Олöмтö овны абу ю вомöн вуджны. Тайöс шуигöн Генрих Николаевич Канов кыпыда нюммунö. Уна тужа-нужа сійö аслас нэмöн тöдлöма. Но некор ловнас абу усьлöма, пыр зільöма йöзлы мыйкö буртор вöчны...
ВО-МÖД, ГАШКÖ, И ОЛАН НА...
Генрих Николаевич чуж-лöма Удора районса Кослан сиктын. Нёль арöса зонкаöс нуöмаöсь Усвавом районса Ипат грездö. Пöль-пöч дорас сэсся и быдмöма-верстяммöма. Ылі пельöсын быдмысь детинка ёна кöсйö-ма велöдчыны. Школа помалöм бöрын пырöма Балашовса военно-авиационнöй училищеö. Но сэні сэки велöдöмаöсь лэбавны сідз шусяна поршневöй самолётъясöн. Том лётчикъясöс служитöм пыдди мöдöдöмаöсь босьтны содтöд тöдöмлун Омскса военно-авиационнöй училищеö. СССР-ын сэки заводитöмаöсь лэдзны фронтвывса медводдза реактивнöй бомбардировщикъяс.
Училище помалöм бöрын лейтенант Канов заводитöма служитны Мурманск обласьтын. Но военнöйлы мый шуасны, кöсъян кöть он, лоö вöчны. И ковмöма служитны сылы страна пасьталаын. Сьöрсьыс пыр новлöд-лöма неыджыд чемодан, кöні вöлöма ножовка, мöлöт, стамеска да мукöд инструмент. Мыйла? Да выль служба местаын семьяыслы вичмöдöм оланінсö тшöкыда ковмылöма дзоньтавны.
—Шулöны тай, кутшöм пö кöзяин, сэтшöм и оланін. Öдзöсыс, видзöдан да, тшелля, джоджыс пöлыньтчöма-катовтчöма, пачыс потласьöма... Тöв кежлö оланінтö лоö дасьтыны, медым кöдзыд дырйи вежöсын вöлі эськö шоныд. Дерт, позьö медавны, но ас кинад вöчöмыд, чайта да, ёна бурджык, — висьталö Генрих Николаевич.
Ставыс другöн вежсьöма, кор СССР-öн босьтчöма веськöдлыны Никита Хрущёв. Ыджыд опыта уна лётчик лоöмаöсь ковтöмöн. На лыдын и Генрих Канов. Мый военнöйлы водзö вöчны? Ёртъясыс, кодъяскöд öтвылысь лэбалöмаöсь, вöзйöмаöсь вуджны гражданскöй авиацияö. Тадзи сійö веськалöма Якутияö. Бöръя помыс олöма Мирный карын. Аслас самолётöн Генрих Николаевич помтöм-дортöм войвылын нуöма-вайöма быд сикас грузсö, а сідзжö геологъясöс, врачьясöс, гижысьясöс да журналистъясöс... Лэбалöма 22 во.
Вын-эбöсыс эськö вöлöма, но пенсия вылö мырдöн ыстöмаöсь. Нывбаба-врач крапкöма, сынöдкöд пö ковмас янсöдчыны, дзоньвидзалуныд некытчö шогмытöм, вöркъясыд висьöны, уна вылö пö тэныд овны колис... во-мöд.
Кольöма во дас. Коркö öтчыд лунвылын тайö врачыскöд аддзысьöмаöсь. Бурдöдысьлöн синмыс гöгрöсмöма, тэ пö тай, Канов ёрт, ловъя. Тöдін-ö менö? Генрих Николаевич веськыда жö крапкöма, тöді пö эськö да, чолöмасьны абу окота.
РАДЕЙТАНА СИКТ
Сыктывкарын, тыдалö, сійö овны оз вермы. Весь олігас быттьö сынöдыс оз тырмы. Галина Михайловна гöтырыс чужöма-быдмöма Сыктыв районса Поёл сиктын. Кор бать-мамыслöн керкаыс тыртöммöма, гозъя кайöмаöсь видзöдлыны нэмöвöйся овмöссö, и Генрих Николаевичлы сиктыс пыр жö мусмöма. Да и сэтчöс йöзыс пö шаньöсь.
