Май помын Вуктылысь Нарьян-Марö мöдöдчас "Норд" теплоход, нуöдас Нёбдінса Виттор нима драма театрысь артистъясöс Печора бокса сикт-грездъясö.
ВИЧЧЫСЬÖНЫ ИЗЬВАЫН И ЧИЛИМДİНЫН
Вуктылын Айму вöсна Ыджыд тыш заводитчöмсянь 70 во тырöм водзвылын юркарса артистъяс петкöдласны "Саня, Ваня, с ними Римас", а нöшта "Квадратура круга" да челядьлы "Вождь краснокожих" спектакльяс. Печора вомлань кывтігöн теплоход сувтлас Печора карö, а сэсся мöдöдчас Нарьян-Марöдз. Колö пасйы-ны, мый войвывса суседъяс дорын миян театр абу на вöвлöма, и ворсысьяс ыджыд окотапырысь мöдöдчöны сэтчö. Теплоходыс артистъясöс бöр катас Чилимдінöдз, сэні нин найö сöласны автобусö да мöдöдчасны Изьва районö. Июнь 8 лунö петкöдчасны Кельчиюрын да Діюрын, июнь 9 лунö – Изьва сиктын, а 10-öд лунас – Щельяюрын. Билетъяслысь донсö урчитöмаöсь сэтшöмöс, медым сиктса видзöдысьяс вермасны волыны спектакльяс вылас, челядьлы ковмас вештыны комын, верстьöлы – квайтымынсянь сё кызь шайтöдз. Сиктса войтыр öні нин виччысьöны Сыктывкарысь артистъясöс – Андрей Третьяковöс, Денис Рассыхаевöс, Анатолий Федоренкоöс, Ольга Родовичöс да мукöдöс. Ыджыд дивö пö миянлы театрлöн воöмыс, да, дерт, видзö- дысьыс быдлаын чукöрмас клуб тырыс.
–Государстволы колö нуöдны сэтшöм политика, медым ичöт каръясын да ылі сиктъясын олысьяс вермисны тöдмасьны гырысь театръ-яслöн петкöдчöмъясöн. Буретш татшöм индöд сетіс Россияса культура министерстволы странаса Президент Дмитрий Медведев, – висьталö Нёбдінса Виттор нима театрöн веськöдлысь Михаил Матвеев. – И ми пырöдчим "Культура России" уджтасö, татшöм ногöн гастрольсö котыртны сьöма отсöгыс воис тшöтш и федеральнöй бюджетысь. Татöг эськö теплоходсö кöртымавны öдвакö вермим.
Театрлöн кöкъямысдасöд сезонын тайö гастрольыс абу нин медводдза. Мöймуся арын сійö ветліс Ухтаö да Сосногорскö, тавося февральын – Воркутаö, Интаö да Усинск районö, апрельнас – Луздорö. Дерт, сьöмыс та вылö уна колö. Сідз, Воркутаöдз декорацияяссö нуны ковмис медавны быдса вагон, мынтыны таысь 350 сюрс шайт. Войвыв кытшсайса карын асланыс кык театр эм, но и юркарса артистъясöс пöся вочаалöмаöсь, спектакльысь спектакльö пö пыр унджык и унджык йöз волöмаöсь видзöдны найöс. А Луздорса Гурьёвчиын шуöмаöсь, ыджыд праздник пö миянлы вöчинныд. И татшöм кывъясыс донаджыкöсь гастроль вылö видзöм став сьöмсьыс.
БЫД ТÖЛЫСЬ – ВЫЛЬ СПЕКТАКЛЬ
Тшупöда паса сезонлы кывкöртöд вöчигöн Михаил Матвеев пасйис, мый театрын во чöж зільöмаöсь озырмöдны репертуарсö. Дасьтöмаöсь Антон Чеховлысь "Юбилей и прочее, прочее...", Любовь Терентьевалысь "Птичка", Евгений Софроновлысь "Приключения Снегурочки на острове пиратов", Василий Шукшинлысь "Верую...", выльысь ловзьöдöмаöсь Алексей Поповлысь "Чудь мыльксö", Людмила Разумовскаялысь "Бесприданниксö". Кольöм воын моз жö тавося май помын сезонсö тупкигöн сыктывкарсалы петкöдласны медбур спектакльяссö, дасьтöны и кутшöмкö виччысьтöмтор. Михаил Николаевич эз кöсйы водзвыв восьтыны гусяторсö, май 27 лунö Шукшинлысь "Веруюсö..." видзöдысьяс пö тöдмаласны сійöс.
