Енбиа, киподтуя йöзыд быд сикт-карын эмöсь. Öтияс сюмöдысь вöчасьöны, мöдъяс ньöрйысь кысьöны, коймöдъяс пуысь быдторсö вöлалöны. А Кöрткерöс районса Шойнатыысь 11 класса велöдчысь Иван Макаров весиг кöртысь чуймöданаторъяс вöчалö.
"СЮСЬ" ПАРНИК ДА ТÖЧИЛА
Воддза воö сійö вöчöма зэв аслыспöлöс парник. Кутшöмöс? Сійö ачыс "гöгöрвоö", кор колö киськавны быдмöгъяссö, а вывті кö жар, ыркöдö сынöдсö. Ваня тайö "сюсь" парниксö вöчöма технология кузя республикаса олимпиада кежлö. И босьтöма сыысь мöд места. А таво вöчöма ножовка тöчитан станок. Сійö гоз-мöд здукöн лэчыда тöчитö пила пиньяс. Кыдзи висьталö зарни киа зон, ножовка тöчитан станоксö ни öти лавкаын оз вузавны. Тайö уджсьыс Иван Макаровлы сетöмаöсь медводдза места.
—А мыйысь тэ тöчиласö чукöртін?
—Мый ки улö веськаліс, — нюмъялö сійö. — Важ печатайтчан станокысь, электрическöй лобзикысь жугалöм двигатель пукті да мукöд кöрт шыбласысь детальяссö вöчи. Ньöби сöмын краска да алмазнöй диск.
Тайö "сюсь" парникыс да тöчитчан станокыс зэв коланаöсь и гортса овмöсын.
—Олимпиада вылын петкöдчыны, йöзöс чуймöдны, дерт, окота. Но ме зіля и бать-мамöс кокньöдны, — висьталö енбиа зон.
Татшöм парникас, кыдзи висьталö Шойнаты сиктса том Кулибин, öгуреч-помидортö позьö быдтыны во гöгöр чöж.
Ваня — зэв киподтуя морт. Сійö ичöтсяньыс пыр мыйкö вöчалöма-мастеритлöма. Жугалас чача, велосипед, мопед либö компьютер — ставсö дзоньталас-лöсьöдас.
—Ичöтдырйиыд, гашкö, чачанас эн и ворслы да, пыр дзоньтасин? — юася сылысь.
—Чайта, зонкаясыд ставныс радейтöны вöчасьны. Сöмын öтияслöн артмö, а мöдъяслöн озджык, — вежавидзана вочавидзис сійö. —Нöшта вöлі радейта изйысь замокъяс, керкаяс да джуджыд заворъяс кыпöдны.
—Абу кö гуся, мый вылын öні мöвпалан?
—Кöсъя шор отсöгöн электричество перйыны, — чуймöдіс сійö менö.
Ванялöн керка дорас визувтö Пошта шор. Буретш сэтчö и кöсйö вöчны ичöтик гидроэлектростанция. Енбиа зон висьталіс, мый и шорысь позьö перйыны би, медым чайник пузьöдны да лампочка öзтыны. Сöмын колö ыджыд кöсйöм да, дерт, и сям.
КИЫС ЗАРНИ, А ЛОЛЫС КЫВБУРАЛЫСЬЛÖН
Ваня гижö и кывбуръяс. Заводитöма тэчны 8-öд классын. Зонлысь сьöлöмсö вöрзьöдö чужаніныс, сикт- гöгöрса вöр-ваыс. Шензьö мичлуннас, и доймö сьöлöмыс, кор пузувтöны вöр-васö. Со неыджыд юкöн Коми мулы сиöм кывбурысь:
Радейтана Коми му,
Сьöлöм дінсянь сиам тэд,
Медым тэнö лёк эз су,
Медым шуда вöлін век...
Медводдза кывбурсö Ваня, дерт, бать-мамыслы петкöдлöма. Найö ошкöмаöсь писö да тшöктöмаöсь водзö гижны. Но зонкалы окота вöлöма, мед сылысь гижöдъяссö донъялісны и поэтъяс. Лыддьöма сійöс и Шойнаты сиктса школаын коми кыв да литература велöдысь Зоя Васильевна Шиликовалы. Сійö ачыс гижö кывбуръяссö. Велöдысь тшöтш жö ошкöма Ваня Макаровöс.
—Дерт пö, колö на велöдчыны, но артмö, шуис меным Зоя Васильевна. Сэсся менö туйдіс, кыдзи бурджыка колö кывбурсö тэчны, — висьталö Ваня.
Кольöм во зон велöдчöма "Гожся университетын", кодöс быд во котыртлöны Россияса финн-йöгра культура шöринын. Сэки Ваня аддзысьлöма Комиын нималана гижысьяскöд. Петкöдлöма ассьыс гижöдъяссö Владимир Тиминлы.
—Сійö тшöтш жö шуис, мый менам артмö. А татшöм ышöдöмыд том гижысьыдлы медводдза воськовъяс вöчигöн медся бур отсöг, — висьталö Ваня Макаров.
Эмöсь сылöн и радейтчöм йылысь кывбуръяс. Кыдзи нö том мортлы муслун йылысь гижтöг? Кольöм во ассьыс "Кöин пи да кöин бать" нима кывбур йöзöдлöма "Чушканзі" журналын.
—А висьтъяс гижны эн на босьтчыв? — юася сылысь.
—Эг. Кывбурыс меным быттьö матынджык.
Школа помалöм бöрын Ваня Макаров мöвпалö водзö велöдчыны пединститутын технология да предпринимательство факультетын.
—Сійö меным лöсялöджык, — шуö Ваня. — Но и кывбур гижöмысь ог эновтчы.