Керкасö бура дзоньталöма. Майбыр, сямыс эм. Быд сикас град выв пуктас гозъя за-водитöмаöсь вöдитны, садитö-маöсь öмидз-сэтöр... Грездын быдмöм морт ёна шензьö талунъя сиктса олöм-вылö.
—Тайö квайт вонас, мыйта ола Поёлын, татчöс öтувъя овмöсын и сиктса йöзлöн мöс лыдыс öтарö чинö. Миян уличаын тöвнас бара на некымын сюрукöс начкисны. Зэв уна му-видз эжсялöма. А син водзын Ыджыд война. Миян Ипат грездын вöлі дас керка. Война вылö мунісны став пöрнöй мужик-уловыс. Бабаяс да челядь колисны. "1 Мая" колхозлöн öтувъя чукöртчылöм дырйи шуисны ыдждöдны мусö. Таöдзсö вöдитлöмаöсь 3 гектар картупель, а тулыснас садитісны 9 гектар нин. А öд став бурджык да ёнджык вöвсö фронт вылö нуисны. Ки помысь кызвын уджсö сэки бергöдлісны. И колхозыслöн вöлі 40 лысьтан мöс, — казьтылö Генрих Николаевич. — Жаль, Ипат абу нин. Грездыс вöлі дзик Печора кыр йылын. Быд тулыс ытваыс кырöдліс берегсö...
ТÖВБЫД КЕЖЛÖ ЧÖСКЫД ЯЙ
Сиктын овны, а яйсö лавкаысь ньöбны? Вöвлöм лётчик шуöма рöдмöдны кроликъясöс. Унаöн норасьöны, кузь пеляясыд пö тшöкыда кувсьöны. А мыйла? Ви- дзысьясыд вочавидзны оз сяммыны.
И Генрих Николаевич мевойдöр мунöма сиктса ветстанцияö. Ветеринар Валентина Осиповна весиг шензьыштöмакодь, первой морт пö татшöм юалöмöн шыöдчö. А сэсся гöгöрвоöдöма, мый кролик бöрся, кыдзи мукöд пемöс бöрся, колö бур дöзьöр. А нöшта на колö вöлöм ас кадö ёнмöдны-бурдöдны. Чужöм пиянсö письтиавны. Гырысь кроликлöн мускыс тшöкыда висьмылö, та вöсна пö колö изöм таблетка сёяныскöд сетны.
И та бöрын нин Генрих Николаевич ньöбöма кроликъястö. Руд великан рö-дысь. Нёль воöн ни öти пемöс абу кувсьöма. Кольöм арнас начкöма сё лов. Тöвбыд пö сёйим. Тöвйöдöма вит кроликöс. А öні некымын позйын бара нин котралöны пияныс.
Кроликыд зэв азым, вомыс пö оз и тупкысьлы, пыр мыйкö да рöмидзтö пемöсыс. Гожöмнас лоö уна турун ытшкыны. И тöв кежлö на заптыны. Олöма морт ачыс öнöдз ытшкö литовкаöн.
ВОЙЙЫВ БЫДТЫНЫ
Поёлын муыс бур. Ас йöрас Г.Н.Канов садитöма öмидз да некымын сикас сэтöр куст. Кольöм во гозъя чукöртöмаöсь сизим ведра öмидз, а сэтöрсö нöшта на ун-джык. А вотöсыс зэв на уна вöлöма. Суседъяслы вöзйöмаöсь, локтöй пö да вотöй. Сійö жö öмидз варенньöыс ёна отсалö кынмысьлы. А, гашкö, бурдöдчан турун-быдмöгсö видлыны вöдитны? Аптекаын тай вузалöны уна сикас татшöм сорассö. А сикт гöгöрас некымынлаын быдмö воййыв.
Олöма морт кöртымö босьтöма кык гектар му. Библиотекаын лыддьöма уна книга. Кöсйö эжасö тракторöн кульыштны да гектар джынйö кöдзны воййыв быдмöг. Кольöм арнас чукöртöма нин сылысь кöйдыссö. Садитны мöвпалö и сьöд да гöрд юмов пелысь, гöрд льöм да мукöд куст. И артмас, кыдзи ачыс шуö, фитосад.
