Валентина Прокопьевна Зырянова 36 во велöдіс Грива сиктса школаын роч кыв да литература. Сійö Крупская нима премияа лауреат. Меным мойвиис велöдчыны сы дорын. Сыö, мый лои журналистöн, и менам велöдысь пуктіс пай. Валентина Прокопьевна важöн нин пенсия вылын. Таво сылы тырис 70 арöс.
Валентина Прокопьевна абу сöмын бур велöдысь. Сійö енбиа морт. Томдырйиыс петкöдчыліс сцена вылын. Койгорт районса газетын тшöкыда йöзöдлöны сылысь кывбуръяссö. Койгортса библиотекаын уджалысьяс, Гриваысь библиотекарь Татьяна Триппель да сэтчöс школаса содтöд тöдöмлун сетан шöринын зільысь Татьяна Чугаева вöчисны Валентина Прокопьевналы тшупöда пас кежлас зэв ыджыд (кыдз ачыс велöдысь шуис) козин — лэдзисны сылысь кывбур чукöр. Гриваса библиотекаын кыпыда нимöдісны сійöс. Тайö гаж вылас волісны Валентина Прокопьевналöн нывъёртъясыс, кодъяскöд öтлаын велöдчылöма школаын, удж кузя ёртъясыс, сиктса войтыр, унджыкыс на пиысь велöдчылісны сы дорын, а сідзжö челядь. /тияс казьтылісны ичöтдырсö, том кадсö, öтлаын уджалан вояссö, мöдъяс юасисны, кыдзи артмöны кывбуръяс, мый ышöдö гижны найöс да мый йылысь вöлöма медводдзаыс.
—Медводдза кывбурöс ме гижи школаын велöдчигöн на, 1953 воын, меным сэки вöлі 12 арöс, — висьталіс Валентина Прокопьевна. — Сталинöс нимöді тайö дженьыдик кывбурас. Кöсъянныд кö да тöд вылö кö усяс, лыддя.
"... все дороги к коммунизму, туда нас Сталин поведёт", — нюмъялігтыр лыддис Валентина Прокопьевна да содтіс, сэки пö кадыс сэтшöм вöлі.
—Гижа ме рочöн. Видлі эськö и комиöн, но оз артмы. Кывбуръяс, строкаяс, кывъяс, рифма асьныс воöны — тöдöмöн ог пуксьы да лöсьöдлы.
Валентина Прокопьевна некор эз эновтчыв гижан уджысь. И кывбуръяс серти позьö тöдмасьны сылöн олан туйöн. Уна кывбур сиöма Сибырлы.
—Ме сэні вöлі куимысь. Сельхозтехникумсянь (школа помалöм бöрын первойсö велöдчи сэні) менö ысты-лісны ылі Сибырö практика вылö. Мöдысьсö ветлі, кор сэні служитіс верöс, коймöдысьсö — армияö пиян дорö нин. Та понда тайö муыс менам сьöлöмö тшöтш йиджис.
Эмöсь ёртъясыслы, мамыслы, войналы сиöм кывбуръяс.
—Менö зыбкаын на качайтісны, кор пансис война. Но сылöн би пыр муніс менам пöль. Челядькöд, кор ичö-тöсь на вöліны, ветлім Мамаев курган вылö.
Но век жö унджык кывбурсö сиöма чужан мулы, вöр-валы.
—Важöн нин мöвпалі öти небöгö чукöртны став кывбурсö. Но та вылö колö сьöм. И ме зэв ёна аттьöала библиотекаын уджалысьясöс тайö козинсьыс. Мед кöть и книгаыс абу чорыд кышöда, мед и абу уна листа, мед вöчöма ас вынъясöн, а абу типографияын, но та понда нöшта на донаджык меным тайö козиныс.
Гаж вылын челядь да верстьö лыддисны выль сборникысь кывбуръяс, "Гора аньысь" артистъяс петкöдлісны концерт, кытчö пыртісны Валентина Прокопьевналысь кывбуръяссö, а сідзжö сьылісны "Гриваса вальс", кодöс уна во сайын нин гижис сиктса олысь Александр Карманов, а комиöдіс Валентина Зырянова.
