Му – Енлöн вöчöмтор. Сідзкö, и быд мортлöн чужöмсяньыс нин эм мулöн юкöн вылö право. Крестьянин пыр кыпöдчывліс сылысь мусö мырддьöмлы паныд. Важ историяысь тöдсаöсь быдса тышъяс, вир кисьтана – лов перъяна косьяс, кодъяс весиг некымын воöдз нюжавлісны.
Öнія кадö Россияын сідзжö мунö муяс вöсна аслыссяма тыш. Водзті муыд вöлі государство киын. Öні сійöс асалöны.
Оланпасъяс серти, öтувъя овмöсын быд уджалысьлöн, коді зільліс 1991-2001 воясöдз, а сідзжö пенсия вылö петысьлöн, эм му да öтувъя овмöслöн эмбур вылö право да пай. А збыль вылас унаöн-ö вермисны збыльмöд-ны тайö правосö, уналы-ö сетісны му да эмбурлысь юкöн донсö сьöмöн? Муыс да и эмбурыс важöн нин торъя йöзлöн киын-зептын. И некод оз кöсйы дорйыны вöвлöм уджалысьясöс, кодъяс уна во чöж вердісны йöзöс и йöлöн-яйöн, и град выв пуктасöн. Та могысь и вöлі котыртöма 2011 вося март 23 лунö "Крестьянскöй фронт" öтмунöмлысь Коми юкöн.
Юралысьнас бöрйисны Наталья Георгиевна Елфимоваöс. Тайö зіль да водзмöстчысь аньыс 2008 воын шыöдчылöма Сыктывдін районса администрацияö корöмöн торйöдны машинаяс мыськаланін стрöитöм вылö мутор. И со мый висьталö Наталья Георгиевна:
–Кырымалі став колана кабаласö да медбöрын куим кырымпас пуктöм водзын тыдовтчис, мый Сыктывдін районса администрациялöн абу некутшöм право кодлыкö сетны му. Став му вылас кöзяинъясыс – вöвлöм "Сык-тывкарскöй" совхозса уджалысьяс-пайщикъяс. Но тайö кабала серти, а збыль вылас?
Тасянь и куті корсьны сійö кадся кöть кутшöмкö документъяс. Гусьöн лои аддзöма пайщикъяслысь списоксö, кодöс сэкся юралысьяс вöлі видзöны кöрт шкапын томан сайын. Суд тшöктіс эрдöдны документсö, а сэсся и киритны оланпас торкалöмöн "ас пöжалöм" шуöмъяссö. Та бöрын и ОБЭП-лы, и Сыктывдін районса прокуратуралы быть ковмис пессьыштны.
Та кузя став документъясыс, и списокыс тшöтш, пыр на öти пайщиклöн, "Сыктывдинскöй" ООО-са юралысьлöн питшöгас. Сійö оз сöмын дзеблав гижöд-документъяссö, тшöш и веськöдлö ас кöсйöм сертиыс вöвлöм öтувъя овмöслöн эмбурöн. А мынтö-ö тайö эмбурнас вöдитчöмсьыс колана да индöм мында вотсö? Да и кодлöн оланпас серти тайö эмбурыс? Гашкö, вöвлöм уджалысьяслöн? Скöтысь да мукöд эмбурысь некодлы абу вöлі мынтöма весиг чегöм пу грöш.
Медся ёна чуймöдö, мый районса администрациялы "матысса" вит морт, кодъясöс тшöтш пасйöма списокас, 17 во сайын нин босьтлöмаöсь аслыныс му да эмбур пайяс. А мукöдыслы кор вичмас? Окота тöдны, кодлöн му вылын кыпöдöны Ыбын этношöринсö? Эм-ö сэтчöс вöвлöм совхозса уджалысьяслöн пай да кыдзи вöлі гижöдöма, а сэсся и торйöдöма этнопарк улö мусö?
Татшöм мисьтöмторйыс вöчсьö оз сöмын Сыктывдін районын. Дас сизим во сайын нин оланпас серти вöлі тшöктöма юкны да разöдны и му, и эмбур вылö пайяс. Но öнöдз на тайö ыджыд гусятор!
Власьт да öтувъя овмöсъясса вöвлöм да öнія веськöдлысьяс дорö юалöмыс уна. Сетам кыв, мый кутам и водзö "дöзмöдны" тайö гырысь йöзсö налы "ковтöм" юалöмъясöн. Йитчыны миянкöд позьö 8 (8212) 21-04-04 телефон пыр.