—Лыдди, мый сар дырйи воййывсö вöлöм Европаö вузалöны. Позьö корсö гож сайын косьтыны. Та бöрын пöжны да юны. Но ёна пö бурджык, корсö кö шамралан, медым сöкыс петіс. Сэсся лун-вой колö видзны поньöд улын. Тадзисö кор-йыслöн рöмыс вежсьö и бурдöдчан выныс содö, — висьталö Генрих Николаевич.
Тайö дум-кöсйöмсö кывлöм бöрын сы дорö шыöдчылöма нин Визин сиктын öти вузасьысь. Сылöн аслас лавка. Вай пö босьтчы, а ме кута вузавны. Кöть вöвлöм лётчиклöн думыс неуна мöдджык вöлöма: сійö кöсйöма сиктсалы петкöдлыны, мый и бурдöдчан турунъяссö позьö ас йöрын вöдитны. Аптекаысь ньöбöм пыдди.
КОМИ КЫВ ВÖСНА ТÖЖДÖН
Олöма морт тшöкыда волывлö сиктса шöр школаö. Сійöс бура тöдöны кыдзи велöдысьяс, сідзи и велöдчысьяс. Сэтчöс библиотекаö вайöма уна книга да журнал. Выль во водзвылын нуöдöма аслыспöлöс конкурс. Компьютерöн колö вöлöм серпасавны-вöчны чолöмалан открытка. Вермысьяслы козин пыдди сетöма 500 шайтöн. Школасö медся бура помалысьяслы бара вичмöдöма 400 шайтöн. Кольöм вося сентябрь 1 лунö первой клас-сö локтöмаöсь квайт велöдчысь. И быдöнлы аслас пенсияысь ньöбöма да козьна-лöма тетрадь-фломастеръяс.
Мыйла тайö колö пенсионерлы? Ачыс сійö тадзи вочавидзис:
—Кöсъя, медым коми кыв водзö сöвмис, медым юргис эз сöмын сиктын, но и карын. Бур, Печать керкаын воссьöма "Ордым" лавка, кытысь öні позьö ньöбны коми книгаяс. Дзикöдз нин шогö усьлі, кор тупкисны коми небöг йöзöданінсö, — шуö Г.Н.Канов.
БАРА МОРТÖН ЛОИ
Генрих Николаевич Кановлы таво октябрын тырö 80 арöс. Но сійö öнöдз на зэв збодер. Ачыс на ветлö и "Жигули" машинаöн.
—Казявлін, кöнкö, кыдзи гöрбыльтчöм пöль-пöч вось-лалігас коксö кыскöны... А тöдан, мыйла? Эм аслыс-пöлöс висьöм — миозит. Ас вывті вуджис. Кольöм арö пöрысь пöльöс моз друг крукыльтіс. Кокöс лэптыштны ог вермы, восьлала-шарска. Джоджысь ва ведра лабичö лэптыны эг кут вермыны. Сё дивö! Пывсянö пыри да шемöсми: ки-кокöй лябмöма, кучикыс öшалö, быттьö яйыс абу и вöлöма, — висьтасьö олöма морт. — Больничаын врач видзöдліс-видлаліс да вöзйис юны витамин. А нылöй вöлі ветлö массаж вылö. И менö аскöдыс кыскис. Аньыдлöн киыс крепыд, мыш вылысь кучикöс песö-мöн песö. И тайö здукас кы-лі, кучик улас быттьö кутшöмкö чорыд ёкмыльяс артмöмаöсь.
Библиотекаысь босьтöма небöг. Сэні и аддзöма тайö висьöмсö, кöні буретш тайö ёкмыльяс йывсьыс висьтавсьö. Вöлöмкö, сой эбöсыд бырö, кор яйыс, кыдз шуласны, заводитö шоммыны. И öттшöтш чорыд ёкмыльыс чужö... А бурдöдчöны вöлöм яблöга уксусöн.
—Кык тöлысь мысти нин бара мортöн лои. Йöкта кöть сьыла. Бара со Поёлö лö-сьöдча кайны. Гожöм кежлö колö нин дасьтысьны, — нюмъялö пенсионер.