–Театр босьтчис и кон- цертъяс петкöдлан уджö, та вылö став позянлуныс миян эм, – висьталіс Михаил Матвеев. – Сідз, "C.Bechstein" фирмалöн выль рояльöн ворсны воліс Москваса консерваторияын велöдысь Рувим Островский. Вöліны и Георгий Свиридовлöн произведениеясысь, Петрозаводскысь "Sattuma" ансамбльлöн да мукöд концертъяс. Вылö донъялісны видзöдысьяс Владимир Ванеевлысь да Петербургса консерваторияын сылöн велöдчысьяс- лысь концертсö, Ярославльса театр институтысь студентъяслысь спектакльяссö. Надейтчам, Сыктывкарын петкöдчасны и Щукин нима училищеын да ГИТИС-ын велöдчысьяс.
ДЖЫН ДОНСЬЫС ПОЗЯС НЬÖБНЫ
Августын, республикалы 90 во тыригöн, Комиö волас Санкт-Петербургысь Литейнöй проспектвывса театр. Питерса артистъяс петкöдласны Александр Володинлысь "С любимыми не расставайтесь", Александр Пушкинлысь "Барышня-крестьянка", Александр Островскийлысь "Банкрот" ("Свои люди – сочтёмся"), Ги де Мопассанлысь "Пышка" да Евгений Шварцлысь "Золушка" спектакльяс. Спектакльяс вылö билетлöн доныс верстьöлы лоас 800–1.500, челядьлы – 300–700 шайт. Но майсянь август 9 лунöдз найöс позяс ньöбны матö кык пöв донтöмджыка.
Россияса культура министерстволысь грантсö босьтны зэв сьöкыд. А Нёбдінса Виттор нима театрлы татшöмсö кыкöс вичмöдісны: котыртны улыс Печораса сикт-каръясö гастрольяс да петкöдлыны театрлöн сцена вылын Гарсиа Лоркалöн "Кровавая свадьба" гижöд серти спектакль. Комиöдöма сійöс Евгений Козлов. "Вирпаса кöлысьын" ворсны кутасны 14 мужичöй да 15 нывбаба – труппаысь кызвын артистыс. Режиссёрнас корöмаöсь Владикавказысь Тамерлан Дзуцевöс.
–Сöвет кадö на тайö спектакльсö петкöдлісны Чече-но-Ингушетияын, – висьта-лö Михаил Матвеев. – Чайтам, лунвылысь режиссёр вермас вöчны спектакльсö öзйöданаöн, ыззьöданаöн. И коми кывйыс мытшöдöн сылы оз жö ло, öд Тамерлан Дзуцев уна кыв вылын нин спектакльяссö пуктыліс.
А июнь 15 лунö нин Ярославльысь воас Сыктывкарö Олег Нагорничных. Сійö босьтчас дасьтыны Вильям Шекспирлысь "Гамлетсö". Театрöн веськöдлысьлöн кывъяс серти, спектакльсö дасьтыны ковмас матö кык миллион шайт. Лачасö кутöны "Монди Сыктывкарса ЛПК" вылö. Некымын тöлысь сайын театр да вöр комбинат кырымалісны ёртасьöм йылысь сёрнитчöм, кöні медтöдчана могнас индісны буретш "Гамлет" вылын уджсö.
Театрлöн юбилея сезон помасьö, но тöдмасян водзö вылö кöсйöмъяснас да виччысян нин выль сезонсö. Öд сэтшöм окота видзöдны и "Вирпаса кöлысьсö", и "Гамлетсö", и уна мукöд спектакль.
