЧÖМА НАУКАÖ
Мöд курссянь нин том морт нырччöма наука уджö. А коймöдас нин велöдчигöн Олегöс казялöма Коми наука шöринлöн Биология институтын уджалысь Светлана Загирова. Буретш сійö кадас институтыс збыльмöдöма "Carbonovth" проект. Студент Михайлов туялöма, кыдзи вöр да нюр вылö мöрччöны сідз шусяна парникöвöй газъяс.
—Уджыс зэв аслыспöлöс, но меным сьöлöм серти. Сэсся проектыс вöлі войтыркостса. Сэки и тöдмаси Герма-нияысь учёнöйяскöд да экологъяскöд, торйöн нин матö — Ларс Куцбахкöд. Накöд öтувъя сёрни-уджыс уна выльсö сетіс. Ассьыным юкöнсö ми, Биология институтын уджалысьяс, сэки помöдз вайöдім, — казьтылö Олег Алексеевич.
Велöдчигас кыкысь ветлöма экспедицияö. Первойсьыс пыжöн Вуктыл районса Пöдчерем посёлоксянь кывтöмаöсь Печора карöдз. Уджыс вöлöма уна. Налöн котырыс туялöма нюрвывса заказникъяс. Бöръяысьсö ветлöмаöсь Чилимдін районö. И бара донъялöмаöсь сэтчöс нюрын быдмысь быдмöг- турунъяс.
АСПИРАНТ
2009 воын Олег Михайлов пырöма велöдчыны Коми наука шöринлöн Биология институтса аспирантураö. Научнöй веськöдлысьнас лоöма буретш Светлана Витальевна. Учёнöй сöвет вынсьöдöма торъя план. Аспирантлы вичмöма "Изучение потоков углекислого газа в болотных экосистемах" туйвизь. Во чöж öні зільö Сыктывдін районса Мöдлапöв нюрын, коді Пожöгдін посёлоксянь неылын.
Туясьысьлöн сэні эм оланін. Нюр вылас сувтöдöма торъя оборудование. Сы отсöгöн тöдмалöны, уна-ö углекислотаа руыс петö нюрсьыс да уна-ö тайö газсö турун-пуясыс "сёйöны"-бырöдöны. Уджыс уна. И гожöм, и тöв туясьö. Ставсö пö колö стöча пасъявны. Мукöддырйи вежоннас нёльысь сэтчö ветлö. Тшöкыда войковтлö и. Майбыр, биыс эм.
—Öтчыд миянлысь кабельнымöс шышъяс гусялісны. Проводыслöн кузьтаыс матö 700 метр. Да и бура вöлі сійöс дзебöма. Но аддзöмаöсь тай. Сэсся öтчыд öшиньсö жугöдöмаöсь да вежöсас пыралöмаöсь. Нуöмаöсь чер да зыр. Бур, некутшöм оборудование керкаас эз вöв, — висьталö Олег Михайлов.
Ягсяньыс нюрöдзыс, а тайö этша вылö 1.200 метр, вöчöмаöсь пöвйысь моски. Вотчысьяс пö öні буретш сэті ветлöны. Весиг аскиа учёнöйöс ошкöмаöсь бур вöчöмысь. А вöралысьяс казялöмаöсь, мый оборудованиесö сувтöдігöн кыпöдöмаöсь торъя вышка. Сійö пö аслыспöлöса жуньгö. И тайö шы вöснаыс тулысын нюр вылас кутöмаöсь ёна унджык дзодзöг да утка пуксьыны.
Аскиа учёнöй дасьтö-гижö кандидат ним вылö диссертация. Велöдчынысö кольöма нöшта öти во. Нöшта на колö йöзöдны куим научнöй гижöд журналъясын, кодъяс пырöны став Россияса аттестационнöй комиссиялöн борд улö. Олег Алексеевич пасйис:
—Гижны абу сьöкыд, но медшöр мытшöдыс — йöзöдчынысö кöсйöны зэв унаöн. Со и öчередьыс зэв ыджыд. Та вöсна дыр лоö виччысьны. А куим гижöд йöзöдтöгыс дорйысьны он вермы. Эскöдісны, во помас пö тэнад öти статьяыд петас...
Аспирантлöн стипендияыс абу ыджыд, муртса 2.550 шайт. А Германияын, шуам, сійö — 800, Швецияын — 2 сюрс евро... Асьныд сэсся öткодялöй, кыдзи миян странаын олöны аскиа учёнöйяс да академикъяс.
